Read Termanu 2RAJA-RAJA 6 Bible Online

2RAJA-RAJA 6 - Termanu bible

2RAJA-RAJA 6

¹Faik esa boema, Elisa nanoli nabi-la, ala haladoi neu Elisa lae, “Ita mamana leleon-na, makabi'anak nanseli!

²Fe ami loak fo ami meu lo'o ai nai mamanak fo deka no Lee Yarden-na, fo ami tao ita mamana leleon-na neu ndia.” Boema, Elisa nataa nae, “Hei.”

³Hataholi esa, neme hataholi-la sila-la dalek mai, nakaseti Elisa, fo ana tunga nos. Elisa nakaheik,

⁴boema ala la'o leona. Lelek ala losa Lee Yarden-na su'un-na boema, ala mulai lo'o ai.

⁵No kaiboik, hataholi manalo'o ai sila-la, esa takan-na tu'da henin leo oe dale neu. Ana nggasi de nafa'da Elisa nae, “Awii, Ama! Hataholi takan ndia!”

⁶Elisa natane nae, “Ana tu'da nai bee?” Hataholi ndia natu'du mamana tutu'dan-na, boema Elisa nggelo-na, ai bibi'ak esa, de ana tapan leo mamanak ndia neu. Boema, taka ndia bou leo oe lain mai.

⁷Elisa nae, “Ho'i-man leona!” Boema, hataholi ndia look liman-na neu, de ana ho'i-na taka ndia.

⁸La'iesa boema, Siria natee-nata'ti no Israel. Nakokolaok basa no solda'du-la malangan manai lain-nala boema, mane Siria naketu, sila muse ofu nai bee.

⁹Tehu Elisa haitua halak leo mane Israel-la neu, fo ana fen nasanene'dak, fo daenga boso neu leo mamanak ndia neu, nanahu hataholi Siria-la, biasa tunga enok ndia.

¹⁰Da'di, mane Israel-la, fe nasanene'dak neu hataholi manaleo deka loo mamanak ndia, fo ela laheheleaon-nala. Elisa fe nasanene'dak la'i de'u bee, neu manek-ka.

¹¹Dede'ak ndia taon-na mane Siria, namanasa nanseli, nalosa naloo basa malanga solda'du manai lain-nala, de natanes nae, “Tao leo bee-o, nai ita dalek, hapu hataholi malelesik. Hataholi ndia, nde see? Ayo, mafa'da leona!”

¹²Neme malanga solda'du manai lain sila-la, malangan esa nata nae, “Ta hapu hataholi esa boen Ama Manek. Nabi Elisa nde da'di dopesina! Ndia nde nafa'da mane Israel-la, hata fo Ama manek kokolak-kana, leomae dede'ak ndia nananafa'dak nai kama susunguk dale boe.”

¹³Manek-ka fe paleta nae, “Palisak matolololen, besak ia nai bee, fo ela au bisa ho'u-an.” Boema, hataholi-la lafa'dan lae, Elisa nai Dotan.

¹⁴Boema, mane Siria, ana haitua solda'du bubuaina esa sama-sama loo ndala, ma kaleta musu-la leo naa neu. Leo'dae boema, ala losa kota ndia, de lakahapi-lan.

¹⁵Balahaa fafaik, fo nai lelek, Elisa atan-na fo'a, de ana leo deak neu boema, nita solda'du Siria-la lakahapi-la kota ndia, no ndala ma kaleta musun-nala lamatetu. Da'di, ana fali leo Elisa neu, de nafa'dan na, “Ita soe, Tuan! Ita muse tao leo beek?”

¹⁶Boema Elisa nataa nae, “Boso bii. Te mana nok ita, de'u lena mana nok sila.”

¹⁷Boema, Elisa hule-haladoi nae, “MANETUALAIN, sa'di leo been-na, O buka au atam-ma matan-na, fo ela ana hapu nita!” MANETUALAIN sipok Elisa hule-haladoin, de nalosa, nai lelek atan ndia mete boema, nita letek ndia, henun no ndala, ma kaleta maha'ik-kala, okofefeo-la Elisa.

¹⁸Lelek hataholi Siria sila-la, sapu boema, Elisa hule-haladoi nae, “MANETUALAIN, sa'di leo been-na, tao mapoke hataholi ia-la matan-nala!” MANETUALAIN sipok Elisa hule-haladoin, de poke basa hataholi sila-la.

¹⁹Elisa neu leo hataholi sila-la neu, de nafa'das nae, “Emi la'ok sala. Emi sanga kota, ta nde ia fa. Mai tunga au, fo au o emi leo hataholi fo, emi sanga-ka.” Boema Elisa nos leo Samaria neu.

²⁰Nai lelek lala kota ndia dalek boema, Elisa hule-haladoi nae, “MANETUALAIN, sa'di leo been-na, fe matan-nala lita, fo ela lita leona.” MANETUALAIN sipok Elisa hule-haladoin; de Ana fe hataholi sila-la lita, de nalosa, ala dodoo-doak-kana, nana ala bubuluk, sila nai kota Samaria nde ndia.

²¹Lelek mane Israel-la, nita hataholi Siria sila-la boema, natane nae, “Elisa, au muse taoisa hataholi ia-la do?”

²²Tehu Elisa nataa nae, “Bosok. Nana, leomae Ama Manek ho'um-ma, solda'du-la lai musu dale boeo, Ama Manek ta taonisa fas, na muda hata no ia-la bai. Fes la'a-linu, boema nemen-na, fo ala fali le'us leo sila manen-na leu.”

²³Boema mane Israel-la, tao fes feta matuaina. La'a-linu basa boema, nadenus fali le'us leo mane Siria leu. Mulai neme ndia mai, hataholi Siria-la, ala haha'e sapu-la nusa Israel-la.

²⁴Faik de'u bee, makabuin-na boema, Benhadad, fo mane Siria no la'iesak solda'dun-nala, fo leu sapu-la Israel. Lakahapi-la kota Samaria,

²⁵de neninin-na, la'a-ndoes matuaina, da'di nai kota dale, nalosa keledei langak esa soona, belin-na doi fulak 80, ma manupui kalua teik, ons 2, fo belin-na doi fulak 5.

²⁶Nai faik esa, fo nai lelek menek-ka bei la'o-la'o nai kota papala nanadaman lain, boema inak esa naloo bou-bou nae, “Ama Manek, fali-ma au dei!”

²⁷Boema, Manek-ka nataa nae, “Metema MANETUALAIN ta tulu-fali o fa soona, hapu nai bee, au bisa tulu-fali o? Au gandum ma angol ta!

²⁸O to'a-taa beek?” Boema, inak ndia nataa nae, “Au nonoong ia, ana leleko basa au, fo ela ami mi'a makahuluk au anang-nga, fo balahaa soona, ami mi'a ndia anan-na.

²⁹ Hu ndia de, ami tunu-nasu au anang-nga, de ami mi'a. Balahaa, de lelek au oken, fo ela ami tunu-nasu anan-na, tehu nafuni anan-na!”

³⁰Manek-ka namanene dede'ak ndia boema, ana sii sii-lulu'i bua-lo'a papaken-na, nanahu dalen-na he'dis-sa. Basa hataholi fo lapadeik deka loo papala nanadamak ndia, lita ba'du dalen-na nde been-na, tema kalong.

³¹Manek-ka naloo bou-bou nae, “Faik ia boe, Elisa muse mate. Nemen-na, fo Manetualain huku au, nenik huhuku mabela, metema au ta taoisa Elisa fa!”

³²Boema, manek-ka nadenu hataholi esa, la'o nakahuluk-kana, leo Elisa uman neu. Faik ndia, Elisa nai uma, ma lasi nggolok de'u bee, lai ndia boe. Manek-ka nadenu hataholi-a, ana beita losa fa te, Elisa nafa'da lasi nggolok sila-la nae, “Taoafik leona! Te tou kanisak ndia, nadenu hataholi taonisa au. Metema, hataholi ndia losa soona, kena lelesu-a neu, fo boso po'ilotak-kana, leo dalek mai. Te tao leo bee-o, manek-ka nakabuik.”

³³Elisa beita kokolak nate'e fa te, manek-ka losa nai ndia so, de nae, “MANETUALAIN nde fe susa ia, tunin-na ita! Da'di, sosoak hata, au amahena tutulu-fafalin bai?”