Read Termanu 1 TAWARIKH 21 Bible Online

1 TAWARIKH 21 - Termanu bible

1 TAWARIKH 21

¹Nitu nahiik tao soe hataholi Israel-la; hu ndia de ana fufu'di-oo'dok Dauk fo ela ana sulak laun nala dede'un nala.

²Boema Dauk nafa'da Yoab ma basa malanga solda'du matuainan nala nae, “Sulak laun Israel-la lala'en-na dede'un nala mulai neme kota losa nggolo-nggolok kala, nanahu au ahiik bubuluk laun Israel-la dede'un na de'ubee.”

³Yoab nataa nae, “Sa'di leo been-na MANETUALAIN tao namaba'u laun Israel-la fo losa diku la'i natun esa, neme dede'uk besak ia mai. Ama Fo Mandela-masa'ak, ade beita da'di mangale'dok nae ala laketele neu Ama Manek fa do? Taole'e de muse sulak seluk laun na dede'un na? Mahani te, hu kande salak ndia de, basa leoina lala'en-na nde lu'a-lepa buna-boan!”

⁴Tehu manek-ka ho'u nahele paletan ndia, da'di Yoab neu leo basa Israel-lala'en-na losa nggolo-nggolon nala neu, de basa boema ana fali ne'un leo Yerusalem neu,

⁵de nafa'da Manek Dauk ka susulak laun na dede'un na, buna-boan. Touk fo nandaa da'di solda'du, dede'u na hapu hataholi juta esa lifun natun esa nai Israel ma hataholi lifun natun haa hituhulun-nai Yehuda.

⁶Tehu leo Lewi ma leo Benyamin na, ta nanasulak nai susulak ndia dalek fa. Yoab ta sulak kasa fa nana ana ta hii nakalala'ok manek-ka paletan ndia fa.

⁷Manetualain ta hii sulak laun nala dede'un na ndia fa, de Ana huku hataholi Israel-la.

⁸Boema dauk hule-haladoi neu Manetualain nae, “Ou Manetualain, au asala-asingo anseli! Fe do'o do ampon neu au, nana au tatao-nono'ing ndia nggoak nanseli.”

⁹MANETUALAIN nafa'da Nabi Gad, fo ana da'di lelete soaneu Dauk no MANETUALAIN nae,

¹⁰“Muu leona fo mafa'da Dauk mae Au fen ana hele enok telu. Ana hele eno ka teluk sila-la bee ka boe, neukose Au taon.”

¹¹Boema Gad neu leo Dauk neu de nanduku-nalosak MANETUALAIN hala-hehelun ndia nae, “Beek kande Ama Manek helen:

¹²Soe la'andoes sa la'e nusak ia teuk telu dalen-na, do musu usi nahele Ama Manek bulak telu dalen-na, do MANETUALAIN sapun-na nusak ia faik telu dalen na, nenik tafainan fo nalupa he'di-laus, ma ata nusa so'da nala leni mamates leo mamanak lala'en-na neu. Besak ia maketu leon, hata fo au muse anduku-alosak kana neu MANETUALAIN.”

¹³Dauk nataa nae, “Awii, au soe! Ta malole metema hataholi daebafak ka huku au, malole lenak MANETUALAIN huku au, nana susue-lalain ba'u na seli.”

¹⁴Boema MANETUALAIN fe he'di-laus sa leo hataholi Israel-la neu, nalosa mate sila hataholin lifun hituhulu.

¹⁵Boema MANETUALAIN nadenu ata nusa so'dak esa soaneu tao namate-namopo Yerusalem. Tehu lelek ata nusa so'dak ndia losa nai deka no Arauna fo hataholi Yebus ndia popo'de gandum ma boema, MANETUALAIN nasafali nakeketun soaneu huku leoina ndia. Nafa'da ata nusa so'dak ndia nae, “Dai so! Mate'e leon!”

¹⁶Dauk nita ata nusa so'dak ndia laa nai lalai n daebafak ka tala'da. No tafaina manai liman-na ndia, ata nusa so'dak ndia naheheleaon soaneu tao namate-namopo Yerusalem. Boema Dauk ma mauli-malangan laun nala, fo nai lelek ndia ala bei pake bua papake lafa lapik fo da'di ta'du-tana sale dalek ka, ala senek leu dae lain.

¹⁷Dauk hule-haladoi nae, “Ou MANETUALAIN, au nde asala. Au nde adenu sulak laun na dede'u na. Leoina ia salan ta makandondook! Ou Amak, fo au MANETUALAING nga, huku au ma au teidaleng ngala, tehu madook soe ia neme O ana mala mai.”

¹⁸Boema ata nusa so'dak ndia nadenu Gad neu nafa'da Dauk nae ana muse kae leo Arauna mamana popo'de gandum lain neu fo napadedeik mei tutunu-hohotuk ba'eneu MANETUALAIN neu ndia.

¹⁹Boema Dauk la'o leon, nandaa no MANETUALAIN paletan fo nanananduku-nalosak neun tunga Gad.

²⁰Nai mamanak popo'de gandum ndia, Arauna no anatoun haas bei po'de gandum. Arauna anatouk-ka haan sila-la lita ata nusa so'dak ndia boema, lalai leu ke'ke.

²¹Lelek Arauna nita Manek Dauk ka mai boema, neu soluk Dauk de ana senek neu matan na.

²²Dauk nafa'dan nae, “Au nau apadedeik mei tunu-hotuk nai mamanak ia soaneu MANETUALAIN, fo ela he'di-laus ia nate'e leona. Hu ndia de, mase'o dae ia leo au mai. Mafa'da belin na de'ubee, te neukose au baen.”

²³Arauna nataa nae, “Ah, ka'da ho'i-man, Ama Manek, fo tao su'di beek fo Ama Manek dodoon malole Sapi la nde ia soaneu tutunu-hohotuk nanatunuk, ma soaneu ai ha'i a soona, Ama Manek bole pake popo'de gandum ia papan nala. Bole ho'i gandum boe, soaneu tutunu-hohotuk. Au Tuang nga boso bae au fe basa hata sila-la.”

²⁴Tehu manek-ka nataa nae, “Bosok! Au nau bae atetu belin na. Au ta nau tunu-hotu hata fo o nuum do au hapu hata esa no beli taak neu MANETUALAIN fa.”

²⁵Boema Dauk bae mamanak ndia belin na doi lilopilas natun nee leo Aruna neu.

²⁶Boema Dauk napadedeik mei tunu-hotuk esa neu dia soaneu MANETUALAIN, de ana fe tutunu-hohotuk nanatunuk, ma tutunu-hohotuk mole-dame. Basa boema ana hule-haladoi de MANETUALAIN nataa hule-haladoin ndia nenik Ana haitua ha'i neme lalai mai de na'aheni tutunu-hohotuk manai mei tunu-hotuk ndia lain.

²⁷Boema MANETUALAIN nadenu ata nusa so'dak ndia so'dok falik tafainan na, boema ata nusak so'dak ndia tao tunga MANETUALAIN paletan ndia.

²⁸Lelek Dauk nita nae MANETUALAIN nataa hule-haladoin, nanahu tutunu-hohotuk sila-la, boema ana tunu-hotuk seluk tutunu-hohotuk neu mei tunu-hotuk ndia.

²⁹Nai lelek ndia, MANETUALAIN Lalaa Temak fo Musa taon neme moo maloa, ma mei tunu-hotuk soaneu tutunu-hohotuk nanatunuk ka, bei hapus lai mamana makaluku-makatele manai Gibeon na.

³⁰Tehu Dauk ta napalani neu leo naa neu soaneu kokolak no MANETUALAIN fa, nana ana bii MANETUALAIN ata nusa so'dan na tafainin na.