Read Termanu 2RAJA-RAJA 21 Bible Online

2RAJA-RAJA 21 - Termanu bible

2RAJA-RAJA 21

¹Manasye teun 12, nai lelek ana da'di manek Yehuda, de ana paleta nai Yerusalem, teuk 15 dalen-na. Inan na'de, Hefzibah.

² Manasye nasala-nasingo neu MANETUALAIN, nanahu ana tunga ha'da-tatao mangalauk-ka, neme leoina fo MANETUALAIN usihenis leme Kanaan mai, nai lelek, hataholi Israel-la masok nusak ndia.

³Aman Hizkia, tao nakalulutuk lamatua daebafak-ka mamana sosongo-tatangon-nala, ana nafofo'a falik-kasa. Ana tao mei tunu-hotuk, fo ana sene-do'ok neu Baal, ma ana tao Lamatua Daebafak Inak Asyera, dodoki-dudulan, sama leo Ahab, fo manek Israel-la tao-ka. Manasye sene-do'ok neu nduuk-kala boe.

⁴ MANETUALAIN nafa'da basa, nae Yerusalem nde been-na, mamanak fo, Ana tao na'den-na nai ndia, ma mamanak makaluku-makatele neun, tehu nai naa, fo nai MANETUALAIN Uman, Manasye tao fe lamatua daebafak-kala, mei tunu-hotuk so.

⁵Ana tao mei tunu-hotuk, nai MANETUALAIN Uman ndia, so'dan 2, fo ana sene-do'ok neu nduuk-kala.

⁶Ana tunu-hotu anan-na, da'di leo tutunu-hohotuk nanatunuk. Manasye boeo, ana tao tunga hataholi malelak-kala, manasiula-tongonok-kala tatao-nono'in, ma noke natutu'duk neme dula dalek-kala mai. Nasala-nasingo nanseli neu MANETUALAIN, nalosa ana tao nafo'a nasa-melun.

⁷ Ana tao lamatua daebafak Inak Asyera, dodoki-dudulan nai MANETUALAIN Uman dale, te se'kona, MANETUALAIN nafa'da basan neu Dauk, ma anamanen Salomo, la'eneu mamanak ndia nae, “Au hele basa Au Umang-nga, ma kota Yerusalem ia, nai leo Israel-la, nusa ka 12-nala dalek, nde been-na, mamanak fo Au aketun, da'di leo mamana makaluku-makatele neu Au.

⁸Ma metema, hataholi Israel-la tunga basa Au paletang-ngala, ma tunga hoholo-lalanek, fo Au atang Musa fen neu sila, soona neukose Au ta po'ilotak sila nanausi henik neme nusak, fo Au fe basan neu sila bei-ba'i kain-nala so.”

⁹Tehu, hataholi Yehuda-la ta tunga MANETUALAIN fa, ma nakalenak, hu kande Manasye, de ala tao sala-singok, fo mangalaun-na lena heni sala-singok fo nanatao-no'ik neme leoina fo, MANETUALAIN usi henis leme Kanaan mai, nai lelek hataholi Israel-la masok kota ndia.

¹⁰Hu ndia de, MANETUALAIN kokolak tunga basa nabi-nabi, fo atan-nala nae,

¹¹“Manek Manasye-a mangalauk nanseli. Tatao-nono'in mangalauk nanseli, lena heni hataholi Kanaan-nala tatao-nono'in. Hu kande, ana taon-na sosongo-tatangok-kala, de ana taon-na hataholi Yehuda-la, lasala-lasingo.

¹²Hu ndia de, Au, fo MANETUALAIN, fo hataholi Israel-la sene-do'ok-ka, neukose fe soe matuaina neu Yerusalem ma Yehuda, nalosa hataholi see, namanene soe ndia soona, neukose ana nggenge-la.

¹³Neukose Au huku Yerusalem, sama leo Au huku Samaria ma Ahab, fo manek Israel-la, no tititi-nonosin-nala. Neukose, Au sapu balisi Yerusalem, sama leo safe pingak-ka dea-dalen.

¹⁴Neukose, Au po'ilotak laun fo bei ela kala, da'di musun-nala nana'an-na, fo neukose, musu-a namanako ma kalo nusan-na.

¹⁵Neukose, Au tao basa sila-la soaneu Au anang-ngala, nanahu lasala-lasingo neu Au, ma ala tao lafo'a Au nasa-melung, nai lelek sila bei-ba'i kain-nala kalua leme Masir mai, losa faik ia.”

¹⁶Fe'ek neme ana taon-na, hataholi Yehuda-la lasala-lasingo neu MANETUALAIN, nenik ala sene-do'ok neu sosongo-tatangok-ka, Manasye boeo, ana taonisa hataholi sala tak makadotok nanseli, nalosa nai Yerusalem, daak-ka faa su'di leo bee neu.

¹⁷Tutui fe'ek la'eneu Manek Manasye, ma la'eneu ana tao sala-singok-kala, nanasulak nai Mane-manek Yehuda-la, susula Tutuin dale.

¹⁸Manasye maten de, latoin nai uma manek-ka osin dale, fo nde osi Uza. De anamanen Amon, nggatin da'di manek.

¹⁹Amon teun 22, nai lelek ana da'di manek Yehuda, de ana paleta nai Yerusalem, teuk 2 dalen-na. Inan na'de, Mesulemet fo Harus hataholi Yotba ndia, anan-na.

²⁰Sama leo aman boe, de ndia boeo nasala-nasingo neu MANETUALAIN.

²¹Ana nana dulak neme aman tatao-nono'in mai, de ana sene-do'ok neu sosongo-tatangok, fo aman sene-do'ok-ka.

²²Ana ta naso'da tunga MANETUALAIN hihii-nanaun fa, nakalenak, ana ta tunga MANETUALAIN, fo bei-ba'i kain-nala sene-do'ok-ka fa.

²³Manek Amon-na, hataholi mana'a ngga'din-nala, ala tao nakabua makahatuk, fo ala la'ban-nana, de ala taolisan neme uma manek-ka.

²⁴Tehu, laun Yehuda-la, ala taolisa hataholi manataonisa Mane Amon ndia, boema ala so'u anan Yosia, da'di manek.

²⁵Tutui fe'ek la'eneu Manek Amon-na, nanasulak nai Mane-manek Yehuda-la, susula Tutuin dale.

²⁶Latoi Amon nai mamana loo-lates manai osi Uza dalek. De anan Yosia nggatin da'di manek.