Read Termanu 2RAJA-RAJA 2 Bible Online

2RAJA-RAJA 2 - Termanu bible

2RAJA-RAJA 2

¹Fain-na losa, fo MANETUALAIN sanga so'u Elia leo nusa so'dak-ka neu, nenik ani kutus-sa. Lelek ndia, Elia ma Elisa la'ok leme Gilgal mai,

²de nai eno tala'dak, Elia nafa'da Elisa nae, “Mahele neme ia, te MANETUALAIN nadenu au u leo Betel u.” Tehu Elisa nataa nae, “No MANETUALAIN fo maso'dak-ka na'den-na, ma no Ama samanen-na, neukose au ta la'oela Ama fa.” Da'di, duas la'ok lakandoo leo Betel leu.

³Nabi bubuak esa, ala leo lai ndia, de leu latongo loo Elisa, boema latane lae, “Ade, o bubuluk faik ia, o tuam-ma, neukose ana la'o ela o, nanahu MANETUALAIN so'un leo nusa so'dak-ka neu do ta?” Boema Elisa nataa nae, “Hei au bubuluk, tehu le'on-na leona, ata boso kokolak dede'ak ndia.”

⁴Basa boema, Elia nafa'da Elisa nae, “Mahele neme ia, te MANETUALAIN nadenu au u leo Yerikho u.” Tehu Elisa nataa nae, “No MANETUALAIN fo maso'dak-ka na'den-na, ma Ama samanen-na, neukose au ta la'o ela Ama fa.” Da'di duas la'ok lakandoo leo Yerikho leu.

⁵Nabi bubuak esa, ala leo lai ndia, de leu latongo loo Elisa, boema latane lae, “Ade, o bubuluk nai faik ia, o tuam-ma, neukose ana la'o ela o, nanahu Manetualain so'un leo nusa so'dak-ka neu do ta?” Elisa nataa nae, “Hei, au bubuluk, tehu le'on-na leona, ata boso kokolak dede'ak ndia.”

⁶Basa boema, Elia nafa'da Elisa nae, “Mahele neme ia, te MANETUALAIN nadenu au u Lee Yarden-na u.” Tehu Elisa nataa nae, “No MANETUALAIN, fo maso'dak-ka na'den-na, ma Ama samanen-na, au ta la'o ela Ama fa.” Boema, duas la'ok lakandoo Lee Yarden-na leu,

⁷de nabi 50 tunga duas. Boema, Elia ma Elisa late'e leme lee su'un-na, ma nabi ka limahuluk sila-la, lapadeik ta dook-ka leme duas mai fa.

⁸Boema, Elia o'du heni ba'du manalun-na, boema ana dikun, de ana fepan neu lee ndia oen lain. Boema, oe ndia natasi'da neu dua, de nalosa Elia ma Elisa la'ok lai dae ma'dak lain.

⁹ Ala losa lee selik boema, Elia nafa'da Elisa nae, “Moke hata fo, o mahiik-kana neme au mai leona, beidai MANETUALAIN beita so'u au, fo au la'oela o fa!” Boema Elisa nataa nae, “Makona Ama koasan-na leo au mai, fo ela au nggati Ama.”

¹⁰Boema Elia nataa nae, “Waa, dede'ak ndia tean-na seli. Tehu, metema o mita au, nai lelek MANETUALAIN so'u au soona, neukose o nonoken ndia, au tao natetun. Metema, o ta mita fa soona, neukose o nonoken ndia, au ta tao atetu fan.”

¹¹Duas beela'o, ma beekola lakandoo. No kaiboik, ndala maha'ik-ka, ana hela kaleta maha'ik esa mai, de ana si'da ba'e duas, boema ani kutus-sa so'u neni Elia leo nusa so'dak-ka neu.

¹² Elisa nitan boema, naloo bou-bou nae, “Elia, fo au Amang-ngonei! Manamasulu-mahapa Israel, fo makadelek! Ama tak-kana so!.” Boema, Elia mopok-kana, de Elisa ta nitan so'on. No dale he'dik, Elisa sii ba'e ba'du manalun-na neu dua,

¹³boema, ana helen-na, Elia ba'du manalun fo, manatu'da mai ndia. Basa ndia boema, ana fali ma'in, de napadeik neu Lee Yarden-na su'un-na,

¹⁴boema ana fepa Elia ba'du manalun ndia, neu oe lain, ma nafa'da nae, “Amak, fo Elia MANETUALAIN ndia, nai bee?” Basa ndia boema, ana fepa ba'du manalu ndia, neu lee oen lain, de oe ndia natasi'da neu dua, de ana la'ok leo selik neu.

¹⁵Nabi ka limahuluk, fo manai Yerikho sila-la, litan boema, lafa'da lae, “Elia koasan-na, lali leo Elisa neu so!” Boema, ala mai, de ala senek leu matan-na,

¹⁶ma lae, “Ami hataholi 50, balakaik mesa-mesan. Hu ndia de, mai fo, ata teu sanga o tuam Elia. Te fafa'kama, MANETUALAIN Duladalen-na, non leo letek, do bafak neu, de Ana la'o elan neme ndia.” Boema, Elisa nataa nae, “Nemen-na!”

¹⁷Tehu, ka'da lakaseti lakandoo, nalosa Elisa nakaheik. Boema nabi ka limahuluk sila-la, leu sanga Elia faik telu dalen-na, tehu ala ta hapu fan.

¹⁸Boema, ala fali ma'is leo Elisa mai, te bei nahani nai Yerikho. Boema, Elisa nafa'das nae, “Ade, au beita afa'da ae boso meu fa do?”

¹⁹Hataholi de'ubee leme Yerikho, mai leo Elisa mai, de lafa'dan lae, “Ama, sama leo Ama mita matan, kota ia malole, tehu oen-na ta malole fa, de ana inak-kailus-sala, ala kalaheni heni anan-nala.”

²⁰Boema, Elisa nae, “Ho'i-ma mango bei beuk esa, fo tao masik leo dalek neu.” Boema, leni fen mango fo noken ndia.

²¹Boema, Elisa neu leo oemata neu, de ana nggali masik ndia, leo oe dale neu ma nae, “MANETUALAIN nafa'dak-ka nde ia, ‘Au tao alalao oe ia, fo ela ana boso boe neni mamates do kalahenik bai!’ ”

²²Mulai neme ndia mai-a, oe ndia malalaok, nandaa no Elisa hala kokolan-na.

²³Basa ndia boema, Elisa la'o neme Yerikho leo Betel neu. Nai enok tala'dak, ni'iana bubuak esa, ala kalua leme kota dale mai, de ala hakinonolin lae, “Hai, langa dilak, langa dilak, la'o ela mamanak ia leona!” Ni'iana sila-la, ala nggasi lae leondia.

²⁴Elisa lipa leo dea neu, de nakanaes, boema ana soo-supas nenik MANETUALAIN na'den-na. No hatematak ndia boe, meoasu ina dua, ala kalua leme nula dale mai, de ala sii-sii lulu'i ni'iana 42, neme ni'iana makadotok sila-la mai.

²⁵Elisa la'ok nakandoo leo Lete Karmel-la neu, de basa boema, ana fali ne'un leo Samaria neu.