Read Termanu 1 TAWARIKH 25 Bible Online

1 TAWARIKH 25 - Termanu bible

1 TAWARIKH 25

¹Soeneu manamauli-malanga feta makaluku-makatele a, Manek Dauk ka ma basa hataholi Lewi la mauli-malangan-nala hele Lewi teidale-bobongin nala nde ia: Asaf, Heman ma Yedutun. Sila bela-ba'un nde soaneu landuku-lalosak hala heheluk neme MANETUALAIN mai nenik musik kecapi, gambus ma simbal. Soaneu manamauli-malanga makaluku-makatele no esa-esak fetan na, hataholi nanahelek kala nde ia:

²Asaf anatoun haa, fo nde: Zakur, Yusuf, Netanya ma Asarela. Sila mauli-malangan nde Asaf, fo nanduku-nalosak hala heheluk neme Manetualain mai, metema manek-ka nadenun.

³Yedutun anatoun nee, fo nde: Gedalya, Zeri, Yesaya, Simei, Hasabya ma Matica. Sila mauli-malangan nde sila aman, fo landuku-lalosak hala-heheluk neme MANETUALAIN mai nenik musik kecapi, ma lakamee nakamee kokoa-kikiok boema loke makasi neu Manetualain.

⁴Heman anatoun sanahulu haa fo nde: Bukia, Matanya, Uziel, Sebuel, Yerimot, Hananya, Hanani, Eliata, Gidalti, Romamti-Ezer, Yosbekasa, Maloti, Hotir ma Mahaziot.

⁵Heman nde been-na manek-ka nabin. MANETUALAIN fe anatouk ka sanahulu haak sila-la ma anainak telu neu Haman, nanahu MANETUALAIN helu basa soaneu Ana fen nangatutuu madema.

⁶Basa Heman anan sila-la lakaminak musik simbal, kecapi ma gambus fo sila aman nde nauli-nalanga soaneu lakamee tunga nai feta makaluku-makatele nai MANETUALAIN Uman. Asaf, Yedutun ma Heman hapu bela-ba'uk nandaa no natutu'duk neme manek-ka mai.

⁷Sila anatoun ka duahulu haan sila-la loo sila tolano ka'a-fa'din nala nde been-na malela ba'u nai nakaminak musik ka. Sila basa-basan lala'en-na hataholi natun dua faluhulu falu.

⁸Soaneu langganggatiaok bela-ba'uk ka de sila basa-basas hela lot — nau mulik do lasik boe, nau malelak do besak ka nanoli boe.

⁹Hataholi natun dua faluhulu falu sila-la nanaba'ek neu bubuak duahulu haa tunga esa-esak teidalen. Bubuak esa soona, hataholi sanahulu dua, fo hataholi esa nauli-nalangas. Hataholi sila-la na'den nala nde ia tunga hehela lot a: 1. Yusuf neme Asaf teidalen na mai — 13. Subael 2. Gedalya — 14. Matica 3. Zakur — 15. Yeremot 4. Yizri — 16. Hananya 5. Natanya, — 17. Yosbekasa 6. Bukia — 18. Hanani 7. Yesarela — 19. Maloti 8. Yesaya — 20. Eliata 9. Matanya — 21. Hotir 10. Simei — 22. Gidalti 11. Azareel — 23. Mahaziot 12. Hasabya — 24. Romamti-Ezer