Read Termanu 2RAJA-RAJA 4 Bible Online

2RAJA-RAJA 4 - Termanu bible

2RAJA-RAJA 4

¹Faik esa boema, nabi manamatek esa, soainan-na neu leo Elisa neu, de nafa'da nae, “Ama, au saotoung-nga maten so! De Ama bubuluk, mae ndia boeo, hataholi manatunga Manetualain boe, tehu nahuta hataholi esa. Besak ia, hataholi ndia, ana mai fo ana ho'i-na au anang duas, fo ana taos da'di ata, fo ketu au saotoung-nga huta-bu'un.”

²Elisa natane nae, “Tao leo bee, fo au bisa tulu-fali Ina? Ina nanuu beek nai uma?” Boema, inak ndia nataa nae, “Au ta anuu hata esa boen, te ka'da mina setun boto anak esa.”

³Elisa nae, “Muu tona-ma, boto louk makadotok, neme Ina uma titia-tatain-nala mai.

⁴Basa ndia soona, Ina moo Ina anam-mala, muse meu leo uma dale meu, fo kena lelesu-a neu. Soona, po'a mina manai boto anak ndia, leo boto sila-la dalek neu, fo tao fe'e boto henuk-kala.”

⁵Boema inak ndia fali ne'un leo uman neu. Lelek, no anan-nala lala uma dale boema, ana kena lelesu-a neu. Boema, ana ho'i-na boto anak fo mina setun-na nai dalek ndia, de ana po'a mina ndia, leo anan-nala ho'i fen boto-la dalek neu.

⁶Lelek henu basa boto sila-la boema, ana noke seluk boto esa. Tehu, anan-nala lataa lae, “Basa botol-la so.” Boema, mina ndia, ta faa so'on.

⁷Basa boema, Inak ndia neu seluk leo Nabi Elisa neu, de Elisa nafa'dan nae, “Mase'o mina ndia, fo bae Ina huta-bu'un lala'en-na; ma lenan-na, dai soaneu Ina ma Ina anan-nala maso'dan-na.”

⁸Ina kamasu'ik esa, nai Sunem. Nai faik esa, fo lelek Elisa neu leo Sunem neu boema, inak ndia ka'in fo neu na'a nai uman. Mulai neme ndia mai, boema metema Elisa singa Sunem soona, na'a nai inak ndia uman.

⁹Basa boema, inak ndia nafa'da saon-na nae, “Au amahele, Ama fo nasi'a, ana tuli ia ndia, te'e-te'e Manetualain atan ndia.

¹⁰Malole lenak, ata tao-ta, kama anak esa neu ita uman-na, ta'dak manai lain-na, fo ata tao pepe'uk, mei, kandela, ma banuk neu ndia, fo metema, ana mai donge-dama ita soona, ana sungu neu ndia.”

¹¹Faik esa boema, Elisa neu seluk leo Sunem neu. Lelek ana kae leo kaman-na neu, fo ana hahaeaon boema,

¹²nadenu atan Gehazi, neu naloo inak ndia. Lelek inak ndia mai boema,

¹³Elisa nafa'da Gehazi nae, “Matanen, tao leo bee, fo au hapu balas ndia sosota-mamangun soaneu ita. Fafa'kama, nahiik au u leo manek-ka u, do au u leo solda'du-la malanga manai lain-na u, fo au kokolak soaneu ndia paluu-na.” Boema, Inak ndia nataa nae, “Au leo nai au teidaleng-ngala tala'da, de au ta to'a-taa hata esa boen.”

¹⁴Boema Elisa natane Gehazi nae, “Metema, leondiak soona, au tao beek soaneu inak ndia?” Boema, Gehazi nataa nae, “Ama, inak ndia, anan ta Ama, ma soan-na namalasi so.”

¹⁵Boema Elisa nae, “Muu maloo inak ndia,” fo ana mai. Inak ndia mai de napadeik neu lelesu bafan-na.

¹⁶ Boema Elisa nafa'dan nae, “Teu manamaik-ka, nai faik fo sama leoiak te, inak ko'o ni'iana beuana touanak esa so.” Boema inak ndia nafa'dan nae, “Ama, boso masapepeko. Te Ama ia, Manetualain atan!”

¹⁷Tehu tete'ek-ka, leo Elisa halan-na. Teu manamaik-ka, fo fafa'kama nai faik fo sama, inak ndia bongi-na ni'iana touanak esa.

¹⁸Lelek ni'iana ndia namatua boema, nai faik esa, fo nai fai ketu-kolun-na, ni'iana ndia neu leo aman nai tina, sama-sama no manaketu-manakolu-la.

¹⁹No kaiboik, ni'iana ndia nggasi, ma naloo aman nae, “Awi! Au langang-nga he'dis-sa!” Boema aman nafa'da atan esa nae, “Moo ni'iana ia leo inan neu.”

²⁰Boema ata ndia, noo ni'iana ndia leo inan neu, de inan ko'o-nan. De le'donoso boema, ni'iana ndia maten.

²¹Inan ko'o non leo uma ta'dak lain neu, fo leo Elisa kaman dale neu, de nangapepe'uk-kana neu pepe'uk lain. Basa boema, ana leo deak neu, de ana kena lelesu-a neu,

²²de neu naloo saon-na. Nafa'dan nae, “Madenu ata esa, ana mai no keledei esa. Te au muse u lai-lai leo nabi Elisa u, fo au fali ma'ing-nga no lai-laik.”

²³Saon-na natane nae, “Tao le'e de, muse la'o besak ia? Faik ia, ta fai sabat, ma boeo, ta fai malole Bula Beuk fa.” Boema, inak ndia nataa nae, “Ta hata-hata fa.”

²⁴Ana bela basa ne'a sa'e ndala neu keledei ndia lain boema, nafa'da atan-na nae, “Fepa keledei ia, fo ela nalaik napane'e; metema, au beita adenu fa soona, boso fen la'ok faa-faa.”

²⁵Boema, inak ndia neu leo Lete Karmel-la, fo neu leo Elisa mamanan-na neu. Bei nai dook-ka, te Elisa nita inak ndia mamai-na so. Boema, Elisa nafa'da Gehazi nae, “Mitak inak maneme Sunem ndia, ana mai so!

²⁶Lai-lai muu soluk-kana, fo matanen, ndia no teidalen-nala, bei so'da-molek do ta.” Boema inak ndia nafa'da Gehazi nae, “Basa-basas bei so'da-molek.”

²⁷Tehu, lelek ana losa Elisa matan-na boema, ana senek ma ana holu-na Elisa ein-na. Boema, Gehazi sanga soli henin neme ndia mai, tehu Elisa nae, “Nemen-na! Te nono'kabai, ana susa nanseli ndia. Tehu MANETUALAIN ta nafa'da au hata-hata fa!”

²⁸Inak ndia nae, “Ama, au ta oke Ama, anak fa. Au afa'da basa Ama boe, fo ela Ama boso fe au namahehena louk.”

²⁹Elisa lipa leo Gehazi neu, boema nae, “Lai-lai! Ho'i-ma, au aitete'eng-nga, fo la'o tutik leo Inak ia uman muu. Boso mate'e, fo matea su'di see, fo o matongo moon nai enok. Metema, hataholi nate'a o soona, boso tu'u-tapa heni le'do-fai, soaneu balas nate'an-na. O losa tutika, tao au aitete'eng-nga neu ni'iana ndia aon lain.”

³⁰Boema, inak ndia nae, “Ama Elisa! No MANETUALAIN fo maso'dak-ka na'den-na, ma no Ama samanen-na, neukose au ta la'oela Ama fa!” Hu ndia de, Elisa sama-sama no inak ndia, leu leo inak ndia uman leu.

³¹Gehazi la'o nakahuluk neme sila dua mai, fo neu tao Elisa aitete'en-na neu ni'iana ndia aon lain, tehu ta hapu hahaek, do ta'du-tana fe'ek, nae ni'iana ndia naso'da fa. Boema, Gehazi neu leo Elisa neu de nafadan nae, “Ni'iana ndia, ta fo'a fa.”

³²Ala losa inak ndia uman boema, Elisa mesak-kana neu leo kaman dale neu, te nita ni'iana ndia popolan-na, ndook-ndoo nai pepe'uk lain.

³³Elisa kena lelesu-a neu, boema ana hule-haladoi neu MANETUALAIN.

³⁴ Basa ndia boema, ana dala aon-na neu ni'iana ndia lain, de nakatama bafan-na, matan-na, ma liman-na, neu ni'iana ndia bafan-na, matan-na, ma liman-na. Hu kande, ana tao leondiak, de ni'iana ndia aon-na, natobi.

³⁵Elisa fo'a boema, ana la'ok neu mai nai kama ndia dalek, de basa boema, ana dala-na seluk, ni'iana ndia aon-na. Mate'en-na, ni'iana ndia kisufani la'i hitu, ma nalaak matan-na.

³⁶Boema, Elisa nadenu Gehazi, neu naloo ni'iana ndia inan, de lelek inak ndia mai boema, Elisa nafa'dan nae, “Ina anan-na nde ia.”

³⁷Boema, Inak ndia senek neu Elisa matan-na, de basa boema, no anan-na leo deak neu.

³⁸La'i esa boema, la'a-ndoes-sa, ana da'di nai basa nusak-ka lala'en-na. Boema Elisa fali ne'un leo Gilgal neu. Lelek ana bei nanoli nabi bubuak esa, te nadenu atan-na ho'i-na uledae matua esa, fo ana do'de-nasu sila nana'a-nininun.

³⁹Boema, nabi esa neme nabi sila-la mai, ana leo deak neu, de neu leo tina neu, fo ana sanga uta-aidoo. Boema nita nggela fuik-ka, de ana seu neni nggelas ndia boan makadotok, de ana fali ma'in. Ta bubuluk ai boa beek ndia fa, te ka'da ana kee-keen, de ana taon leo uledale ndia dalek neu.

⁴⁰Namatasa boema, ana baba'en neu nabi sila-la. Tehu la'a nggela fuik ndia tutika, ala nggasi ma lae, “Ama, laso ia!” Boema ala ta nau la'a so'on.

⁴¹Boema, Elisa nadenus, fo ala ho'i fen ha'desopuk faaanak, boema ana nggalin leo uledae ndia dalek neu. Basa ndia boema, nafa'das nae, “Baba'e seluk nana'ak ndia.” Te se'kona, nana'ak ndia, ta neni soe so'on.

⁴²Nai fai fe'ek esa, boema touk esa neme Baal-Salisa mai. Nini fe Elisa gandum beuk, ma loti 20, fo tao loti sila-la, neme gandum nanaketu-kolu makasososak-ka, nai teuk ndia dalen-na. Boema Elisa nadenu atan-na, baba'e loti sila neu nabi sila-la,

⁴³tehu ata ndia nafa'dan nae, “Tao leo bee-o, ta dai hataholi natun esa fa.” Boema Elisa nataa nae, “Ka'da baba'en leona, fo daenga la'a, nana MANETUALAIN nafa'da nae, neukose la'a, fo la'a basa te, bei ela bai.”

⁴⁴Boema, ata ndia baba'e fes nana'ak ndia, de basa-basas la'a. La'a basa te, bei ela, sama leo MANETUALAIN nafa'dak-ka.