Read Termanu 2RAJA-RAJA 7 Bible Online

2RAJA-RAJA 7 - Termanu bible

2RAJA-RAJA 7

¹Elisa nataa nae, “Mamanene hata fo, MANETUALAIN nafa'dan! Balahaa fafa'kama nai faik fo sama leo ia, ka'da no doifulak 1, hataholi-a, ana bisa asa gandum malolehiik kilo 3 do gandum mata fe'ek kilo 6.”

²Boema, manek-ka manamanean-na, ana balas nae, “Masa bole! Dede'ak ndia, ta da'di fa, leomae nai hatematak ia boe, MANETUALAIN fe u'da ina neme lalai mai!” “Mahani te neukose o mita dede'ak ndia ana da'di, tehu neukose, o ta mu'a mita, nana'ak ndia faaanak boen.”

³Nai faik ndia, hataholi ha'di lou mangalauk 4 lai Samaria lelesuinan-na deak. Esa kokolak no esa nae, “Sosoak hata, ita bee-na mai ia, fo tahani mamates-sa do?

⁴Metema, ita teu leo kota dale teu soona, neukose ita mate to la'a sa; ma metema ita tahele ka'da ia soona, neukose ita mate boe. Malole lenak, ata teu leo hataholi Siria-la, uma ofun-na teu. Fafa'kama, ka'da ala taolisa ita. Do fafa'kama, ala ta tao ita le'e esa boen.”

⁵Lelek mulai makahatuk-ka boema, leu leo hataholi Siria-la ofun-na leu, tehu ta lita hataholi esa boen, nai ndia fa.

⁶Nana, MANETUALAIN tao-na hataholi Siria-la, lamanene maliik-ka, sama leo solda'du manasa'e ndala, ma manasa'e kaleta bubuaina esa, ala mai sapu. Hataholi Siria sila-la, laedaenga, mane Israel-la, se'ba basa mane Het-ta, ma mane Masir-ra loo solda'dun-nala, fo ala mai sapu-la sila.

⁷Hu ndia de, le'odaek ndia boe lalai, fo ela laso'da, de ala la'oela uma ofun-nala, ndalan-nala, boema keledein-nala.

⁸Hataholi he'di lou mangalauk ka haak sila, ala losa uma ofu ndia boboan-na, de ala masok leo uma ofu esa dalek leu. La'a-linu lai ndia, ma ala ho'i lilopilas, lilofulak ma bua papakek, boema leu ke'ke. Basa ndia boema, ala fali seluk, de leu leo uma ofu fe'ek dalek leu, de ala bei tao leondiak boe.

⁹Esa kokolak no esa nae, “Ita tatao-nono'in ia, ta malole-a fa. Halak ia, hala malole, de tunga ndoon-na, ita muse tui-bengan! Metema, ita tahani losa balahaa soona, tao leo bee-o, ita nanahukuk. Malole lenak, ata teu tafa'da dede'ak ia, leo uma manek-ka neu.”

¹⁰Hu ndia de, ala fali le'us leo Samaria leu, de laloo beebou neu manamanea kota lelesuinan-na lae, “Ami meu leo hataholi Siria-la, uma ofun-na meu so, de se'kona, hataholi ta naa. Ami mita ndalan-nala, ma keledein-nala bei nanapa'ak lai mamanan-nala, ma ala la'oela uma ofun-nala leondiak mesan.”

¹¹Basa manamanea-la, ala eki halak ndia, nalosa hataholi-la landuku-lalosak-kana leo uma manek-ka neu.

¹²Nai lelek ndia, bei makahatuk-ka, tehu manek-ka, kalua neme kama susungun dale mai boe, de nafa'da basa hataholi mana'a ngga'din-nala nae, “Mamanene te! Au bubuluk, hataholi Siria-la dale tutu'un-na! Ala bubuluk ita bei popo-tamala'a-popo-tamandoe, hu ndia de, ala la'oela uma ofun-nala, de leu ke'ke nai mook-ka, fo ala fufu'di ita kalua, fo teu sanga nana'ak. Basa ndia soona, neukose ala sapu-la ita, fo langatuu-la, ita kotan-na.”

¹³Boema, Manek-ka hataholi mana'a ngga'din esa nae, “Ama Manek, ita fo bei manai kota ia dalek-ka, ita ua-nalen, sama leo sila fo, manamate basak-kala so. Hu ndia de, malole lenak, ata tadenu hataholi de'ubee, ala sa'e leni ndala 5, neme ndala manai ia-la mai, fo leu leo naa leu, fo ala mete hata da'di so.”

¹⁴Boema, ala hele-la, hataholi lima, de manek-ka nadenu hataholi sila-la sa'e kaleta musu 2, fo leu palisak matalolole, hata da'di nai solda'du Siria-la so.

¹⁵Ala la'o de, ala losa Lee Yarden-na. Nai eno manalu ndia dalek, lita bua papakek, ma taka-besi besenggela-besenggali. Hataholi Siria-la, ala tu'u-tapa heni basa bua-lo'as sila-la leondiak mesan, ndek lelek lalai-a. Hataholi nananadenuk sila-la, ala fali ma'is, de lafa'da manada'dik ndia, neu manek-ka. La'e nai faik ndia, manek-ka manamanean-na, ana hapu bela-ba'uk, fo taoafik neu kota lelesuinan-na.

¹⁶Boema, laun Samaria-la, lalai-lalai mesan leu, de ala kalo hataholi Siria-la uma ofun-nala. Nandaa no MANETUALAIN nafa'dak-ka, de ana da'di, nae gandum malole kilo 3, do gandum mata fe'ek kilo 6, belin-na ka'da doifulak 1.

¹⁷La'e nai faik ndia, manek-ka manamanean-na nanea, fo ana taoafik neu kota lelesuinan-na. De laun-nala, heheta-aa'i lisan neme ndia. Dede'ak ndia ana da'di, fo nandaa no hata fo Elisa nafa'dan neu manek-ka, nai lelek manek-ka mai neun.

¹⁸Elisa nafa'da basa nae, fafa'kama, nai faik fo sama leo ia, nai faik balahaan-na soona, gandum malolehiik kilo 3, do gandum mata fe'ek kilo 6, neukose lase'on nai Samaria, no belin-na doifulak 1.

¹⁹Ma nai lelek ndia, manek ndia manamanean-na nafa'da basa nae, “Masa bole! Ndia ta da'di fa, leomae nai hatematak ia boe, MANETUALAIN fe u'daina neme lalai mai!” Boema Elisa nataa nae, “Mahani te, neukose o mita dede'ak ndia ana da'di, tehu neukose, o ta mu'a mita nana'ak ndia faaanak boen.”

²⁰Leondiak, ana da'di neu hataholi ndia — laun-na heheta-aa'i lisan nai lelesuina matan-na.