Read Termanu 2TAWARIKH 11 Bible Online

2TAWARIKH 11 - Termanu bible

2TAWARIKH 11

¹Lelek Manek Rehabeam-ma losa Yerusalem boema, nakabubuan-na solda'du neulaun lifun natun esa faluhulu leme leo Yehuda ma Benyamin-na mai fo latee-latati loo hataholi Israel-la, fo ana tao matalolole koasan-na soaneu leo-leo manai Israel boboan kii-na

²Tehu MANETUALAIN nadenu Nabi Semaya

³nanduku-nalosak hala heheluk ia neu Rehabeam ma neu basa hataholi manai leo Yehuda ma Benyamin-na dalek nae,

⁴“Boso matee-matati moo o tolanom hataholi Israel-la. Fali leon-na! Hata manada'di basak-ka nde bee na, Au hihii-nanaung ndia.” Boema basa-basas tunga MANETUALAIN paletan-na de ala ta da'di latee-latati loo Yerobeam fa.

⁵Rehabeam leo nai Yerusalem de nadenu hataholi nafofo'a kota musu neu kota-kota manai nusak Yehuda ma Benyamin-na, fo nde:

⁶kota Betlehem, Etam, Tekoa,

⁷Bet-Zur, Sokho, Adulam,

⁸Gat, Mares, Zif,

⁹Adoraim, Lakhis, Azeka,

¹⁰Zora, Ayalon ma Hebron.

¹¹Ana tao natea-nahele kota-kota makota musu sila-la de ana pe'da malanga solda'du esan-na neu kota sila-la esa-esak. Kota sila-la esa-esak, nanasadiak nenik nana'a-nininuk, mina setun ma angol

¹²boema bua-lo'a sisili-musu ma tee-dongi. No enok ndia, nusak Yehuda ma Benyamin-na lahele lai koasan dale.

¹³Imam-imam-mala loo basa hataholi Lewi manai nusak Israel-la leu lakabubua da'di esa loo Rehabeam.

¹⁴Hataholi Lewi sila-la la'oela sila moo mana'un-nala ma dae-nala de ala lali leo Yehuda ma Yerusalem leu, nana Yerobeam ma mane-manek fo mananggatin-nana, ta fes loak laue-lale'di da'di leo MANETUALAIN imam fa.

¹⁵ Yerobeam so'u aon ndia imam-mala fo lalalau-laoono nai mamana sosongo-tatangok-kala ma soaneu sene-do'ok neu nitu-la boema neu ana taon-na sapi-a dodoki-dudulan.

¹⁶Hataholi-hataholi fo maneme basa leo Israel fo no te'e-te'ek lahiik sene-do'ok neu Amak, fo Israel MANETUALAIN-na, ala lali leo Yerusalem leu, tunga hataholi Lewi sila-la fo ela ala hapu fe tutunu-hohotuk neu Amak, MANETUALAIN fo sila bei-ba'i kain-nala sene do'ok-ka.

¹⁷No enok ndia, nusak Yehuda da'di boetai natea-nahele. Teuk telu dalen-na ala tia-saka lahele Rehabeam fo Salomo anamanen ndia paletan-na, de laso'da sama leo nai tepo-lelek Manek Dauk-ka ma Manek Salomo-a paleta.

¹⁸Rehabeam saon-na Mahalat; Mahalat aman nde Yerimot fo Dauk anamanen-na, ma inan nde Abihail, fo Eliab anan-na ma Isai upun-na.

¹⁹Ala bongi-la anatouk telu fo nde: Yeus, Semarya ma Zaham.

²⁰Basa boema Rehabeam saon-na Maakha fo Absalom anan-na. Ala bongi-la anatouk haa fo nde: Abia, Atai, Ziza ma Selomit.

²¹Rehabeam saon sanahulu falu ma sao makahatun neehulu, anataoun duahulu falu ma anainan neehulu. Neme basa sao mangale'don ma sao makahatun sila-la, fo ana sue-lai nanseli-a nde bee na nde Maakha.

²²Hu ndia de, ana sue Abia fo Maakha anan ndia lena neme basa ana fe'e-fe'en-nala mai, nalosa Abia boeo nde ana helen da'di manek nggati ndia.

²³No dudu'a-aafi manatee-tenok, Rehabeam ba'e fe anamanen-nala bela-ba'uk ma ana fes leo nai kota-kota makota musu-kala nai basa nusak Yehuda ma Benyamin lala'en-na. Ana fes nana'a-nininuk sasi kao-kao, ma ana sadia fes saoinak makadotok.