Read Termanu 2TAWARIKH 10 Bible Online

2TAWARIKH 10 - Termanu bible

2TAWARIKH 10

¹Rehabeam neu leo Sikhem neu nanahu basa laun manai Israel boboan kii lala'en-na lakabubua lai naa fo ala so'u sila manen-na so.

²Nai lelek ndia Yerobeam fo Nebat anan-na bei nai Masir nanahu nalai neme Manek Salomo-a mai. Lelek namanene la'eneu Rehabeam boema, ana fali leo Israel neu.

³Laun manai Israel boboan kii-la laloo Yerobeam, boema sama-sama loon fo neu nataa Rehabeam. Ala lafa'da lae,

⁴“Salomo fo ama manek aman, fe basa ami lelepa mabela so. Metema Ama Manek lui mamada'u ami lelepa mabela-ma, ma ami doidosom soona, neukose ami mataa neu Ama Manek.”

⁵Rehabeam nataa nae, “Au muse dodoo dei. Basa faik telu soona, de'i fo mai seluk.” Boema ala fali leon-na.

⁶Boema Rehabeam noke nanoli-nafa'dak neme lasi-lasik fo makahulun-na ala da'di Salomo fo Rehabeam aman manamanoli-nafa'dan-nala nae, “Au muse ataa hataholi sila-la ae le'e?” Rehabeam natanes nae, “Emi nanoli-nafa'dam leobeek.”

⁷Lataa lae, “Metema Ama Manek nau tao malole neu laun-na, ma tao mamahoko dalen-nala fo fes natataa malole, soona neukose ala lilineka lahele neu Ama Manek losa dodoon-na.”

⁸Tehu Rehabeam ta taoafik neu lasi-lasik sila-la nanolin-nafa'dan fa, de neu leo ndia dedena-baba'u ta'eanan fo besak ia ala da'di ndia manatulu-manafalin.

⁹Natanes nae, “Emi fe au nanoli-nafa'da beek soaneu au ataa laun fo ala loke fo ela au lui amada'u sila lelepa mabelan-na?”

¹⁰Lataa lae, “Ela leo been-na Ama Manek mafa'das mae leo ia, ‘Leomae au tapandoes, tehu au bei balakaik lena neme au amang mai.

¹¹Au amang fe emi lelepa mabela, tehu neukose au fe lelepa mabela lena seluk bai. Ana fepa emi nenik ue, tehu neukose au fepa emi nenik ue madila-nggau besi!’ ”

¹²Basa faik telu boema, Yerobeam no hataholi sila-la mai lataa Manek Rehabeam-ma sama leo ana paleta basak-ka so.

¹³Ana ta tunga lasi-lasik-kala nanoli-nafa'dan fa, de ana sipok laun manamaik sila-la no hala-kokola balakaik.

¹⁴Ana tunga dedena-baba'un nanoli-nafa'dan, de nafa'da nae, “Au amang fe emi lelepa mabela, tehu neukose au fe lelepa mabela ndia, namabela lena seluk bai. Ana fepa emi nenik ue, tehu neukose au fepa emi nenik ue madila-nggau besi!”

¹⁵Ana ta nafaduli laun-na nonoken ndia fa. Tehu memak MANETUALAIN dale hihiin ndia. Hata fo MANETUALAIN nafa'dan tunga Nabi Ahia fo neme Silo la'eneu Yerobeam fo Nebat anan-na, muse ana da'di.

¹⁶ Lelek laun Israel-la lita lae manek-ka ta nau namanene sila fa boema, ala eki lae, “Paluu beek no Dauk no tititi-nonosin nala! Ala beita tao hata-hata esa boen soaneu ita fa. Laun Israel-la lemin, mai fo ata fali! Nemen-na fo Rehabeam ndia ito-ato aon aoinan-na mesak-kana!” Boema laun Israel-la fali le'us,

¹⁷de Rehabeam da'di manek ka'da neu nusak Yehuda.

¹⁸Leomae leondiak boe, Manek Rehabeam-ma bei nadenu Adoniram, fo hataholi manatao kuli esa fo kokolak matalolole no laun-na. Tehu ala tapan nenik batu losa maten. Rehabeam mesak-kana naladeak de no lai-laik ana sa'e leo kaletan lain neu, boema nalai leo Yerusalem neu.

¹⁹Mulai neme hatematak ndia mai, laun manai nusak Israel-la boboan kii, ala la'ban tataasesa loo mane-manek fo Dauk tititi-nonosin-nala.