Read Termanu 2RAJA-RAJA 23 Bible Online

2RAJA-RAJA 23 - Termanu bible

2RAJA-RAJA 23

¹Manek Yosia, naloo basa mauli-malangan Yehuda-la ma Yerusalem-mala.

²Boema ana la'o sama-sama nos, leo MANETUALAIN Uman neu, ma basa imam-mala, basa nabi-la, ma basa laun-nala lala'en-na, nau nuu-taa hata-taak, do kamasu'i-makabetek boe, fo ala tungas. Boema, manek-ka napadeik neu sila basa-basas matan, fo deka no dii nanadama hehelik, soaneu manek-ka, de ana lees napane'e, susula hehelu-balataak, fo hapun neme MANETUALAIN Uman dale-a, isi-liin. Basa boema, manek-ka tao hehelu-balataak no MANETUALAIN, fo ana tungan, ma nakalala'ok basa MANETUALAIN paletan-na, ma hoholo-lalanen-nala, no dalek-katema tuak, ma no basa aopaa-samanen. Manek-ka boeo naheluk, fo ana tao natetu MANETUALAIN hehelu-balataan no anan-nala, eno-dalan, fo nanasulak nai susulak ndia dalek. Basa laun-na lala'en-na boeo, laheluk, fo ala tunga hehelu-halataak ndia.

⁴Basa ndia boema, manek-ka paleta Imam Manai lain-na, fo Hilkia, basa imam manai Hilkia dae, ma basa manamanea MANETUALAIN Uman-na lelesun-na, fo daenga ala kalua heni basa bua-lo'as fo, ala paken soaneu ala sene-do'ok neu Baal-la, neu lamatua daebafa inak Asyera, ma nduuk-kala, neme uma ndia dalek mai. Manek Yosia hotu heni basa bua-lo'as sila-la, neme kota deak, fo deka no Bafak Kidron-na, boema ana hulu nini afun-na, de ninin leo Betel neu.

⁵Ana kalua heni basa manek Yehuda-la, so'u imam-imam fo, lalalau-laoono nai mamana sosongo-tatangok neu lamatua daebafak-ka, nai kota-kota Yehuda-la, ma Yerusalem titia-tatain-nala; boeo basa imam-imam, fo manatunu-hotu, tutunu-hohotuk fe Baal-la, le'do-a, bulak-ka, hata manai lalai-la, ma nduuk-kala.

⁶Ana kalua heni Lamatua Daebafa Inak Asyera, dodoki-dudulan neme MANETUALAIN Uman dale mai, de nenis leo kota deak neu, fo leo Bafak Kidron-na neu. Ana hotu heni dodoki-dudulak sila-la, neme Bafak Kidron-na, boema ana pau ha'i kaan-na, de sopuanak, boema ana nggali afun-na leo laun-nala mamana loo-laten neu.

⁷Kama-kama manai MANETUALAIN Uman, fo ina manasosoa-piaok manai uma sosongo-tatangok-ka paken, soaneu ala sosoa-piao, da'di leo sene-do'ok esa neu lamatua daebafak-ka, ana tao nakalulutuk la'iesak-kasa. (Nai kama sila-la dalek, nde inak sila-la tenu-henge temak, fo ala paken, nai lelek ala sene-do'ok neu lamatua daebafa inak Asyera)

⁸Yosia nadenu basa imam, manaleo manai kota-kota Yehuda-la, fo ala mai leo Yerusalem mai, boema ana tao nanggengeo lamatua daebafak-ka, mei tunu-hotun-nala, su'di nai mamanak bee boe, ma nai basa nusa Yehuda lala'en-na, fo nai bee, imam sila-la tunu-hotu, tutunu-hohotuk so. Imam sila-la, ta bole tao makaluku-makatele nai MANETUALAIN Uman-na fa. Tehu, ala bole la'a loti, fo ta pake laluteik, fo nanasadiak soaneu sila nonoon-nala. Ana tao nakalulutuk, basa mei tunu-hotuk, fo nanasadiak soaneu sene-do'ok neu lamatua daebafak-ka. Mei tutunu-hohotuk sila-la, deka lo Lelesuina Yosua, fo nusak ndia walikota-na. Lelesuina ndia, nai Lelesuina Makasososak-ka, boboan kii, fo nai enok manamasok leo kota dale neu-a.

⁹

¹⁰ Ana tao nanggenggeo Tofet, fo mamanak sene-do'ok neu lamatua daebafak, manai Bafak Hinom-ma. No enok ndia, ta hapu seluk hataholi, fo ana tunu-hotu anan-na, da'di leo tutunu-hohotu nanatunuk, soaneu Lamatua Daebafak Molokh-ka so'on.

¹¹Ana tu'u-tapa heni, basa ndala fo mane-manek Yehuda-la sadian, soaneu sene-do'ok neu le'do-a, ma ana hotu heni basa kaleta-kaleta fo ala paken nai sene-do'ok ndia dalek-ka. (Kaleta sila-la, lai MANETUALAIN Uman-na so'dan-na — deka no lelesuina — ta dook-ka neme kama-kama fo Natan Melekh hataholi mana'a ngga'di manai lain esa, mamana leleon-na.)

¹² Ana tao nakalulutuk basa mei tunu-hotuk, fo mane-manek Yehuda-la lapadedei-kasa, lai Manek Ahas-sa kama hahaeaon-na, lain. Yosia tao nakalulutuk Mane Manasye-a, napadedeik-na basa mei tunu-hotuk, manai MANETUALAIN Uman-na, so'dan duas boe, de ana tapa henis leo Bafak Kidron-na neu.

¹³ Boeo, ana tao nanggenggeo basa mei tunu-hotuk manai Yerusalem boboan dulu, fo nai Pupukuk Mangalauk-ka boboan kona. Mane Salomo-a, tao mei tutunu-hohotuk sila-la, fo ana sene-do'ok neu lamatua daebafak nanamaluak ndia — fo nde Asytoret, fo leoina Sidon-na, lamatua inan-na, Kamos, fo leoina Moab-pa, lamatua daebafan-na, ma Milkom, fo leoina Amon-na, lamatua daebafan-na.

¹⁴Ana tao natu'u lamatua daebafak-kala batu lutun-nala, ma lamatua daebafa inak Asyera, dodoki-dudulan, boema dae, fo nai bee, batu lutu ma dodoki-dudulak sila-la lapadeik-ka, Yosia nakadofu ketun nenik, hataholi-la duin-nala.

¹⁵ Yosia boeo, ana tao nalutu mamana sene-do'ok manai Betel-la. Mane Yerobeam, fo Nebat anan-na, nde napadedeik-kana-manek fo, manataon-na hataholi Israel-la lasala-lasingo so. Boema, Yosia tao naba'e mei tunu-hotuk, fo mamana sene-do'ok ndia, de ana hotu henin, sama-sama no lamatua daebafa inak Asyera, dodoki-dudulan, neme ndia.

¹⁶ Basa boema, Yosia lipa leo dea neu, de nita lates de'ubee lai letek lain. Boema, nadenu hataholi, fo neu ofe heni lates sila-la, fo ana su-nala dui-kalun, fo ana hotus neu mei tunu-hotuk fo, bei manapila lo'a-lo'ak ndia lain. Ana tao nanggenggeo mei tunu-hotuk sila-la, eno-dalan leondiak. Boema hata fo, makahulun-na MANETUALAIN nabin-nala lafa'da elak-ka, ana da'di, fo nai lelek Manek Yerobeam-ma, bei napadeik deka no mei tunu-hotuk ndia, la'e fai malole esa. Basa ndia boema, Manek Yosia, nita late fe'ek esa seluk.

¹⁷ Boema, natane nae, “See laten ia?” Hataholi Betel-la lataa lae, “MANETUALAIN nabin esa, neme Yehuda mai, laten ndia, fo ana mai hai neme ia so, de nafa'da ela, basa dede'ak fo, besak-ka Ama Manek taon soaneu mei tunu-hotuk ia.”

¹⁸Boema, Manek-ka fe paleta nae, “Boso meu ngganggama lates ndia. Nemen-na, fo dui-kalun leme ndia, fo boso meu pe'das leo mamana fe'ek neu!” Boema, ta leu lafangganggama nabi fo manamaik neme Yehuda ndia mai, dui-kalun, ma nabi manamaik neme Samaria mai, de latoin nai ndia boe. Ta lafangganggama dui-kalun fa.

¹⁹Mane Yosia, tao natu'u basa mane-manek Israel-la, tao mamanak-kala nai basa kota-kota manai Israel-la, fo ala sene-do'ok neu lamatua daebafak-ka, fo manataon-na MANETUALAIN da'di namanasa so. Hata fo Mane Yosia taon nai Betel-la, ana taon neu basa mei tunu-hotuk manai Israel-lala'en-na boe.

²⁰Basa imam-imam, fo lalalau-laoono nai mamana sene-do'ok neu lamatua daebafak-ka, ana taonisas lai sila lalalau-laoonon nai mei tunu-hotuk-kala, lain. Ma Yosia hotu hataholi-la dui-kalun, nai mei tunu-hotuk sila-la lain. Basa ndia boema, ana fali ne'un leo Yerusalem neu.

²¹Basa boema, Mane Yosia paleta laun-na, fo ala tao feta Paskah, sama leo nanasulak nai susula Hehelu-balataak no MANETUALAIN-na dalek. No enok ndia, ala fe ha'da-holomata neu sila Aman, MANETUALAIN.

²²Neme tepo-lelek fo, palani ta'ti batu-la paleta leoina Israel-la, beita hapu manek Israel, do manek Yehuda esa boen, tao hai feta Paskah fo sama-na leondiak fa.

²³Ka'da nai Yosia paleta neu teu ka 18-na, besak-ka ala tao seluk feta Paskah nai Yerusalem, fo ala fe ha'da-holomata neu MANETUALAIN.

²⁴Soaneu lakalala'ok hoholo-lalanek, fo nanasulak nai susulak fo Imam Matuaina Hilkia hapun neme MANETUALAIN Uman dale-a, de Mane Yosia usi heni basa hataholi manamaloo samanek-kala, hataholi manasiula-tongonok-kala leme Yerusalem, ma leme Yehuda lala'en-na mai, boema ana tapa heni, basa lamatua daebafak-ka, sosongo-tatangon manai uma loo-la dalek, ma bua-lo'as fo ala paken, soaneu sene-do'ok neu lamatua daebafak-ka.

²⁵Beita hapu manek sama leo Manek Yosia fa, fo no dale katematuan-na, ana fe so'dan-na neu MANETUALAIN, de natu'dun nai heheo-hihilun, ma tatao-nono'in-na dalek, nandaa no basa hoholo-lalanek manai Musa Susulan-na dalek. Basa Mane Yosia tepo-lelen boema, ta hapu seluk manek, fo sama-na leondiak fa.

²⁶Tehu Mane Manasye-a, tatao-nono'in, tao nafo'a MANETUALAIN nasa-melun, la'eneu Yehuda; de nasa-melun ndia, beita tenak fa.

²⁷Boema, MANETUALAIN nafa'da nae, “Au ta basa hata, soaneu Israel so, neukose Au taon soaneu Yehuda boe. Neukose, Au tu'u-tapa heni hataholi Yehuda-la, leme nusak fo Au fen neu sila. Neukose, Au ta sipok Yerusalem, kota fo Au hehek-ka fa, ma Au umang ia boe, ana da'di mamana huhule-haladoik ba'eneu Au.”

²⁸Mane Yosia maten nai natee-natatik dale, neme Megido, fo nai lelek ndia, neu natee-nata'ti no Nekho, fo mane Masir-ra, ndia te, no solda'dun-nala leu tulu-fali mane Asyur-ra, nai Lee Efrat-ta su'un-na. Yosia hataholi mana'a ngga'din-nala, ko'o-la Yosia popolan-na, de ala fuan neu kaleta lain, boema leni falik-kana leo Yerusalem neu. Latoin nai naa, fo nai mane-manek-kala mamana loo-laten-na. Boema, laun Yehuda-la, ala so'u Yosia anamanen Yoahas, fo ana nggatin da'di manek. Tutui fe'ek la'eneu Mane Yosia, nanasulak nai Mane-manek Yehuda-la susula Tutuin dale.

²⁹

³⁰

³¹Yoahas teun 23, nai lelek ana da'di manek Yehuda, de ana paleta nai Yerusalem, bulak 3 dalen-na. Inan na'de, Hamutal, fo Yeremia neme kota Libna, anan-na.

³²Yoahas nasala-nasingo neu MANETUALAIN, sama leo bei-ba'i kain-nala.

³³Yoahas paletan-na, nate'e ndek lelek Nekho, fo mane Masir-ra, foo ninin da'di hataholi nanafook neme Ribla, fo nai dae Hamat-ta, de nakaseti Yehuda, fo ana bae bea dede'un-na, lilofulak kilo 3.400 ma lilopilas kilo 34, leo ndia neu.

³⁴ Basa boema, Mane Nekho-a, ana so'u Yosia anamanen fo mana'de Elyakim-ma, da'di mane Yehuda, boema ana foi nasafali Elyakim na'den-na, de na'de Yoyakim. Boema, no Yoahas leo Masir leu, de maten neme naa.

³⁵Mane Masir-ra nakaseti fo bae bea, boema manek Yoyakim-ma, neu susu bea neme laun-na mai, tunga sila esa-esak hahapun-na.

³⁶ Yoyakim teun 25, nai lelek ana da'di manek Yehuda, de ana paleta nai Yerusalem, teuk 11 dalen-na. Inan na'de Zebuda, fo Pedaya neme kota Roma, anan-na.

³⁷Yoyakim nasala-nasingo neu MANETUALAIN, sama leo bei-ba'in-nala.