Read Termanu 2RAJA-RAJA 11 Bible Online

2RAJA-RAJA 11 - Termanu bible

2RAJA-RAJA 11

¹Lelek Atalya bubuluk, nae anan Mane Ahazia, maten so boema, ana paleta, fo ela taonisa la'iesak Ahazia teidalen-nala lala'en-na.

²Yoas, fo Ahazia anan-na boeo, isabain-na, ala taolisan tutik, sama-sama no manek-ka anamane fe'en-nala, tehu naladeak, nanahu te'on Yoseba soi-tefa-nan. Loo Yoas, ma inak fo mananggati ina-aman, de lafunis lai kama esa dalek, nai MANETUALAIN Uman.

³Teuk 6 dalen-na, Yoseba nakaboboi ni'iana ndia, nai MANETUALAIN Uman dale, nai lelek Atalya paleta da'di leo ina manek.

⁴Neu teu ka hitun-na boema, Imam Yoyada naloo basa ina manek-ka manamanean-nala, malanga solda'du manai lain-nala, ma basa uma manek-ka, manamanean-nala, fo latongo loon nai MANETUALAIN Uman. Nai naa, nadenus fo ala soo-supa, fo lakala'ok ndia dale tutu'un-na. Ana natu'du fes Yoas, fo Mane Ahazia anamanen-na,

⁵de ana paleta nde ia nae, “Metema, emi tao bela-ba'uk nai fai sabat-ta soona, ba'e emi neu baba'ek 3, fo baba'ek esa nanea nai uma manek-ka.

⁶Baba'ek esa seluk, nai Sur Lelesuinan-na, ma lenan-na, nai lelesuina manai manamanea fe'ek-kala dean-na.

⁷Bubua ka duak fo, ala hahae naneak-ka nai fai Sabat-ta, muse lanea lenik tafaina nai MANETUALAIN Uman-na, fo lasulu-lahapa Mane Yoas-sa. Neu su'di leo bee neu boeo, emi muse manean, fo metema, hataholi see, ana soba neu deka no emi soona, muse taomisan.”

⁹Basa malanga solda'du manai lain sila-la, ala tunga Yoyada paletan-na, de leni fen, sila solda'du anan fo, muse lanea, ma manahahae naneak-ka, nai fai sabat ndia dalen-na.

¹⁰Yoyada fe basa malanga solda'du manai lain sila-la, Mane Dauk-ka tee-nala, ma bua-lo'a nanea aok, fo nanape'dak nai MANETUALAIN Uman-na.

¹¹Boema basa manamanea-la, esa-esak ho'u tafaina, ala ho'i sila mamanan-na, fo ala okofefeo-la, MANETUALAIN Uman-na, fo lasulu-lahapa manek-ka.

¹²Basa ndia boema, Yoyada no Yoas leo deak leu, boema ana tao ti'ilanga manek-ka neu Yoas langan lain, ma ana fen Manetualain susula Hoholo-lananen. Yoas nanandoo eik da'di leo manek, de ala po'a-benga dede'ak ndia, neu laun-na. Basa-basas totoko liman-nala, ma eeki-latadale lae, “So'dak ba'eneu manek-ka!”

¹³Ina Manek Atalya, namanene basa manamanea-la, ma laun-nala eeki-natadalen. Boema, neu lai-lai leo MANETUALAIN Uman neu, fo nai bee, hataholi makadotok lakamomotu.

¹⁴ Ana mete nita, mane beuk ndia, napadeik nai lelesu manaleo MANETUALAIN Uman neu, fo nai mamanak fo, ndia nanandoo eik-ka, de malanga solda'du manai lain-nala, ma manapuu pupuuk-kala, okofefeo-lan. Basa laun-na lala'en-na, eeki-latadale no namahoko-seteleek, ma ala puu pupuuk-kala. No dalek fo ta manatesa-tamak fa, Atalya sii-sii lulu'i bua papaken-na, boema ana nggasi ma nae, “Malelesik! Malelesik!”

¹⁵Yoyada ta fe loak, fo taonisa Atalya nai MANETUALAIN Uman-na boboa-kaisun fa, da'di nafa'da basa malanga solda'du manai lain-nala nae, “Moon leo deak neu, fo tunga manamanea makadadalak-kala matan-na, fo taomisa su'di see, fo ana sanga enok, fo ana soi-po'in.”

¹⁶Ala ho'u-lan boema, loon leo uma manek-ka neu, de ala taolisan neme ndia, fo nai Lelesuina Ndala matan-na.

¹⁷Imam Yoyada, nadenu Mane Yoas-sa, ma laun-na, fo ala tao hehelu-balataak loo MANETUALAIN lae, neukose sila da'di MANETUALAIN Anan. Nadenu manek-ka, fo ana tao hehelu-balataak no laun-nala boe.

¹⁸Basa ndia boema, laun-na leu sapu-la Baal uma sosongon-na, de ala tao latu'un. Ala tao lakalulutuk mei tunu-hotuk-ka, boema dodoki-dudulan-nala, ma ala taolisa Matan, fo Baal imam-ma, nai mei tunu-hotuk sila-la matan-na. Yoyada fe bela-ba'uk neu manamanea-la, fo lanea MANETUALAIN Uman-na,

¹⁹boema ndia sama-sama no basa malanga solda'du manai lain-nala, basa manamanea manek-ka, ma basa manamanea uma manek-ka, boema basa laun-na lala'en-na, la'ok loo Mane Yoas-sa, neme MANETUALAIN Uman-na, leo uma manek-ka neu. Yoas masok tunga Lelesuina Manamanea, boema nangatuuk neu kandela manek lain.

²⁰Basa laun-na lala'en-na, lamahoko-setelee, ma kota boeo nee-nee lino-lino, ma taolisa Atalya so.

²¹Yoas teun 7, nai lelek ana da'di mane Yehuda.