Read Termanu 2RAJA-RAJA 3 Bible Online

2RAJA-RAJA 3 - Termanu bible

2RAJA-RAJA 3

¹Yosafat, fo mane Yehuda, ana paleta neu teu ka 18-na, boema Yoram, fo Ahab anan-na, ana da'di manek nai Israel, de ana paleta nai Samaria, teuk 12 dalen-na.

²Tunga MANETUALAIN mata memeten-na, ana tao tatao-nono'i mangalauk, tehu tatao-nono'i mangalaun-na, ta ba'u ina-aman, fo Ahab ma Izabel, tatao-nono'i mangalaun-na fa. Ana tao nakalulutuk, aman tao dodoki-dudulak, fo ana sene-do'ok neu Baal-la.

³Tehu, sama leo Mane Yerobeam, fo Nebat anan-na, ana paletan-nakahuluk neme Yosafat mai, Yosafat boeo, ana taon-na hataholi Israel-la, lasala-lasingo, de ala ta hahae tao tatao-nono'ik ndia fa.

⁴Mane Mesa neme Moab mai, nakaboboi bi'ilopo. Tunga teuk, ana fe bea leo mane Israel-la, bi'ilopo ana natun esa 100.000, ma bi'ilopo mane natun esa 100.000 bulun-na boe.

⁵Tehu mate basa Mane Ahab-pa boema, Mesa ta tunga paleta so'on, de ana la'ban Israel.

⁶Hu ndia de, no lai-laik, Mane Yoram-ma neu leo Samaria neu, fo ana sadia solda'dun-nala lala'en-na.

⁷Ana ha'itua hala heheluk ia neu Mane Yosafat-ta nai Yehuda nae, “Mane Moab-pa, ana ta tunga paleta so'on, de ana la'ban au; o nau matee-mata'ti sama-sama moo au, fo ata la'ban-nana do ta” Mane Yosafat nataa nae, “Hei, au ma au solda'dung-ngala, boema au solda'du manasa'e ndalang-ngala, neukose tunga moo o.

⁸Neukose ata sapu talas tunga enok beek-ka?” Boema, Yoram nataa nae, “Ata tunga enok fo, manatunga Edom moo solokaen-na.”

⁹Boema, Mane Yoram-ma, la'o sama-sama no Mane Yehuda, ma Mane Edom-ma. Ala la'ok faik hitu dalen-na boema, basa oen-nala, nalosa solda'dun-nala ma bana-manun fo manafua sila bua-lo'an-nala ta hapu linu oe so'on.

¹⁰Boema, Mane Yoram-ma naloo bou-bou nae, “Ita soe! MANETUALAIN tutu'u basa, soaneu Ana fe ita telu neu mane Moab-pa!”

¹¹Boema, Mane Yosafat-ta natane nae, “Ade nai ia, ta hapu nabi, fo natane MANETUALAIN la'eneu ita fa do?” Boema, Mane Yoram-ma, malanga solda'du manai lain esa, nataa nae, “Hapu Elisa, fo Safat anan-na. Makahulun-na, ana da'di Elia atan.”

¹²Boema, Mane Yosafat-ta nae, Tete'ek-ka! Memak, MANETUALAIN kokolak tunga hataholi ndia. Boema, mane ka teluk sila-la, leu leo Elisa leu.

¹³Leu boema, Elisa nafa'da mane Israel-la nae, “Tao le'e de, emi moke au tulu-fali emi? Ka'da meu leo emi ina-aman, nabin-nala meu!” Boema, Yoram nataa nae, “Ta! Nana MANETUALAIN nde manatutu'u enok, soaneu fe ami 3 neu mane Moab-pa.”

¹⁴Boema, Elisa nataa nae, “No MANETUALAIN fo maso'dak, fo au alalau-aoono-ka na'den-na, au afa'da no mangale'dok, ae metema, ta hu kande Mane Yosafat, fo au fe ha'da-holomatak-ka fa soona, au ta afaduli Tuan fa.

¹⁵Besak ia, moo o hataholi manamakaminak sasanu esa, leo ia mai.” Lelek hataholi ndia bei nakaminak sasanun-na, te MANETUALAIN Duladalen-na koasan-na Elisa, de

¹⁶nalosa nafa'da nae, “MANETUALAIN nafa'dak-ka nde ia, nae, ‘Kali oe lolok ba'uk-ka, mai lee ma'dak ia.

¹⁷Leomae emi ta mita u'dan-na mai, do anin fa, tehu neukose, lee ma'dak ia, henuk no oe. Fo emi moo emi bana-manum, ma bana manafua emi bua-lo'am-mala, neukose hapu oe ba'u, fo linu losa lakabete.’ ”

¹⁸Boema, Elisa kokolak nakandoo nae, “Tehu, ndia ka'da dede'a anak mesan, ba'eneu MANETUALAIN. Neukose, Ana fe o sengi hataholi Moab-pala boe.

¹⁹Basa sila kotan fo makota musu mana'a hiin-nala, neukose emi tao makalulutuk-kasa; emi lo'o heni basa ai maboak-kala, emi kena basa oemata-la, ma neukose, emi pia nakalulutuk la'iesak sila tina maoe-maisin-nala.”

²⁰Balahaa, fo nai lelek ala fe tutunu-hohotuk fafaik boema, oe faa neme Edom mai, de nalosa lee ma'dak ndia henun.

²¹Lelek, hataholi Moab-pala lamanene, lae mane ka teluk sila-la, ala mai sapu, boema ala fo'a la'iesak hataholi-la — neme lasik losa mulik — fo lasaa labe'i tafa-sisilo, fo daenga lanea lai dae too-a.

²²Balahaa, fo nai lelek ala fo'a fafaik, te le'do-a nasalaa nai oe lain, nalosa meten soona pilas, sama leo daak-ka.

²³Boema, ala nggasi, ma lae, “Daak! Tao leo bee-o, musu-a solda'du bubua ka telun-nala, laki'duao, de ladodo-lapauao! Mai fo, ata teu bonga ofun-nala leona!”

²⁴Tahu, nai lelek hataholi Moab sila-la, ala losa ofu ndia boema, hataholi Israel-la tutulu matak, de ala usis, boema ala taolisas,

²⁵ma ala tao lakalulutuk kotan-nala. Ala la'ola'di tina maoe-maisi bee soona, ala pias nenik batu. Mate'en-na, batu henu tina lala'en-na. Hataholi Israel-la boeo, ala kena basa oemata-la, ma ala lo'o heni basa ai maboak-kala. Ela ka'da kota Kir-Hareset, fo Moab nusan-na polon-na. Mate'e-na, kota ndia boeo, hataholi manaho'u pipiluk-kala, lakahapi, ma ala pian nenik batu.

²⁶Mane Moab-pa, bubuluk basa, nae ana ta nakatatakak so'on, boema no solda'du natu ka 7-n, fo manapake lalelak tafaina, sanga enok, fo ala tola tunga Mane Edom-ma, solda'dun-nala tala'da, tehu ta da'di fa.

²⁷Hu ndia de, ana ho'u-na anamanen fo, neukose ana nggatin da'di manek-ka, de ana tunu-hotun nai kota papala nanadaman lain, fo da'di neu tutunu-hohotuk soaneu Moab lamatua daebafan-na. Boema hataholi Israel-la bii leona, nalosa ala hela falik sila solda'dun-nala, leme kota ndia mai, de ala fali le'us leo sila nusan-na leu.