Read Termanu 2RAJA-RAJA 16 Bible Online

2RAJA-RAJA 16 - Termanu bible

2RAJA-RAJA 16

¹Mane Pekah fo Remalya anan-na, paleta Israel neu teu ka 17-na boema, Ahas, fo Yotam anan-na, da'di mane Yehuda.

²Nai lelek ndia, teun 20, de ana paleta nai Yerusalem, teuk 16 dalen-na. Ana ta tunga bei-ba'i kain Mane Dauk-ka, ei tata'bun-na fa, tehu ana tao hata fo ta nandaa no Amak, fo ndia MANETUALAIN dalen-na fa.

³ So'da-na sama leo mane-manek Israel-la, nakalenak ana tunu-hotu anamanen-na, da'di leo tutunu-hohotuk neu lamatua daebafak-ka, fo tunga tatao-nono'i manggenggeok-ka, neme hataholi fo MANETUALAIN usihenis, leme nusa Kanaan-na, nai lelek hataholi Israel-la masok nusak ndia.

⁴Ahas fe tutunu-hohotuk ma tunu boomenik, nai lamatua daebafak-ka mamana sosongo-tatangon, nai letek-kala, ma nai ai matuaina-la huun-na.

⁵ Nai tepo-lelek ndia, mane Edom-ma, koasa seluk kota Elat-ta, de ana usiheni hataholi Yehuda fo, manaleo lai ndia. Basa boema, hataholi Edom-mala mai, de ala leo lahele nai kota ndia, losa faik ia. Nai tepo-lelek ndia boe, Rezin, fo mane Siria, ma Pekah, fo mane Israel-la, ala sapu, de lakahapi-la, Yerusalem, tehu ala ta sengi Ahas fa.

⁷Ahas nadenu hataholi neu leo Tiglat-Pileser, fo mane Asyur-ra neu, fo nini hala heheluk-ka nde ia: “Au ia, o atam fo manalilinekak; hu ndia de, au dokodoe fo, mai leon-na, fo soi-mala au, neme mane Siria, ma mane Israel-la, te besak ia, ala sapu-la au.”

⁸Ahas ho'i lilopilas, ma lilofulak neme MANETUALAIN Uman dale mai, ma neme uma manek-ka hata-heton mai, de ana fe palsen-nana neu mane Siria ndia.

⁹Mane Tiglat-Pileser-ra, ana sipok Ahas dokodoen-na, de neu sapu-na Damsyik, de natona-nan. Laun-na, nanafook da'di leo hataholi nanafook leo Kir neu, ma ana taonisa manen-na, fo nde Mane Rezin-na.

¹⁰Lelek mane Ahas-sa, neu leo Damsyik neu, fo natongon-no Mane Tiglat-Pileser-ra boema, nita mei tunu-hotuk nai kota ndia. Boema, ana haitua mei tunu-hotuk ndia lupan-na, ma uuku-dodou matetun-na, leo Imam Uria nai Yerusalem.

¹¹Boema, Uria taon-na mei tunu-hotuk esa, sama no ana sipo mei tunu-hotuk-ka, lupan-na, ma uuku-dodoun. Ana tao basa mei tunu-hotuk ndia te, Ahas beita fali ne'u fan.

¹²Ahas fali ma'in neme Damsyik mai, de ana losa boema, nita Uria tao basa mei tunu-hotuk ndia so

¹³Boema, ana tunu-hotu tutunu-hohotu bana, ma tutunu-hohotu gandum, nai mei tunu-hotuk ndia lain. Ana po'a angol nanatunu-hotuk, ma bana tutunu-hohotu mole-dame daa-na, neu mei tunu-hotuk ndia lain boe.

¹⁴ Ahas nita mei tunu-hotuk liti fo, nanafe hehelik neu MANETUALAIN-na, nanape'dak nai MANETUALAIN Uman-na, no mei tunu-hotuk beuk-ka tala'da. Hu ndia de, mei tunu-hotu liti ndia, nanalali heok, neme MANETUALAIN Uman-na uluk mai, fo leo mei tunu-hotuk beun ndia, boboan kii neu.

¹⁵Basa ndia boema, nafa'da Uria nae, “Pake au mei tunu-hotu matuainang ia leona, soaneu tunu tutunu-hohotu fafaik-ka, ma tutunu-hohotu la'odaek-ka, soaneu manek-ka no laun-na, ma po'a laun-na tutunu-hohotuk angol-la, neu ndia. Boema, po'a basa bana fo nanatunu-hotuk-kala daan-na neu mei tunu-hotuk ndia lain boe. Mei tutunu-hohotu liti palaak ndia, nemen-na, fo au paken soaneu oke natutu'duk neme duladalek-kala mai.”

¹⁶Uria tao tunga mane Ahas-sa paletan-na.

¹⁷ Basa boema, Ahas ofeheni kaleta-kaleta liti, fo nanapakek nai MANETUALAIN Uman-na, ma ana pe'da fe'e basa nggusi-la leme kaleta sila-la mai. Ana ho'i-na liti bobongo matuaina, manai sapi liti ka 12-k sila-la muliha'in lain boe, de ana pe'dan neu dii eik lain.

¹⁸Boema, soaneu ho'i mane Asyur-ra dalen-na, de Ahas ofeheni manek-ka pandopo natotongon no laun-na, nai MANETUALAIN Uman-na, de ana kena ketu lelesu hehelik, soaneu manek-ka.

¹⁹Tutui fe'ek la'eneu manek Ahas-sa, nanasulak nai Mane-manek Yehuda-la susula Tutuin dale.

²⁰ Ahas maten, de latoin nai mane-manek manai Kota Dauk-ka mamana loo-laten-na. Boema, anan Hizkia nggatin da'di manek.