Read Termanu 1 TAWARIKH 23 Bible Online

1 TAWARIKH 23 - Termanu bible

1 TAWARIKH 23

¹ Lelek fo Dauk namalasin-nanseli boema, ana so'u Salomo da'di manek Israel.

²Manek Dauk ka nakabubua basa mauli-malang Israel-la, imam-imam mala ma hataholi Lewi la,

³boema ana leke basa leo Lewi toun fo teun teluhulu leo lain neu. Basa-basan hataholi lifun teluhulu falu.

⁴Boema neme hataholi sila-la, ana fe hataholi lifun duahulu haa ho'u tatao-nono'ik manai MANETUALAIN Uman na, hataholi lifun nee soaneu ito-ato susulak kalua masok ma manamaketu-mala'di dede'ak kala,

⁵hataholi lifun haa soaneu da'di manamanea, ma hataholi lifun haa seluk soaneu koa-kio MANETUALAIN nenik sasanu-sasanu fo nanasadia basak kala so.

⁶Dauk baba'e hataholi Lewi sila-la nai bubuak telu dalek tunga sila teidale-bobongin, fo nde: teidale-bobongik Gerson, Kehat ma Merari.

⁷Gerson anatoun dua, fo nde: Ladan ma Simei.

⁸Ladan anatoun telu, fo nde: Yehiel, Zetam ma Yoel.

⁹Hataholi sila-la nde been-na malangan teidale-bobongik nai Ladan tititi-nonosin. (Selomit, Haziel ma Haran nde been-na Simei.)

¹⁰Leke Simei anatoun ka haa nala tunga teu bobongin nala soona: Yahat, Ziza, Yeus ma Beria. Yeus ma Beri tititi-nonosin ta ba'uk ka fa, da'di sila nanalekek teidale-bobongik esa.

¹²Kehat anatoun haa, fo nde: Amram, Yizhar, Hebron ma Uziel.

¹³ Amram nde been-na Harun ma Musa aman nde ndia. (Harun ma tititi-nonosin nala nanahele hehelik losa dodoon-na, soaneu ito-ato bua-lo'as makaluku-makatele, tunu boomenik ba'eneu MANETUALAIN, lalalau-laoono MANETUALAIN ma fe baba'e-papalak neu laun nala nenik MANETUALAIN na'den na.

¹⁴Musa fo MANETUALAIN atan ndia, anatoun nala nanalekek leo, leo Lewi dalek neu.)

¹⁵Musa anatoun dua, fo nde: Gersom ma Eliezer.

¹⁶Fo manada'di mauli-malangan neu Gersom anan nala nde Sebuel.

¹⁷Eliezer anatoun ka'da esa, na'de Rehabya. Tehu Rehabya anan makadotok nanseli.

¹⁸Yizhar, fo Kehat ana nomel duan-na, anatoun na na'de Selomit; ndia nde been-na malanga teidale-bobongik.

¹⁹Hebron, fo Kehat anan nomel ka telu a, anatoun haa, fo nde: Yeria fo uluk ka basa de Amarya, Yehaziel ma Yekameam.

²⁰Uziel fo Kehat ana nomel ka haa, anatoun dua, fo nde: Mikha fo uluk ka ma Yisia.

²¹Merari anatoun dua, fo na'de Mahli ma Musi. Mahli anatoun dua, fo nde: Eleazar ma Kish,

²²tehu Eleazar maten te ana ta bongi anatouk fa; ka'da anainan nala fo ala sao tolano daen-nala, fo nde Kish anan nala.

²³Musi, fo Merari ana nomel duan-na, anatoun telu, fo nde: Mahli, Eder ma Yeremot.

²⁴Lewi tititi-nonosin na'den nala nde ndia, fo nanasulak tunga esa-esak malanga teidale-bobongin ma teidalen nala na'de nala. Sila fo teun duahulu leo lain neu, ana hapu bela-ba'uk nai MANETUALAIN Uman.

²⁵Dauk nae, “Israel MANETUALAIN, fe basa tetu-temak neu anan nala, ma Ndia mesak-kana leo nai Yerusalem losa dodoon-na.

²⁶ Hu ndia de, MANETUALAIN Lalaa Temak na ma basa buas fo nanapakek soaneu makaluku-makatele a, ta paluu hataholi Lewi la ndolo seluk kana fa.”

²⁷Tunga Dauk paleta mate'en nala, de basa hataholi Lewi la, metema teun duahulu soona, muse nanasulak soaneu ana hapu bela-ba'uk.

²⁸ Ala muse tulu-fali imam-imam fo Harun tititi-nonosin nai lakalala'ok feta makaluku-makatele dalek nai MANETUALAIN Uman, mete-lakanae MANETUALAIN uma so'dan nala ma kama-kama manai MANETUALAIN Uman, boema lanea fo ela basa hata lala'en fo nanafe hehelik soaneu MANETUALAIN na, boso da'di langgenggeo.

²⁹Sila boeo lu'a-lepa ito-atok kala nde ia: loti fo nanafek neu Manetualain, ha'desopuk fo nanapakek soaneu fen neu MANETUALAIN, koki ni'ianak fo taon ta pake laluteik fa, tutunu-hohotuk nanadalak, ha'desopuk fo nanasese'dok no mina setun. Sila boeo muse tai ma uku tutunu-hohotuk fo lenin leo MANETUALAIN Uman neu.

³⁰Fe'ek neme ndia mai, sila muse lakamee soaneu koa-kio MANETUALAIN tunga-tunga fafain-na ma le'odaen na;

³¹boeo nai lelek metema hapu tutunu-hohotuk fo nanatunuk soaneu MANETUALAIN nai fai Sabat a, nai Feta Bula Beuk ka, ma nai feta-feta fe'ek kala. La'eneu hataholi Lewi la dede'un fo nai lelek muse nalalalau-naoono, nakanenete na nanataok so boe. Hataholi Lewi la muse lakalala'ok bela-ba'uk ndia losa dodoon-na.

³²Sila boeo nanafe bela-ba'uk soaneu mete lakanae MANETUALAIN Lalaa Temak na boema MANETUALAIN Uman na ma soaneu tulu-fali sila tolanon nala, fo nde basa imam fo Harun tititi-nonosin nala, nai lakalala'ok makaluku-makatele dalek nai mamanak ndia.