Read Termanu 1 TAWARIKH 18 Bible Online

1 TAWARIKH 18 - Termanu bible

1 TAWARIKH 18

¹Basa teuk de'ubee boema, Manek Dauk ka sapun-na hataholi Filistin nala de ana sengis, boema ana loso na kota Gad a sama-sama no nggolo-nggolok manai titia-tatai nala.

²Dauk boeo ana sengi hataholi Moab ala de nalosa lakatele ma ala bae bea leo Dauk neu.

³Basa boema Dauk sengi Hadadezer, fo manek nai Zoba fo deka no nusak Hamat a nai nusak Siria. Nai lelek ndia, Hadadezer bei nai leleo-lala'on na dalek soaneu ana koasan-na nusak fo manadeka no Lee Efrat a langan-na.

⁴Dauk loso na kaleta musu lifun esa, ma ana foo nini solda'du manasa'e ndala lifun hitu, boema solda'du manala'o eik lifun duahulu. Ana fepa nala'di basa ndala la ein-nala de ana ela ka'da seli soaneu kaleta musu natun esa.

⁵Hataholi Siria la leme Damsyik mai, ala haitua solda'du soaneu tulu-fali Manek Hadadezer a, tehu Dauk sengis, de ana taonisa hataholi lifun duahulu dua.

⁶Basa boema napadedeik solda'du la uma ofun nala nai hataholi sila nusan dale de ala bae bea leo Dauk neu. MANETUALAIN fe Dauk sesengik nai su'di bee boe fo natee-natati.

⁷Babaa fana lilopilas fo Hadadezer solda'du nala pake kala, Dauk loso nalas de nenis leo Yerusalem neu.

⁸ Fe'ek neme ndia mai, Dauk boeo ho'i na liti makadotok nanseli neme Tibhat ma Kun kota-kota fo makahulun-na Hadadezer koasa kota sila-la. (Neu fai makabuin boema, Salomo pake liti sila-la soaneu ana tao pipa bobongok, boema dii ma bua-lo'as nakalupu-nakatela nai MANETUALAIN Uman.)

⁹Manek Tou neme Hamat mai, namanene lae Dauk sengi basa Hadadezer solda'dun lala'en-na.

¹⁰Boema nadenu anamanen Yoram fo nanduku-nalosak ndia nate'a na neu Manek Dauk ka ma nafa'da so'da-molek neu Dauk sesengin sila-la, nanan-nasi'a Hadadezer natee-natati no Tou. Yoram neu leo Dauk no nei bua palsen lilopilas, lilofulak ma liti makadotok.

¹¹Manek Dauk ka fe basa bua palsen sila-la leo MANETUALAIN neu fo pakes nai feta nakalupu-nakatela. Ana tao leondiak boe neu bua lilopilas ma lilofulak fo ana loso ninin neme Hadadezer ma ana sengi leoinak-kala fo nde: leoina Edom, Moab, Amon, Filistin ma Amalek.

¹² Abisai (inan na'de Zeruya) ana sengi de ana taonisa hataholi Edom manai Bafak Asin na, hataholi lifun sanahulu falu,

¹³boema napadedeik solda'du la uma ofun-na la nai Edom lala'en-na. Boema hataholi Edom mala lakatele neu Manek Dauk ka. MANETUALAIN fe sesengik neu Dauk nai su'di bee boe fo anan-natee-natati.

¹⁴Leondiak Dauk paleta basa Israel-lala'en-na, ma nanea fo ela ana tao laun na no malole ma tunga matetun-na.

¹⁵Dauk so'u manaho'u paleta mademaina la nde ia la: Solda'du la malanga mademainan-na nde: Yoab, fo Abisai ka'an na. Uma manek-ka hataholi manasulak susulan na nde: Yosafat, fo Ahilud anan na. Imam mala nde: Zadok, fo Ahitub anan na ma Ahimelekh, fo Abyatar anan na. Nusaina, hataholi manasulak susulan na nde: Sausa. Manamanea manek-ka, malangan-na nde: Benaya, fo Yoyada anan na. Dauk anamanen nala langatuu nangatutuu mademainan-nai paleta dalek.