Read Termanu 2RAJA-RAJA 14 Bible Online

2RAJA-RAJA 14 - Termanu bible

2RAJA-RAJA 14

¹Yoas, fo Yoahas anan-na paleta Israel neu teu ka 2-na boema, Amazia, fo Yoas anan-na, da'di mane Yehuda.

²Nai lelek ndia, teun 25, de ana paleta nai Yerusalem, teuk 29 dalen-na. Inan nde Yoadan, neme Yerusalem mai.

³Amazia tao hata, fo nandaa no MANETUALAIN dalen-na, tehu ndia ta sama leo ba'i kain Dauk fa. Sama leo aman boe,

⁴de ndia boeo, ta tao nakalulutuk mamana sosongo-tatangok neu lamatua daebafak-ka fa, nalosa laun-na ka'da tunu-hotu lakandoo tutunu-hohotuk, ma tunu boomenik nai ndia.

⁵Amazia nangatutuun-na, natea-nahele tutika, ana hukunisa basa hataholi mana'a ngga'din fo, manataolisa aman-na.

⁶ Tehu ana ta taonisa hataholi mana'a ngga'din sila-la, anan-nala fa, nanahu ana tunga MANETUALAIN paletan-na, nai Musa Susulan dale, fo liin-na nae, “Boso hukumisa toulasik, hu kande anan-nala tatao-nono'i mangalaun-nala, ma boso hukumisa ni'iana, hu kande ina-aman tatao-nono'i mangalaun-nala. Bole hukunisa hataholi, ka'da hu kande, hataholi ndia, tatao-nono'i mangalaun-nala.”

⁷Nai natee-natatik esa dalek, Amazia taonisa solda'du Edom 10.000 neme Bafak Asin-na, de natona-na, kota Sela. Ana foi kota ndia, na'de Yokteel. Losa besak ia, kota ndia bei na'de Yokteel nahele.

⁸Basa boema, Amazia nadenu hataholi neu leo Yoas, fo Mane Israel-la neu, fo nahee natee-natatik non.

⁹Tehu, mane Yoas-sa haitua natataak-ka nde ia nae, “La'iesa boema, dila-nggauk manai letelepak Libanon-na, haitua fe ai kaiou-a, halak-ka nde ia nae, ‘Hai ai kaiou, fe o anafe'om-ma leo au anatoung-nga mai, fo da'di saoinan.’ Tehu, basa boema, bana fuik esa, la'ok tunga ndia, de ana heheta-aa'i dila-nggauk ndia.

¹⁰O, fo Amazia, manako'ao-ndaeaok, nanahu o sengi hataholi Edom-mala so. Nah, ade sesengik ndia, dai so hetu? Malole lenak, o meme ka'da uma! Sosoak hata, sanga dede'ak, fo neukose, ka'da nini soe fe o, ma o laum-mala?”

¹¹Tehu Amazia fo mane Yehuda, ta nafaduli Yoas, fo mane Israel-la, hala-kokolan fa. Hu ndia de, mane Yoas-sa no solda'du anan-nala, leu leo Bet-Semes, fo nai Yehuda, de latee-lata'ti loo Amazia nai ndia.

¹²Solda'du Yehuda-la, ala kala, de esa-esak nalai ne'un leo uman-na neu.

¹³Yoas ho'un-na Amazia boema, neu leo Yerusalem neu, de ana tao natu'u kota ndia, papala nanadaman-na, nanalun-na, fafa'kama metel 200, mulai neme Efraim Lelesuinan-na, losa Lelesuina Bu'uk-ka.

¹⁴Basa lilopilas ma lilofulak boema basa taka-besi, fo ana hapus nai MANETUALAIN Uman, boeo uma manek-ka hata-heton lala'en-na, sama-sama no hataholi nanafook de'ubee, Yoas nenis leo Samaria neu.

¹⁵Tutui fe'ek la'eneu Mane Yoas-sa, ma palani ta'ti batun fo la'ban Amazia, fo mane Yehuda, nanasulak nai Mane-manek Israel-la susula Tutuin dale.

¹⁶Yoas maten, de latoin nai manek Samaria-la, mamana loo-laten-na. Anan Yerobeam II, nggatin da'di manek.

¹⁷Mate basa Yoas, fo mane Israel-la, te Amazia, fo mane Yehuda, bei naso'da teuk 15 seluk.

¹⁸Hataholi-la tao nakabua makahatuk-ka nai Yerusalem, fo ala sanga taolisa Amazia. Hu ndia de, nalai leo Lakhis neu, tehu musun-nala, usin losa naa, de ala taolisan. Ala fua popolan-na neu ndala lain, de lenin leo Yerusalem neu, boema latoin nai mane-manek manai kota Dauk-ka, mamana loo-laten-na. Boema, Yehuda laun-nala so'u Uzia, fo Amazia anamanen-na, da'di sila manen. Nai lelek ndia, Uzia besak-ka teun 16. Tutui fe'ek la'eneu Mane Amazia, nanasulak nai Mane-manek Yehuda-la, susula Tutuin dale.

²²Mate basa aman boema, Uzia natona-na falik kota Elat-ta, de nafofo'a falik-kana seluk.

²³Amazia, fo Yoas anan-na, paleta Yehuda neu teu ka 15-na boema, Yerobeam 2, fo Yoas anan-na, da'di mane Israel, de ana paleta nai Samaria, teuk 41 dalen-na.

²⁴Ana nasala-nasingo neu MANETUALAIN, nanahu ana tunga Mane Yerobeam 1, tatao-nono'i managalun-na, de ana taon-na, hataholi Israel-la, lasala-lasingo.

²⁵ Yerobeam 2 ia, nde natona-na falik, Israel nusan-na lala'en-na, mulai neme enok leo Hamat neu, fo nai kii, losa Tasi Mates-sa, fo nai kona. Manada'dik ndia, nandaa no Amak, fo Israel MANETUALAIN-na, hehelu-balatan, tunga atan Nabi Yunus, fo Amitai hataholi Gat-Hafar ndia, anan-na.

²⁶MANETUALAIN nita hataholi Israel-la, doi-doso lanseli, te ta hapu hataholi esa boen, fo tulu-fali fas.

²⁷MANETUALAIN ta nanuu dudu'ak soaneu tao nakalulutuk Israel, losa dodoon-na fa, hu ndia de, Ana tulu-falis tunga mane Yerobeam II.

²⁸Tutui fe'ek la'eneu Mane Yerobeam 2, la'eneu palani ta'ti batun-na nai natee-natatik-kala dalek, ma tao leo beek de, ana natona-na falik Damsyik, ma Hamat neme Yehuda mai, soaneu Israel-la, basa-basan nanasulak nai Mane-manek Israel-la susula Tutuin dale.

²⁹Yerobeam II maten, de latoin nai mane-manek-kala, mamana loo-laten-na. De anamanen Zakharia, nggatin da'di manek.