Read Termanu 1 TAWARIKH 13 Bible Online

1 TAWARIKH 13 - Termanu bible

1 TAWARIKH 13

¹Manek Dauk ka nakokolaok no basa malanga solda'du matuainan fo nauli-nalanga solda'du lifun esa ma solda'du natun esa.

²Boema nafa'da basa hataholi sila-la nae, “Metema emi makaheik, ma Amak ka, fo ita MANETUALAIN nau soona, malole lenak ata tadenu hataholi neu leo basa imam mala ma hataholi Lewi la lai sila nggolo nala, boema ita leoinan fe'ek kala fo ladenus ala mai lakabubua loo ita nai ia.

³Basa soona ata teu ho'i ta Manetualain Peti Hehelu-balataan, te nai lelek Manek Saul la paleta, ana ta taoafik neu fan.”

⁴Basa hataholi Israel fo manamakabubuak lai ndia, lamahoko lanseli no halak ndia de ala sipok kana.

⁵ Boema Dauk naloo nakabubua basa laun Israel manai nusak-ka lala'en-na, neme Masir dae toon manai kona, losa leo Enok Hamat a nai kii, soaneu leu ho'i la Peti Hehelu-balataak ndia neme Kiryat-Yearim mai, fo lenin leo Yerusalem neu.

⁶ Boema Dauk sama-sama nos leu leo kota Baala, fo nde Kiryat-Yearim, fo nai leo Yehuda nusan na soaneu leu ho'i MANETUALAIN Peti Hehelu-blataan na. Ala foi Peti ndia na'de “Manetualain fo nangatuuk nai mahahaek mali'dak lain”.

⁷Ala losa Baala boema, ala ho'i la Peti Hehelu-balataak ndia neme Abinadab uman mai, boema ala fuan neu kaleta beuk esa lain. Uza ma Ahyo tunga kaleta ndia,

⁸tehu Dauk ma basa laun Israel-la lala'en-na foti-longe ma lakamee no namahokok nanseli, lakaminak kecapi, rebana, simbal ma pupuuk soaneu fe ha'da-holomata neu Manetualain.

⁹Lelek ala losa Kidon mamana fefepa gandum ma boema, sapi-sapi manahela kaleta ndia lakatunu, boema Uza look liman-na neu fo ana ho'u nahele Peti Hehelu-balataak ndia, fo ela boso tu'dahenin.

¹⁰Hatematak ndia boe, MANETUALAIN namanasa Uza, nanahu tatao-nono'in ndia nalupa nakamumulu-nakamamaek esa neu MANETUALAIN. Boema Ana taonisa Uza neme ndia. Boema mulai neme ndia mai, ala foi mamanak ndia na'de “Peres-Uza”. Dauk namanasa nanahu MANETUALAIN taonisa Uza.

¹²Tehu Dauk boeo ana bii Manetualain de nafa'da nae, “Besak ia tao leo bee fo au hapu ho'i eni Peti Hehelu-balataak ndia?”

¹³Hu ndia de, Dauk ta da'di nini Peti ndia leo Yerusalem neu fa, tehu ana pe'dan nai Obed-Edom, fo hataholi Gat ndia uman.

¹⁴ Peti ndia nahele neme ndia, bulak telu dalen-na, de MANETUALAIN fe baba'e-papalak neu Obed-Edom teidalen-nala ma basa hata-heton lala'en-na.