Read Termanu 2TAWARIKH 12 Bible Online

2TAWARIKH 12 - Termanu bible

2TAWARIKH 12

¹Lelek Rehabeam nangatutuun da'di leo manek-ka natea-nahele boema, ndia ma basa laun Israel-la lala'en-na ta taoafik neu MANETUALAIN hoholo-lalanen so'on,

²ma ala ta lilineka neun so'on. Hu ndia de MANETUALAIN hukus. Nai Rehabeam paleta neu teu kaliman-na boema, Sisak fo manek Masir-ra sapu-na Yerusalem,

³nenik kaleta musu lifun esa natun dua, solda'du manasa'e ndala lifun neehulu ma solda'du anak makadotok nanseli de ta leke-nala dede'un-nala fa fo solda'du Libia, Suki ma Sudan-nala lai dalek boe.

⁴Ana loso-na kota makota musu manai Yehuda boema ana tutulumatak losa leo Yerusalem neu.

⁵Nai lelek ndia Manek Rehabeam-ma, ma basa mauli-malanga Yehuda-la lakabubua lai Yerusalem so, nanahu lalai leme Sisak mai. Nabi Semaya mai de nafa'das nae, “MANETUALAIN nae leo ia, ‘Emi la'oela Au, da'di besak ia Au boeo la'oela emi, nalosa Sisak koasa emi.’ ”

⁶Manek-ka no basa mauli-malangan-nala manaku lae sila lasala-lasingo so. Lafa'da lae, “Hata fo MANETUALAIN taon ndia, tunga eno ndo matetun-na.”

⁷Lelek fo MANETUALAIN nita nae lakaloe-lakadae aoina-nala boema, Ana kokolak seluk no Semaya, nae, “Hu kande ala manaku sila sala-singon-nala, de neukose Au ta tao amopo-amates so'on. Neukose no lai-laik Au soi-tefa-alas; neukose Yerusalem ta nakalulutuk fa. Leomae leondiak boe, neukose

⁸Sisak koasa sila, fo ela ala bubuluk tao leo beek fo lamahele neu Au ma tao leo beek fo lamahele neu manakoasa daebafak-kala.”

⁹ Boema Manek Sisak-ka mai sapu-na kota Yerusalem-ma de ana loso neni bua-lo'a kabelik manai MANETUALAIN Uman-na, manai uma manek-ka, ma Manek Salomo taon-na sisili musu-lilopilas-ala boe.

¹⁰Rehabeam tao nggatis nenik sisili musu liti, de ana fes leo basa malanga solda'du matuaina fo manamanea uma manek-ka lelesuinan-nala.

¹¹Metema manek-ka neu leo MANETUALAIN Uman neu soona, basa manamanea-la leni sisili-musu sila-la, basa soona, ala pe'da falik-kasa leo kama dale neu boe.

¹²Hu kande manek-ka nakaloe-nakadae aoinan-na nai MANETUALAIN matan, ma hu kande bei hapu dede'a malole nai Yehuda boe, de MANETUALAIN nasa-melun neu Rehabeam-ma tenakhenin, de Ana ta tao namate-namopon makandondook fa.

¹³Rehabeam paleta nai Yerusalem de koasan-na boetai namatua-ka. Teun haahulu esa nai lelek ana da'di manek, de ana paleta teuk sanahulu hitu dalen-na nai Yerusalem, fo basa nusak Israel-la lala'en-na kotan fo MANETUALAIN helen soaneu da'di mamanak makaluku-makatele neun. Rehabeam inan nde Naama fo neme nusa Amon-na mai.

¹⁴Rehabeam tao tatao-nono'i mangalauk nanahu ana ta sanga enok fo tao tunga MANETUALAIN hihii-nanaun fa.

¹⁵Tutuik la'eneu Rehabeam neme makasososan-na losa mate'e-na ma bei-ba'in tutuin-na nanasulak nai Nabi Semaya susula Tutuin dale ma nai Nabi Ido susula Tutuin dale. Nai Rehabeam ma Yerobeam tepo-lelen-na, natee-natati-ka ka'da ana da'di tataasesa.

¹⁶Mate Rehabeam de latoin nai mane-manek manai kota Dauk-ka mamana late-na. Anamanen Abia nggatin da'di manek.