Read Termanu 2TAWARIKH 1 Bible Online

2TAWARIKH 1 - Termanu bible

2TAWARIKH 1

¹Salomo fo Manek Dauk-ka anamanen-na da'di manek fo nangatutuu-na matea-mahelek nai nusak Israel-la. MANETUALAIN ba'e-palan de Ana taon da'di manakoasa matuaina nanseli.

²Manek Salomo fe paleta neu basa malanga solda'dun lifun esa ma solda'dun natun esa, basa manaho'u paleta-la, ma basa malanga uma loo Israel-la

³soaneu la'o sama-sama loon leo mamana makaluku-makatele nai Gibeon. Ala leo naa leu, nanahu nai ndia hapu MANETUALAIN Lalaa Temak fo MANETUALAIN atan Musa taon nai lelek nai moo maloa. (

⁴ Tehu MANETUALAIN Peti Hehelu-balataan nai Yerusalem nai Manek Dauk-ka tao pandopo dalek, fo nai lelek ana lalihenin neme Kiryat-Yearim mai.)

⁵ Bezaleel fo Uri anan-na ma Hur upun-na tao mei tunu-hotuk liti-a, boeo hapun nai Gibeon nai MANETUALAIN Lalaa Temak-na so'dan-na. Manek Salomo ma basa laun-nala lala'en-na sene-do'ok neu MANETUALAIN nai naa.

⁶Nai Lalaa Temak ndia so'dan-na, manek-ka fe tutunu-hohotuk bana lifun esa nai mei tunu-hotu liti lain da'di leo tutunu-hohotuk nanatunuk ba'eneu MANETUALAIN.

⁷Le'odaek ndia Manetualain natu'du aoinan-na neu Salomo de nafa'da nae, “Salomo, moke hata fo o mahiik-kana leona, te neukose Au fe o!”

⁸Salomo nata nae, “Ou Manetualain, O matu'du basa mae O sue-lai-ma au amang ba'un-na seli, de O so'u au da'di manek fo nggatin.

⁹ Besak ia ou MANETUALAIN ela leo bee na O tao matetu O hehelu-balataam neu au amang. O so'u basa au da'di manek neu leoina matuaina fo ta leke na dede'un-na ia fa.

¹⁰Hu ndia de, ela leo bee na fe au manatee tenok ma malelak fo au paluun soaneu hela-noles. Metema ta leondiak fa soona, tao leo bee fo au hapu paleta O ana makadotom ia la?”

¹¹Manetualain nataa Salomo nae, “O nonokem ndia malole. O ta moke su'i-betes do hata-heto do kokoa-kikiok do o musum-mala mamaten-nala do fe o teu manalu fa, tehu o moke manatee tenok ma malelak soaneu paleta Au anang fo Au fen neu o.

¹²Hu ndia de, neukose Au fe o manatee tenok ma malelak. Fe'ek neme ndia mai, neukose Au tao o da'di manatetutemak lena, kamasu'i-makabetek lena nananita-nalelak lena neme su'di manek bee mai boe, nau tepo-lelek maneuk-ka do nai tepo-lelek manamaik-ka.”

¹³Basa ndia boema, Salomo la'oela mamana makaluku-makatele manai Gibeon-na, nai bee hapu MANETUALAIN Lalaa Temak-na, boema ana fali leo Yerusalem neu.

¹⁴ Ana sadia matalolole solda'dun-nala nenik kaleta musu lifun esa natun haa ma ndala manamasok musu lifun sanahulu dua. Ana pe'da seli lanea nai Yerusalem ma lenan-nala nai kota fe-e-fe'ek-kala.

¹⁵ Nai tepo-lelek Salomo paletan-na dalek, lilopilas ma lilofulak-ka da'di bua biasa nai Yerusalem, sama na leo batu a; ai kaiou Libanon-nala makadotok nanseli sama na leo ai kaak biasa.

¹⁶ Tunga manadangan fo manafali manek-ka, ndala-la nanahaituak neme Masir ma Kewe mai,

¹⁷ma kaleta musu-la nanahaituak neme Masir mai, basa boema ana haitua fe seluk mane-manek Het-ala ma mane-manek Siria-la doifulak natun esa limahulu soaneu ndala esa belin-na, ma doifulak natun nee soaneu kaleta musu esa belin-na.