Read Termanu 2RAJA-RAJA 25 Bible Online

2RAJA-RAJA 25 - Termanu bible

2RAJA-RAJA 25

¹ Basa boema Zedekia la'ban Nebukadnezar, fo manek Babel-la paletan-na. Hu ndia de, Nebukadnezar no basa solda'dun-nala lala'en-na ala mai, de sapu-la Yerusalem, nai hataholi Yahudi-la bula ka 12-na, fain 10, fo nai lelek Zedekia paleta neu teuk-ka 9-na. Ala ofu leme kota deak, de lapadedeik papala nanadamak, okofeo kota Yerusalem-ma,

²de lakahapi lahele kota ndia, losa Zedekia paleta neu teu ka 11-na.

³Nai hataholi Yahudi-la bula ka 4-na, fain 9, fo nai teuk ndia dalen-na boe, lelek la'a-ndoes matuaina nai kota ndia, de nalosa laun-na, nana'an ta makandondook so,

⁴ boema musu-a hona nabuu, kota papala nanadaman-na. Leomae le'odaek ndia, hataholi Babel-la bei lakahapi-la kota ndia, tehu basa solda'du Yehuda-la, lalai leo Bafak Yarden-na leu. Ala la'ok tunga enok manatunga osi uma manek-ka, boema ala kalua tunga lelesuina manatuti papala nanadama ka 2-k manai mamanak ndia.

⁵Tehu solda'du Babel-la usi Mane Zedekia, de ala ho'u-lan neme masadokek Yerikho-a. Basa solda'dun-nala, lalai la'oelan.

⁶Basa boema, loo Manek Zedekia leo Manek Nebukadnezar-ra neu, fo nai kota Ribla, de naketu huhukun-na.

⁷ Ala taolisa solda'dun-nala, neme matan-na. Basa ndia boema, ala e'do heni Zedekia mata de'en-nala, boema ala langen, de loon leo Babel neu.

⁸Nai hataholi Yahudi-la bula ka 5-na, fain 7, nai Nebukadnezar, fo manek Babel-la, ana paleta neu teu ka 19-na, boema hataholi esa na'de Nebuzaradan, ana mai leo Yerusalem mai. Hataholi ndia nde been-na, Nebukadnezar malanga solda'du manai lain-na, hataholi manamanolin-mafa'dan.

⁹ Nebuzaradan hotu heni MANETUALAIN Uman-na, manek-ka, uma manen-na, ma basa hataholi nananita-nalelak manai Yerusalem-mala, uman-nala.

¹⁰Boema, basa solda'dun-nala tao lakalulutuk kota ndia papala nanadaman-nala.

¹¹Basa boema, laun bei manai kota dale-la, nde tuka malelaina-la, fo bei ela hataholi-la, nde hataholi nuu-taa hata-taak-kala, ma hataholi manamalaik leo hataholi Babel-la leu-a, Nebuzaradan foo nini la'iesak-kasa leo Babel neu.

¹²Tehu, laun nggelok, nuu-taa hata-taak-kala. Hata-heton-nala ta makandondook so, ala la'oelas leme Yehuda, de ladenus, fo ala tao osi angol, ma ala ta'ti tina.

¹³ Hataholi Babel-lala, tao lakalulutuk dii liti-la, kaleta-kaleta manai MANETUALAIN Uman-na, sama-sama no nggusi litin-nala, boema ala ho'i leni la'iesak litin-nala leo sila nusan-na neu.

¹⁴ Boeo, ala ho'i leni buas-sala nde ia: sakop, mei tutunu hohotuk-ka mamana afun-na, banuk-ka hata-heton, mango soaenu tao bana tutunu-hohotuk-ka daan-na nai dalek, mango soaneu tunu boomenik-ka, ma basa bua-lo'a liti fe'e-fe'ek-kala, fo nanapakek soaneu makaluku-makatele.

¹⁵Nebuzaradan mesak-kana, ho'i nini bua-lo'a lilopilas, ma lilofulak-kala, boema mango anak-kala, ma pingak soaneu tao ha'i kaak neu dalek-ka.

¹⁶Mane Salomo-a, taon-na bua-lo'a liti-la soaneu MANETUALAIN Uman-na, fo nde, dii ka 2-kala, kaleta-la, ma nggusi matuaina, basa buas sila-la lala'en-na, belan-na seli, nalosa ta bisa tai fas.

¹⁷Dii liti ka 2-k sila-la, matak esa; esa soona, dedeman-na metel 8, no dii langak liti esa, dedeman-na, metel 1, senti 3. Nai dii langak sila-la esa-esak, hapu liti nananala'ek, fo nanabalias nenik dalima boak.

¹⁸Boema, Nebuzaradan ho'un-na Imam Matuaina Seraya, Zefanya, fo imam nai Imam matuaina dae, hataholi ka 3-k, fo lanea MANETUALAIN Uman-na lelesun-na, manek-ka hataholi manamanoli-mafa'da ka 5-nala, ndia te bei lai kota dalek, malanga solda'du manai lain-na, malanga solda'du manai lain-na, limaboa konan fo manaito-ato solda'du-la susulan-na, ma hataholi matua-madema fe'ek, 60.

²⁰Noo basa hataholi sila-la, leo Mane Nebukadnezar-ra neu, nai kota Ribla,

²¹fo nai Hamat dae paletan dale. Ala losa naa boema, ala tao doi-dosos, de basa boema, ala taolisas. Hataholi Yehuda-la, nanafook leme sila nusan-na mai, leo mamana ookak-ka neu-a, tutuin-na leondiak.

²² Basa ndia boema, Mane Nebukadnezar-ra so'u Gedalya, fo Ahikam anan-na, Safan upun-na, da'di filana nai Yehuda, fo ana paleta bei ela hataholi manai naa-la.

²³Lelek, basa Yehuda malanga solda'du manai lain-nala, loo solda'dun fo lakatele neu Babel-la, lamanene Gedalya soso'un-na boema, basa-basas mai leo Gedalya nai Mizpa. Malanga solda'du manai lain sila-la nde, Ismael, fo Netanya anan-na, Yohanan, fo Kareah anan-na, Seraya, fo Tanhumet neme kota Netofa anan-na, ma Yazanya, neme kota Maakha mai.

²⁴Boema Gedalya nafa'da basa-basas nae, “Ta paluu emi bii-mamata'u neu manapaleta Babel-la fa. Ka'da leo mahele meme ita nusan ia, fo da'di manek Babel-la atan. Te au anea emi, de neukose emi maso'da.”

²⁵ Tehu, nai hataholi Yahudi-la bula ka 7-na, fo nai teuk ndia dalen-na, Ismael, fo Netanya anan-na, Elisama upun-na, fo bei daa manek, sama-sama no hataholi 10 leu leo Mizpa leu. Ala sapu-la Gedalya, de ala taolisan no hataholi Yehuda ma hataholi Babel, manasama-sama loo Gedalya lai ndia.

²⁶ Boema, basa laun Yehuda lala'en-na, nau kamasu'i-makabetek, do nuu-taa hata-taak boe, sama-sama loo basa malanga solda'du manai lain-nala, lalai leo Masir leu, nanahu ala bii hataholi Babel-la.

²⁷Nai hataholi Yahudi-la bula ka 12-na, fain 27, fo Yoyakhin nanafoo basak, de nai mamana ookak-ka, teuk 37 dalen-na so, boema Ewil-Merodakh da'di mane Babel. Nai teuk ndia dalen-na boe, Ewil-Merodakh natu'du ndia dale kasian-na neu Yoyakhin, de ana kalua henin neme bui dale mai,

²⁸boema, ana taon no malole. Ana fe Yoyakhin nangatutuu madema, lena heni mane-manek fe'ek, fo foo lenis leo Babel leu boe.

²⁹Yoyakhin ta pake papake bui so'on, ma biasa na'a nai uma manek-ka, boema manek-ka fen doik, soaneu ndia paluu tunga fain-na.