Read Termanu 2RAJA-RAJA 17 Bible Online

2RAJA-RAJA 17 - Termanu bible

2RAJA-RAJA 17

¹Manek Ahas-sa paleta Yehuda, neu teu ka 12-na boema, Hosea, fo Ela anan-na, da'di mane Israel, de ana paleta nai Samaria teuk 9 dalen-na

²Ana nasala-nasingo neu MANETUALAIN, tehu sala-singon, ta de'u mane-manek Israel fo, ala paleta lakahuluk-kana, sala-singon-nala fa.

³Salmaneser, fo Asyur manen-na, natee-nata'ti non, de ana sengin, nalosa tunga teuk, ana muse bae bea leo mane Asyur-ra neu.

⁴Tehu nai faik esa boema, Hosea nadenu hataholi neu leo So, fo mane Masir-ra neu, fo noke tutulu-fafalin. Boema, Hosea ta bae bea, tunga teuk leo Asyur neu so'on. Lelek Salmaneser bubuluk, Hosea tatao-nono'in ndia boema, ana ho'un-na Hosea, de ana taon leo bui dale neu.

⁵Basa boema, Salmaneser, fo mane Asyur-ra sapun-na Israel, de nakahapi-na kota Samaria. Nai lelek nakahapi-nan teuk 3,

⁶— fo nai lelek Hosea paleta teuk 9 so — boema Salmaneser natona-na Samaria. Boema, ana foo nini hataholi Israel-la, da'di leo hataholi nanafook leo Asyur leu. Ala fe hataholi Israel nanafook sila-la seli, ala leo lai kota Halah, seli leo deka Lee Habor-ra, nai nusa Gozan-na, ma seli seluk, ala leo lai kota-kota manai nusak Madai-a.

⁷Samaria tu'da, nanahu hataholi Israel-la, lasala-lasingo neu sila MANETUALAIN, fo manasoi-tefa-nalas leme mane Masir-ra mai, de nos kalua leme nusak ndia mai. Ala sene-do'ok neu lamatua daebafak fe'ek-kala,

⁸ma ala tunga ha'da tataok neme leoina, fo MANETUALAIN usi henis nai lelek leoina Israel-la, ala tutulumatak, fo latee-lata'ti loo leoina sila-la. Leoina Israel-la tunga ha'dak, fo mane-manek Israel-la laketuk-ka,

⁹ma ala tao tatao-nono'ik fo, sila MANETUALAIN nape'da dale nasak-kana fa. Ala tao lamatua daebafak-ka, mamana sosongo-tatangon, nai basa sila kotan-nala, nau nai kota ana, do kota matua boe.

¹⁰ Nai basa pupukuk-kala lain, ma nai basa ai matuaina-la huun-na, ala kota batu lutu-la, ma ala tao lamatua daebafa Inak Asyera, dodoki-dudulan.

¹¹Sila boeo tunu boomenik, nai basa mei tunu-hotuk-kala, soaneu lamatua daebafak-ka, sama leo ha'da-tataok leoina, fo MANETUALAIN usi henis leme nusa Kanaan-na mai. Ala sene-do'ok neu sosongo-tatangok, leomae MANETUALAIN kena-ka'i basan so. Basa sila tatao-nono'i mangalaun lala'en-na, tao nafo'a MANETUALAIN nasa melun.

¹²

¹³MANETUALAIN haitua hataholi nadedenuk, ma nabin-nala, leo hataholi Israel-la, ma hataholi Yehuda-la neu, fo landuku-lalosak hala nasanene'dak-ka nde ia nae: “Hahae tao tatao-nono'i mangalauk leona, fo tunga basa paleta ma hoholo-lalanek, fo Au fen neu emi bai-ba'ikaim-mala, ma neu emi, tunga basa nabi-la, fo Au atang sila-la.”

¹⁴Tehu, Israel ma Yehuda, ta nau lamanene fa. Lalanga batu, sama leo sila bei-ba'ikain-nala, fo ta lemahele neu sila MANETUALAIN fa.

¹⁵Israel ma Yehuda, ta nau tunga MANETUALAIN paletan-nala, ma ta lilineka neu hehelu-balataak, fo Ana tao basan no sila bei-ba'ikain-nala fa. Ala ta taoafik neu kekena-kaka'in fa, tehu ala songo neu sosongo-tatangok, sosoa-ndandaa taak-ka, nalosa sila boeo, da'di sosoa-ndandaa taak. Ala tunga leoina manai sila boboan kaisun-nala, ei tata'bun-na, leomae MANETUALAIN kena-ka'i basan so.

¹⁶ Ala la'olena sila MANETUALAIN hoholo-lalanen lala'en-na, de ala tao-la sapi dua neme liti-a mai, fo ala sene-do'ok neun. Ala tao lamatua daebafa Inak Asyera, dodoki-dudulan, ala sene-do'ok neu nduuk-kala, ma ala sene-do'ok neu Lamatua Daebafak Baal-la.

¹⁷ Ala tunu-hotu anan-nala, da'di leo tutunu-hohotu nanatunuk, soaneu lamatua daebafak-ka. Ala pake malela makahatuk, ma loke natutu'duk leme hataholi malelak, fo latuti-lanatok loo dula dalek-kala. Ala manggate lanseli, no tao-no'i tatao-nono'ik, fo ta tao namahoko MANETUALAIN dalen-na fa,

¹⁸nalosa Manetualain namanasas nanseli, ma Ana ta taoafik-kasa so'on, Ana tu'u-tapa henis, neme Ana fes dae-a mai; de ela ka'da nusa Yehuda.

¹⁹Hataholi Yehuda-la boeo, ta tunga sila MANETUALAIN hoholo-lalanen-nala fa. Ala tunga hataholi Israel-la, ha'da-tataon,

²⁰boema MANETUALAIN ta manaku basa hataholi Israel-la lala'en-na so'on. Ana hukus, ma ana fes leo sila musu-musun, fo ha'da hataholi taak-kala neu. Ana ta taoafik-kasa so'on, de Ana tu'u-tapa henis, neme Ana fes dae-a mai.

²¹MANETUALAIN ta'da fe'e hataholi Israel-la, neme Yehuda-la mai boema, hataholi Israel-la so'u Yerobeam, fo Nebat anan-na, da'di sila manen. Boema, Yerobeam taon-nalas la'oela MANETUALAIN, boema ala tao sala-singo matuaina.

²²Ala tunga Yerobeam ha'da-tataon, de ala tao lahele basa sala-singok, fo Yerobeam tao-no'in-nana,

²³nalosa mate'ena, MANETUALAIN ta taoafik-kasa so'on, de Ana usi henis leme Ana fes dae-a mai. Manada'dik ndia, ana da'di, fo nandaa no MANETUALAIN fes nasanene'dak, tunga atan-nala, fo nde basa nabi-la. Leondiak, hataholi Israel-la, nanafook leo mamana ookak-ka nai Asyur neu, de ala leo lain ndia losa faik ia.

²⁴Fo mananggati hataholi Israel, fo nanafoo basak leo mamana ookak-ka neu ndia, de mane Asyur-ra fe hataholi leo nai kota-kota manai Samaria, de ana ho'i hataholi neme Babel, Kuta, Awa, Hamat, ma Sefarwaim. Hataholi sila, langatuu-la kota sila-la, de ala leo lahele leme ndia.

²⁵Nai lelek, ala leo makasososa lai ndia, ala ta fe ha'da-holomata neu MANETUALAIN fa; hu ndia de, MANETUALAIN fe meoasu-la mai, fo ala kaa-la, sila hataholin-nala seli.

²⁶Boema, hataholi nafa'da mane Asyur-ra nae, hataholi fo, manaleo manai kota-kota Samaria, ta lalelak nusak ndia, lamatua daebafan-na, hoholo-lalanen-nala fa. Hu ndia de, lamatua daebafak-ka, fe meoasu-la mai, fo ala kaa-lalas.

²⁷Hu ndia de, mane Asyur-ra fe paleta, fo ela ladenu falik imam esa, leo Samaria neu. Imam manafalik ndia, ho'in neme hataholi nanafook, fo nanatapak leo Asyur leo Samaria neu. Manek-ka nae, “Madenun fali, fo ana leo neme ndia, fo ela nanoli hataholi sila-la, la'eneu nusak ndia lamatua daebafan-na hoholo-lalanen-nala.”

²⁸Boema ladenu falik iman Israel esa, fo imam dia nanafoo basak neme Samaria leo Asyur neu, de ana leo nai Betel. Nai naa, nanoli laun-na tao leo beek, fo muse sene-do'ok neu MANETUALAIN.

²⁹Tehu, hataholi manaleo manai Samaria sila-la, ala tao lahele sila sosongo-tatango mesan-na, de ala pe'dan nai, uma sosongok fo makahulun-na, hataholi Israel manaleo manai kota ndia, tao uma sosongok-ka. Bubuak esan-na, tao sosongo-tatangon nai kota fo ala leok-ka.

³⁰Hataholi Babel-la, tao Lamatua-Daebafak Sukot-Benot-ta, dodoki-dudulan, hataholi Kuta-la, tao Nergal dodoki-dudulan, hataholi Hamat-tala, tao Asima dodoki-dudulan,

³¹hataholi Awa-la, tao Nibhas dodoki-dudulan, ma Tartak dodoki-dudulan, ma hataholi Sefarwaim-mala, tunu-hotu anan-nala, da'di leo tutunu-hohotu nanatunuk, fe Lamatua Daebafak Adramelekh, ma Anamelekh.

³²Fe'ek neme sene-do'ok neu lamatua daebafak-kala, sila boeo, sene-do'ok neu MANETUALAIN. Ala hele sila hataholi mata-matak-kala, fo lalalau-laoono, da'di leo imam, fo tunu-hotu tutunu-hohotuk nai uma sosongok-kala dalek.

³³Da'di, ala sene-do'ok neu MANETUALAIN, tehu ala sene-do'ok neu sila lamatua daebafan-nala, nandaa no sila nusa fua funi-ndalu sita-na, ha'dan-na.

³⁴ Losa faik ia, ala bei pake lahele sila ha'dan ndia. Ala ta maso-kasasi neu MANETUALAIN, ma ala ta tunga hoholo-lalanen, ma paletan fo Ana fen neu Yakob tititi-nonosin. Yakob, fo Ana foin na'de Israel boe.

³⁵ MANETUALAIN tao basa hehelu-balataak no hataholi Israel-la, nde ia nae, “Boso hule-haladoi neu lamatua fe'ek-kala; boso sene-do'ok neus, do malalau-maoonos, do fe tutunu-hohotuk neus.

³⁶ Fe ha'da-holomata neu Au, MANETUALAIN fo no basa emi, kalua neme Masir mai, nenik koasa matuaina; sene-do'ok neu Au, ma tunu-hotu tutunu-hohotuk fe Au.

³⁷Tunga Au hoholo-lalaneng tataas esa, ma paleta-paleta fo Au sulak basan, soaneu emi so. Boso hule-haladoi neu lamatua fe'ek-kala,

³⁸ma boso mafandele heni hehelu-balataak, fo neme Au o emi-a.

³⁹Tunga Au, fo emi Aman Manetualaim-ma, soona neukose, Au po'i emi neme emi musum-mala mai.”

⁴⁰Tehu, Samaria laun sila-la, ala ta nau lamanene fa; ala ho'u lahele sila ha'dan-na.

⁴¹Da'di, ala sene-do'ok neu MANETUALAIN, tehu ala sene-do'ok neu sila sosongo-tatangon boe. Losa faik ia boe, sila tititi-nonosin bei tao tataos ndia.