Read Termanu 2RAJA-RAJA 5 Bible Online

2RAJA-RAJA 5 - Termanu bible

2RAJA-RAJA 5

¹ Naaman nde been-na, Siria malanga solda'du manai lain-na, fo Mane Siria sue-lain, ma ana fe ha'da-holomata neun. Nana, MANETUALAIN fe solda'du Siria-la sengi musun-nala, tunga Naaman. Naaman nde been-na, malanga solda'du manai lain esa, aon-na makadelek, tehu ana hapu he'di lou mangalauk.

²La'i esa boema, hataholi Siria-la sapu-la nusa Israel-la, de ala ho'u-la, inaanak Israel esa, de loon da'di leo hataholi nanafoo nenik, basa boema ana da'di ata neu Naaman saoinan-na.

³Faik esa boema, ata ndia nafa'da malangan-na nae, “Ina, leo uni'ka, ina saotoun-na neu leo nabi fo, ana leo nai Samaria, soona tao leo bee-o, neukose nabi ndia, taon-na lea hai Tuan.”

⁴Lelek Naaman namanene dede'ak ndia boema, neu leo manek-ka neu, de ana tui inaanak ndia hala tutuin-na.

⁵Manek-ka nae, “Hei, muu leo mane Israel-la muu. Mahani fo, au sulak fen susulak.” Boema Naaman la'o leona, de neni doi fulak 30.000, doi lilopilas 6.000, ma bua-lo'a manahiik, pasang 10.

⁶Naaman neni susulak-ka liin-na nae leo ia, “No susulak ia, au fe tuan nalelak au malanga solda'du manai laing-nga, fo Naaman, fo ela Tuan tao nalea-nahain neme he'di-laun mai.”

⁷Lelek mane Israel-la lees susulak ndia boema, ana sii-sii bua papaken-na, nanahu dalen-na, ta tesa-tama fa, boema nae, “Soe! Hu beek de, mane Siria ndia noke au tao alea-ahai hataholi ia? Manetualain ta nde au fa, fo nanuu koasa, soaneu tao naso'da do tao namate hataholi! Tao leo bee-o, mane Siria ndia, ka'da sanga salak no au ndia.

⁸Nabi Elisa namanene halak ndia boema, ana haitua hala heheluk-ka nde ia, neu mane Israel-la nae, tao le'e de, o dalem-ma, ta tesa-tama fa? Madenu hataholi ndia, ana mai leo au mai, fo ela ana bubuluk, nae hapu nabi esa, nai Israel ia!”

⁹Hu ndia de, Naaman sa'en-na kaletan-na, de neu leo Elisa uman neu. Ana losa boema, nate'e neme lelesu bafan-na.

¹⁰Elisa nadenu atan esa, neu nafa'da Naaman nae leo ia, “Tuan, neu nadiu oe nai Lee Yarden-na la'i hitu, fo neukose Tuan lea-hai no malole.”

¹¹Naaman namanene halak ndia boema, namanasa de nafa'da nae, “Au aedaenga, neukose ndia mai matan, fo natongon-no au, ma ana hule-haladoi neu Amak fo ndia MANETUALAIN-na, boema ana tao liman-na, neu au aong bee kande, he'dis-sa fo au lea-hai.

¹²Lee Abana, ma lee Parpar-ra nai Damsyik, malole lena neme, su'di lee bee-ka mai, nai Israel! Au bisa u adiu nai naa, fo au lea-hai!”

¹³Tehu atan-nala leu matan-na, de lafa'dan lae, “Tuan, leo uni'ka, nadenu Tuan tao hata matuaina esa boeo, tao leo bee-o, Tuan taon. Ia malole hiik so, ka'da nadenu Tuan nadiu oe, fo ela lea-hai!”

¹⁴Hu ndia de, Naaman neu leo Lee Yarden-na neu, boema neu leo oe dale neu, de ana bolo aon-na, la'i hitu leo oe dale neu, sama leo Elisa nadenuk-ka. Boema, Naaman lea-hai. Aon-na malole falik, sama leo aon fo, bei muli solun-na.

¹⁵Boema, no basa ana manatunga dean-nala, fali le'us leo Elisa leu. Boema, Naaman nafa'da Elisa nae, “Besak ia au bubuluk ae nai basa daebafak-ka lala'en-na, hapu ka'da Manetualain esa, fo nde Manetualain, fo hataholi Israel-la sene-do'ok-ka. Hu ndia de, sa'di been-na, Tuan sipo au fe Tuan buas ia-la.”

¹⁶Boema Elisa nataa nae, “No MANETUALAIN fo maso'dak-ka, fo au alalau-aoonok-ka na'den-na, au ta sipo Tuan hatan esa boen.” Tehu Naaman nakaseti Elisa, fo ela ana nau sipo buas fo, neni fen-na, tehu Elisa ta nau sipo fa.

¹⁷Boema Naaman nae, “Metema Tuan ta nau sipo au buang-ia-la boen soona, fe au loak, fo au ho'i ini dae-a baba'un-na, ba'u ndala matuaina 2 fufuan-na. Nana, mulai besak ia, neukose au fe tutunu-hohotuk ka'da soaneu MANETUALAIN, te ta soaneu lamatua fe'ek fa.

¹⁸Mahani te, metema au muse la'ok o au maneng-nga, fo ami meu hule-haladoi nai Siria lamatua daebafan-na, uma sosongo-tatangon manai Rimon-na soona, sa'di leo been-na, MANETUALAIN fe do'o do ampon neu au.”

¹⁹Boema Elisa nae, “La'o leon, no so'da-molek.” Boema Naaman la'o leona. Naaman la'o beita dook-ka fa te,

²⁰Gehazi, fo Elisa atan-na, doo-doo nae, “Ah, tao le'e de, po'ilotak-kana la'o, te ana ta bae fa? Tunga ndoon-na, au tuang-nga muse sipo hataholi Siria ndia buan-na! No MANETUALAIN, fo maso'dak-ka na'den-na, au muse usi tungan, fo au hapu hata esa neme hataholi ndia mai!”

²¹Boema, Gehazi usi tunga Naaman. Lelek Naaman nita hataholi mai, boema ana kona neme kaletan lain mai, de natane nae, “Te beek bai?”

²²Gehazi nataa nae, “Ampon Tuan, au nananadenuk, fo au afa'da Tuan, ae besak-ka nabi muli-soluk 2, ala mai leme nusak manai letelepak Efraim-ma mai. Au Ama Manek noke, fo ela Tuan fe doifulak 3.000, ma bua-lo'a papake mana'ahiik, pasang 2, soaneu nabi ka duak sila-la.”

²³Naaman nae, “Tao leo bee-o, au fe!” boema nakaseti Gehazi, fo ana ho'i neni doifulak lifu ka 6-kala. Naaman pe'da doifulak sila, lai alukosu 2 dalek, ma ana ho'i-na bua-lo'a papake mana'ahiik, pasang 2, de ana fe basa sila-la, leo ata ka duan-nala neu, de nadenus, fo ala la'o lakahuluk neme Gehazi mai.

²⁴Lelek, ala losa pupukuk fo, Elisa mamana leleon-na boema, Gehazi ho'i-na doik, ma bua-lo'a papakek sila-la leme Naaman ata ka dua-nala mai, de basa boema, ana pe'das leo uma dale neu. Boema, nadenu ata ka duak sila-la, fali leona,

²⁵boema, neu leo uma dale neu. Elisa natanen nae, “O meme bee mai ia?” Boema, nataa nae, “Au ta eme bee esa boen, Tuan!”

²⁶Tehu Elisa nae, “Au daleng-nga nai naa, nai lelek Naaman kona neme kaletan lain mai, fo natongon-no o. Fain-na ta nde ia, soaneu hapu doik, fo asa osi setun, osi angol, bi'ilopo ma sapi, boema ata fa!

²⁷Hu kande, o sipo buas sila-la, de neukose, o sipo Naaman he'di-laun boe. Nakalenak, losa dodoon-na, o tititi-nonosim boeo, neukose ala hapu he'di-laus ndia!” Lelek Gehazi kalua neme uma dale mai boema, ana hapu he'dis-sa nai loun-na — de loun-na, fula mangale'dok.