Read Termanu 2TAWARIKH 13 Bible Online

2TAWARIKH 13 - Termanu bible

2TAWARIKH 13

¹Nai Manek Rehabeam-ma paleta Israel neu teu ka sanahulu falu-na, Abia da'di manek Yehuda,

²de ana paleta teuk telu dalen-na nai Yerusalem. Inan nde Mikhaya fo Uriel neme kota Gibea mai, ana-na. Basa boema Abia no Yerobeam mulai latee-latati.

³Abia no solda'dun lifun natun haa, te Yerobeam no ndia solda'dun lifun natun falu.

⁴Solda'du bubua ka duak sila-la lasasalematak nai letelepak Efraim-ma. Abia kae leo Letek Zemaraim-ma poin-na neu boema naloo bou-bou neu Yerobeam ma hataholi Israel-la nae, “Mamanene!

⁵Emi bubuluk mae Amak, fo Israel MANETUALAIN-na tao hehelu-balataak basa no Dauk nae Dauk ma tititi-nonosin neukose paleta Israel losa dodoon-na. Hehelu-balataak ndia ta hapu ketu fan.

⁶Leomae leondiak boe, Yerobeam fo Nebat anan ndia la'ban Salomo fo manen-na paletan-na.

⁷Ana naloo nakabubua hataholi malela ha'da tak bubuak esa, de lakaseti Rehabeam fo Salomo anamanen-na tunga sila hihii-nanaun, fo nai lelek ndia muli-soluk nanseli ma ana ta lena-la'ban nalelak fa.

⁸Besak ia emi maedaenga emi hapu la'ban koasa fo MANETUALAIN fen neu Dauk tititi-nonosin, nanahu emi solda'dum-mala makadotok ma emi manuu sapi lilopilas fo Yerobeam taos da'di emi lamatua daebafam-ma.

⁹Ade emi ta usiheni la'iesak MANETUALAIN imam-imam fo Harum tititi-nonosin ma hataholi Lewi-la so hetu? Da'di neu ngganggatin-na emi ho'i su'di see fo nahiik da'di imam, sa'di hataholi ndia neni sapi esa do bi'ilopo hitu, soona emi fen da'di imam soaneu hata fo Manetualain ta nde ndia fa, nana eno-na leondiak ba'eneu leoina fe'ek-kala so'u sila imam-ma. Tehu ami ta tao leo ndiak fa.

¹⁰Ami mamahele mahele neu ami MANETUALAIN ma ami ta la'oela fan. Ami imam-imam-mala nde Harun tititi-nonosin-nala nahele, ma hataholi Lewi-la tulu-fali laheles.

¹¹Tunga-tunga fafai le'donoson ala tunu boomenik ma ala fe tutunu-hohotu nanatunuk soaneu MANETUALAIN boema ala sadia loti tunu-hotuk Tunga-tunga le'odaen-na ala de'de banuk-kala nai banueik lilopilas-sa. Ami tunga mahele MANETUALAIN paletan-nala, tehu emi la'oelan so.

¹²Ami mauli-malangam nde bee na MANETUALAIN mesak-kana ma basa imam manai ia-la. Ala laheheleaon basa soaneu puu trompet-ta, da'di leo ta'du-tana ba'eneu ami soaneu sapu-ma emi. Hai hataholi Israel-la lemin, boso la'ban Amak fo emi bei-ba'i kaim MANETUALAIN-na! Emi ta bisa sengi fa!”

¹³Ndia te, Yerobeam haitua solda'dun-nala seli soaneu leu sapu-la Yehuda solda'dun-nala leme dea mai, boema solda'dun-nala seli seluk sapu leme uluk mai.

¹⁴Lelek Yehuda solda'dun-nala lita lae lakahapi-la sila boema, ala nggasi loke tutulu-fafalik neu MANETUALAIN. Basa imam-mala puu trompet,

¹⁵boema Yehuda solda'dun-nala eki eeki musu ma ala tutulumatak de ala sapu-lalas, fo Abia nde nauli-nalangas-sala. Ala bei laloo bebou te, Manetualain sengi Yerobeam no solda'du Israel-la

¹⁶nalosa lalai. Manetualain fe hataholi Yehuda-la sengis.

¹⁷Abia taon-nalas kala matuaina de solda'dun-nala sengi solda'du Israel-la; mate sila solda'du neulaun lifun natun lima.

¹⁸Hataholi Yehuda-la sengi, nanahu ala lamahena Amak fo sila bei-ba'i kain-nala MANETUALAIN-na.

¹⁹Lelek Abia usi Yerobeam solda'dun-nala, ana loso-na kota de'ubee loo nggolo-nggolok manai titia-tatain-nala. Kota-kota sila-la nde Betel, Yesana ma Efron.

²⁰Nai lelek Abia paleta, Yerobeam ta hapu tao matalolole falik koasan-na fa. Mate'en-na MANETUALAIN taonisan.

²¹Nasafali-na, Abia boetai koasa. Saon sanahulu haa, anatoun duahulu dua ma anainan sanahulu nee.

²²Tutui fe'ek la'eneu Abia, ma la'eneu basa hala-kokolan ma tatao-nono'in nanasula basak nai Nabi Ido-na susula Tutuin dale so.