Read Termanu 2RAJA-RAJA 20 Bible Online

2RAJA-RAJA 20 - Termanu bible

2RAJA-RAJA 20

¹Nai lelek ndia boe, Manek Hizkia hapu he'di bisunggumak mabeilaina, nalosa isabai-na maten. Nabi Yesaya, fo Amos anan-na neu donge-daman, de nafa'dan nae, “MANETUALAIN helu, fo ela Ama Manek tao makababasak, basa ito-atok lala'en-na, nana Ama Manek neukose ta lea-hai fa. Ta dook-ka so'on te, neukose mate Ama Manek so.”

²Boema, Hizkia lepos leo papala nanadamak-ka neu, de ana hule-haladoi nae,

³“MANETUALAIN, mafandendelek te, au ia aso'da nai O matam, no lilinekak ma dale ndoos. Au sanga enok tataas esa, fo tunga O hihii-nanaun.” Boema, Hizkia kii no dale he'dik.

⁴Yesaya la'oela Hizkia, tehu ana beita kalua neme uma manek-ka, so'da tala'dak-ka mai fa te, MANETUALAIN nadenun

⁵fali leo Hizkia, fo MANETUALAIN anan-nala manen-na, fo nanduku-nalosak hala heheluk-ka nde ia, “Au, MANETUALAIN, fo o bei-ba'i kaim Dauk, sene-do'ok-ka. Au amanene o huhule-haladoim, ma Au ita basa, o luu oe-ma so. Neukose, Au tao alea-ahai o; binesak te, neukose o muu leo Au Umang muu.

⁶Neukose, Au popo-tama seluk teuk 15 neu o teum-ma. Neukose Au soi-po'i o, ma kota Yerusalem-ma, neme mane Asyur-ra mai. Neukose, Au asalu-ahapa kota ia, hu kande Au na'deng-nga, ma hu kande Au hehelu-balataang no Au atang Dauk.”

⁷Boema, Yesaya nadenu hataholi-la kekenok kaa boak, fo losen neu manek-ka bisungguman-na, fo ela ana lae hai.

⁸Boema, Manek Hizkia natane nae, “Ade, ta'du-tanan nde bee, fo nae neukose MANETUALAIN tao nalea-nahai au, ma nae binesak soona, neukose au bisa u leo MANETUALAIN Uman-na u?”

⁹Yesaya nataa nae, “Neukose, MANETUALAIN fe Ama Manek ta'du-tana, nae Ana tao natetu, hala hehelun-na. Besak ia, bee kande, Ama Manek nahiik-kana: le'do-a salaon-na, nai dii fo Manek Ahas-sa taok-ka, ana tutulumatak nggani eik 10, do nakadedeak, nggani eik 10?”

¹⁰Hizkia nafa'da nae, “Soaneu taon-na salaok ndia, ana tutulumatak nggani eik 10, ndofok-ka. Hu ndia de, fen nakadedeak nggani eik 10.”

¹¹Boema, Yesaya hule-haladoi neu MANETUALAIN, de MANETUALAIN fe salaok ndia, nakadedeak nggani eik 10, nai le'do-a natu'du li'un ndia.

¹²Nai lelek ndia boe, manek Babel-la, fo nde Merodakh-Baladan, fo Baladan anan-na, namanene manek Hizkia, besak-ka lea-hai neme he'dis-sa mai so. Boema, nadenu hataholi, nini fe Hizkia susulak, ma bua palsen.

¹³Hizkia sipok hataholi nadedenuk sila-la, de natu'dus basa su'i-beten lala'en-na, fo nde lilopilas ma lilofulak, bumbu-bumbu, ma mina kaboomenik, ma basa solda'du-la, tafa-sisilon lala'en-na. Ta hapu hata esa boen, nai uma manek-ka, ma nai basa nusa-na lala'en-na, fo ta natu'du neu fas.

¹⁴Basa boema, Nabi Yesaya neu leo Manek Hizkia neu, de natanen nae, “Hataholi sila-la, leme bee mai? Lafa'da beek?” Hizkia nataa nae, “Hataholi sila leme Babel, fo nusa dook mai.”

¹⁵Boema Yesaya natane seluk nae, “Lita beek, nai uma manek-ka?” Hizkia nataa nae, “Lita basa-basan lala'en-na. Au atu'dus basa hata lala'en, fo nanape'dak nai uma manek dale.”

¹⁶Boema, Yesaya nafa'da manek-ka nae, “MANETUALAIN nafa'da nae,

¹⁷ neukose fain-na losa, basa su'i-betes manai o uma manem-ma dalek, ma o bei-ba'i kaim-mala lakanduduluk basak-kala losa faik ia, ho'i lenis leo Babel neu. Neukose, ta la'oela esa boen.

¹⁸ Neukose loo o upu-anam nggelok, fo ala taos da'di hataholi mana'a ngga'di nai uma manek-ka, fo lalalau-laoonong manek Babel-la.”

¹⁹Boema, Manek Hizkia nataa nae, “MANETUALAIN hala hehelun, fo o manduku-malosak-kana neu au-a, malole boe.” Hizkia nataa nae leondia nanahu, ana dodoo nae, “Sa'di au nusang-nga, nee-nee lino-linok nahele, ma mole-dame, nai lelek au bei aso'da.”

²⁰Tutu'i fe'ek la'eneu manek Hizkia, la'eneu tatao-nono'i malolen-na neme palani ta'ti batun-na mai, ma tao leo beek de, ana tao lifu ma oelolok, fo oe-a faa leo kota dale neu, basa-basan nanasulak, nai Mane-manek Yehuda-la, susula Tutu'in dale.

²¹Mate Hizkia boema, anan Manasye nggatin da'di manek.