Read Termanu 1 TAWARIKH 17 Bible Online

1 TAWARIKH 17 - Termanu bible

1 TAWARIKH 17

¹Manek Dauk ka leo nahele nai uma manen na boema, nai faik esa boema naloo Nabi Natan na de nafa'dan nae, “Mitak, au ia, au leo nai uma manek fo nanataok neme ai kaiou Libanon na mai, tehu MANETUALAIN Peti Hehelu-balataan pe'dan ka'da nai pandopo dale!”

²Natan nataa nae, “Ama Manek ta dale tutu'um ma lala'ena, nana Manetualain tulu-fali Ama Manek.”

³Tehu nai le'odaen ndia, Manetualain nafa'da Natan nae,

⁴“Muu leona, fo manduku-malosak Au hala-hehelung nga nde ia neu Au atang Dauk mae, ‘Neukose o ta nde mapadedeik uma soaneu Au fa.

⁵Lelek Au se'i-po'i nggileo-bobongik Israel la neme Masir mai, losa besak ia, Au beita leo ita nai uma esa dalek boen. Au aleu-alaak tataasesa ma Au leo nai pandopo esa dalek.

⁶Nai Au leu-laang nga dalek sama-sama o nggileo-bobongik Israel la, beita la'iesa fo Au atane neu mauli-malangan fo Au hele basa kala ae, hu beek de sila ta lapadedeik fe Au uma esa neme ai kaiou Libanon na mai fa.’

⁷Hu ndia de, Natan, muu mafa'da Au atang Dauk mae Au, MANETUALAIN Fo Manakoasa, afa'dan ae, ‘Au ho'i basa o neme o tatao-nono'im da'di leo manafoo bi'ilopo nai mook ka, de Au tao o da'di manek neu Au anang Israel so.

⁸Au tulu-fali o nai lelek o muu leo su'di bee muu, ma Au taoisa basa o musu mala, nai lelek o matee-matati. Neukose Au tao a o nananita-nalelak sama leo mauli-malangan matuaina nanseli nai daebafak ka.

⁹Ba'eneu Au anang Israel soona, Au sadia basa mamanak soaneu da'di sila dae-oen fo ela ala hapu laso'da no nee nee-lino linok no ta hapu napanggenggek so'on. Neme makahulu na ala mai leo nusak ia mai, ma ala beita lanuu manek fa, hataholi fo ta lahiik mole-dame a, sapu lalas. Tehu dede'ak ndia, neukose ana ta da'di seluk so'on. Au aheluk neukose Au tao kala o musu mala, ma neukose Au fe o tititi-nonosik.

¹¹Makabui na, metema o fai mamate ma losa, ma o nananatoik nai o bei-ba'i kaim late mamanan na soona, neukose Au so'u o anamanem esa da'di manek. Neukose ndia nde napadedeik uma ba'eneu Au. Neukose Au tao atea-ahele nusan na, ma hataholi esa neme tititi-nonosin mai, neukose ana paleta da'di leo manek losa dodoo na.

¹³ Neukose Au da'di ndia aman, ma neukose ndia da'di Au anamaneng. Neukose Au tao malole tataasesa neun, nandaa no Au hehelu-balataang. Neukose Au ho'u ahele Au hehelu-balataang neun, ta sama leo hata fo Au taon soaneu Saul fo Au kekohenin neme nangatutuun na mai, fo ela o bisa da'di manek.

¹⁴O anamanem fo Au helen ndia, neukose Au taon da'di manek neu Au anang ngala, ma Au nusang nga, losa dodoo na, ma upu anan neme bobongik leo bobongik neu, neukose ala paleta da'di leo manek.’ ”

¹⁵Natan nafa'da Dauk basa hata fo Manetualain nafa'da neun.

¹⁶Boema Dauk masok leo MANETUALAIN Pandopon dale neu. Ana nangatuuk de ana hule-haladoi nae, “Ou Amak MANETUALAIN, au ma au teidaleng ngala ta mandaa sipo basa dale malole fo O matu'dun neu au basa ia.

¹⁷Nakalenak O tao lena neme ndia mai; O tao basa hehelu-balataak la'eneu au tititi-nonosing soaneu le'do fai manamaik ka. Lena-lenak O tao au da'di leo hataholi matua-madema esa.

¹⁸Beek seluk bai fo au hapu afa'dan neu O, ou Amak MANETUALAIN? O bubuluk basa hata lala'ena la'eneu O atam ia, tehu O bei fe ha'da-holomata neu au.

¹⁹No O hihii-nanaum mesak kana, ma soaneu au paluung nga de O tao basa dede'a matuaina ia la no le'do-le'dok.

²⁰Ka'da O nde Manetualain, ta hapu hata esa boen fo sama no O fa. Ami bubuluk dede'ak ndia, nana nananafa'da basak neme makahulun eli mai so.

²¹Nai basa daebafak ka lala'ena, ta hapu nggileo-bobongik sama leo Israel fa. Israel nde bee na nggileo-bobongik esa mesa-mesa kana fo O soi-po'in neme da'di ata mai, soaneu da'di O ana mesa ma. Basa tatao-nono'i matuaina ma manada'di beuk fo O taon ba'eneus, ana tao na O na'de ma nananita-nalelak nai basa daebafak ka lala'ena. O soi-po'i O anam mala leme Masir mai, ma O si'uheni nggileo-bobongik fe'ek kala nai lelek O anam mala tutulumatak fo latee-latati.

²²O tao nggileo-bobongik Israel la da'di O ana mesam losa dodoo na. Ma O, ou MANETUALAIN, O da'di sila Manetualain.

²³Besak ia, ou Amak MANETUALAIN, sa'di leo bee na tao matea-mahele O hehelu-balataam fo O kokolak kana la'eneu au aoinang nga ma au tititi-nonosing. Sa'di leo bee na tao matetu hata fo O helu basak ndia so.

²⁴Su'di nai bee boe, neukose hataholi a namatutua-namadedema O na'dem ma tataasesa ma nafa'da nae, ‘MANETUALAIN Fo Manakoasa, ndia nde Manetualain neu Israel.’ Soaneu losa dodoona, hataholi esa neme au tititi-nonosing mai, neukose ana paleta da'di leo manek.

²⁵Au apalalani ao soaneu so'uk huhule-haladoik ia neu O, ou Manetualain, nana O mesa ma nde mafa'da basa neu au mae au upu anang neme bobongik leo bobongik neu, neukose O taos da'di manek neu nggileo-bobongik ia.

²⁶O, Amak ka, nde bee na MANETUALAIN, ma dede'a mana'ahiik ndia, O helu basan neu au so.

²⁷Hu ndia de, au dokodoe, sa'di leo bee na ba'e-pala au tititi-nonosing, fo ela ala lame'da lita O susue-lalaim nahele losa dodoo na. Nana, O ba'e-pala basa O anam mala so, ou Manetualain, de neukose sila nanaba'e-palak nahele losa dodoo na.”