Read Termanu 1 TAWARIKH 14 Bible Online

1 TAWARIKH 14 - Termanu bible

1 TAWARIKH 14

¹Manek Hiram fo neme Tirus mai, ana haitua hataholin-nala leu leo Dauk leu, boeo ana haitua ai kaiou Libanon ma tuka ai la boema tuka batu soaneu lapadedeik uma manek-ka.

²Hu ndia de, Dauk name'da te'e-te'e MANETUALAIN tao natea-nahelen da'di leo manek Israel-la, ma tao natea-nahele nusan na soaneu MANETUALAIN anan nala paluu na.

³Nai Yerusalem, Dauk sao seluk inak de'ubee, de ana bongi seluk anatouk kala.

⁴Anatoun fo bongis lai Yerusalem ma, nde: Syamua, Sobab, Natan, Salomo,

⁵Yibhar, Elisua, Elpelet,

⁶Nogah, Nefeg, Yafia,

⁷Elisama, Beelyada ma Elifelet.

⁸Lelek hataholi Filistin nala lamanene lae Dauk nanaso'u basak da'di manek neu basa Israel-lala'en-na boema, ala sanga mai ho'un. Hu ndia de, Dauk kalua mai fo natee-natati nos.

⁹Ndia te, hataholi Filistin nala losa lai Bafak Refaim ma so, de lamanako lai bafak ndia.

¹⁰Dauk namanene manada'dik ndia boema, natane MANETUALAIN nae, “MANETUALAIN ade au muse sapu a hataholi Filistin sila-la do bosok? Ade neukose MANETUALAIN fe au sengi do?” MANETUALAIN nataa nae, “Hei, sapu malas! Te neukose Au fe o sengi!”

¹¹Boema Dauk no solda'du nala leu sapu la hataholi Filistin sila-la nai Baal-Perasim de ana sengis. Dauk nafa'da nae, “Manetualain pake au soaneu hona akalulutuk musu a sama leo faa tao natu'u basa hata lala'en-na, nai hatematak esa.” Hu ndia de, loke mamanak ndia lae Baal-Perasim.

¹²Lelek fo Filistin solda'du nala lalai boema, ala ta hapu loak ho'ileni sila dodoki-dudula sosongo-tatangon nala fa. Dauk paleta fo ela hotuheni dodoki-dudulak sila-la.

¹³Beita dooanak boen te, hataholi Filistin nala mai de lamanako seluk nai Bafak Refaim ma.

¹⁴La'iesa seluk, Dauk noke natutu'duk neme Manetualain mai, de Manetualain nataa nae, “Boso sapu malas neme ia mai, tehu la'ok po'de fo sapu malas leme selik mai, fo deka no ai mulbei la.

¹⁵Metema o mamanene malii ka sama leo hataholi manabalis ala ei ndu'un nala lai ai sila-la poin-na soona, tutulumatak leona, nana neukose Au la'ok nai o uluk fo tao a solda'du Filistin nala kala.”

¹⁶Dauk tao tunga hata fo Manetualain paleta soaneun. Dauk no solda'du nala tao lakala solda'du Filistin nala mulai neme Gibeon losa Gezer.

¹⁷Boema Dauk na'de na nananita-nalelak nai mamanak lala'en-na, de MANETUALAIN tao na basa leoina lala'en-na bii Dauk.