Read Termanu 1 TAWARIKH 5 Bible Online

1 TAWARIKH 5 - Termanu bible

1 TAWARIKH 5

¹ Ruben nde been-na Yakob ana ulun-na. Tehu, hu kande Ruben tao nanggenggeo aman sao makahatun esa na'den-na boema, Yakob ho'i-na ndia haak fo da'di leo ana uluk-ka, de ana fen leo Yusuf neu. Leomae leondiak boeo, mabe'i-balakaik manai Yakob tititi-nonosin dalek-ka, ta nde Yusuf tititi-nonosin fa, te nde leo Yehuda dei. Nakalenak manada'di manek makasososak neu basa hataholi Israel-la nde been-na neme leo Yehuda ndia mai.

³Ruben, fo Yakob ana ulun-na, anatoun 4, fo nde: Henokh, Palu, Hezron ma Karmi.

⁴ Yoel tititi-nonosin nde ia: Semaya, Gog, Simea, Mikha, Reaya, Mikha Baal ma Beera. Beera nde been-na leo Ruben-na mauli-malangan, nai lelek Tiglat-Pileser fo manek Asyur-ra ho'u-nan, de loon leo mamana ookak-ka neu.

⁷Nai susulak bei-ba'i dalek, boeo nanasulak malanga leo-ingu-la nde ia, nai leo Ruben-na dalek, fo nde: Yeiel, Zakharia,

⁸ma Bela, fo Asas anan-na, ma Sema neme leo-ingu Yoel-la upun-na. Leo Ruben-na, leo nai Aroer, ma nai nusak fo mulai neme Aroer leo kii neu, fo losa Nebo ma Baal-Meon.

⁹Sila lanuu bana-manu makadotok nanseli, nai nusa Gilead-ta. Hu ndia de, sila hapu nusak dulu-la, losa leo moo solokaek-ka neu, fo natabaa losa Lee Efrat-ta.

¹⁰Nai Manek Saul-la tepo-lelen-na, leo Ruben-na sapu-na hataholi Hagri-la nai Gilead boboan dulu, de ana sengis, boema nangatuu-na nusak ndia.

¹¹Nai leo Ruben-na nusan-na boboan kii, leo Gad-ta leo nai dae Basan-na, losa leo Salkha boboan dulu neu.

¹²Neme leo Gad sila-la, Yoel nde been-na, leo-ingu nananita-nalelak-kala bei-ba'i kain, ma Safam nde been-na, leo-ingu nomel ke 2 bei-ba'i kain. Yaenai ma Safat nde been-na, leo-ingu-leo-ingu fe'ek manai Basan-nala bei-ba'i kain.

¹³Hataholi fe'ek manai leo Gad-ta dalek, nanalekek nai leo-ingu ka 7-k ia-la dalek, fo nde: Mikhael, Mesulam, Syeba, Yorai, Yakan, Ziya ma Eber.

¹⁴Hataholi sila-la nde been-na, Abihail fo Huri anan-na, ititi-nonosin sila. Sila bei-ba'in-nala tutuin-na neme dae leo lain neu nde ia: Abihail, Huri, Yaroah, Gilead, Mikhael, Yesisai, Yahdo, Bus.

¹⁵Leo-ingu sila-la malangan-na nde Ahi, Abdiel anan-na fo Guni upun-na.

¹⁶Ala leo nai nusa Basan ma Gilead, ma kota-kota manai nusak ndia, boema nai basa moo mana'uk manai Saron lala'en-na.

¹⁷Bei-ba'i ia tutuin-na, nanasulak ndek Yotam, fo manek Yehuda, ma Yerobeam, fo manek Israel-la tepo-lelen-na.

¹⁸Nai leo Ruben, Gad ma leo Manasye manai Yarden boboan dulu dalek, hapu solda'du nanananolik ma latee-lata'ti lalelak pake babaa fanak, tafaina, ma kokouk, hapu solda'du 44.760

¹⁹Ala latee-lata'ti la'ban leo Yetur, Nafis ma Nodab, fo nde: leo-leo manai leoina Hagri dalek.

²⁰Solda'du sila-la lamahele neu Manetualain, de loke tutulu-fafalik neun, boema Manetualain sipok sila nonoken-na, de Ana fes ala sengi hataholi Hagri sila-la loo hataholi manatulu-falis-sala.

²¹Hu kande natee-natatik ndia da'di tunga Manetualain dale hihiin-na, boema ala taolisa solda'du musu makadotok. Boeo ala foo leni hataholi 100.000, ma ala kalo leni onta 50.000, bi'ilopo 250.000 ma keledei 2.000. Basa ndia boema, ala leo lahele leme nusak ndia, losa tepo-lelek leoina Israel-la nanafook de loos leo mamana ookak-ka neu.

²³Leo Manasye seli, ala leo nai nusa Basan-na losa leo kii neu fo losa Baal-Hermon, Senir ma Letek Hermon-na. Ala boetai lamade'uk-ka.

²⁴Sila malanga leo-ingu-nala nde ia: Hefer, Yisei, Eliel, Azriel, Yeremia, Hodawya ma Yahdiel. Sila basa-basas nde been-na malanga solda'du ao kahelek mesa-mesan.

²⁵Hataholi Israel-la ta lilineka neu Manetualain fo sila bei-ba'i kain sene-do'ok-ka fa. Ala la'o elan de ala maso-kasasi neu leoina fo Manetualain usi henis leme nusa Kanaan-na mai, lamatua daebafan-nala.

²⁶ Hu ndia de, Manetualain nakababale Pul, fo manek Asyur-ra dalen-na, boema neu sapu-na nusak ndia. Pul boeo lalelak-kana da'di leo Tiglat-Pileser. Boema leo Ruben, Gad ma leo Manasye fo manai Yarden boboan dulu, nanafook da'di leo hataholi nanafook, de ala tu'us leo Halah, Habor, Hara ma mamanak esa deka no Lee Gozan na. Ala leo lahele lai naa losa faik ia.