Read Termanu 2TAWARIKH 14 Bible Online

2TAWARIKH 14 - Termanu bible

2TAWARIKH 14

¹Mate basa Manek Abia de latoin nai mane-manek manai Kota Dauk-ka late mamanan-na boema, anamanen Asa nggatin da'di manek. No Asa paletan-na de nusak Yehuda tetu-temak teuk sanahulu dalen-na.

²Asa nandaa no MANETUALAIN dalen-na nenik ana tao hata fo ndoos ma matetuk ma malole.

³Ana si'uheni leoina fe'ek-kala mei tunu-hotun-nala ma mamana sosongo-tatangon-nala. Ana tao nakalulutuk lamatua daebafak-kala batu lutun-nala, ma lamatua daebafak Inak Asyera dodoki-dudulan diin-nala.

⁴Nadenu laun Yehuda-la laso'da tunga Amak, fo sila bei-ba'i kain-nala MANETUALAIN-na hihii-nanaun, ma ala tunga nanolin ma paletan-nala.

⁵Basa mamana sosongo-tatangok-kala ma mamana tutunu boomenik-kala, ana si'uhenis leme kota-kota Yehuda-la mai. Boema nusak ndia nee nee-lino lino nai paletan dae,

⁶nalosa ana hapu nafofo'a kota musu soaneu Yehuda kota-kota-nala. Teuk de'ubee dalen-na natee-natatik ta, nanahu MANETUALAIN fen so'dak mole-dame-a.

⁷Asa nafa'da laun Yehuda-la nae, “Malolelenak ata tao tatea-tahele kota-kota-la nenik tafofo'a papala nanadamak okofefeos ma uma puni madema-la boema lelesuina-la no ai betubalan-nala. Ita koasa nusak ia nanahu ita tunga ita MANETUALAIN hihii-nanaun so. Ana nakaboboi ita ma nanea ita so'dan-na nai ita nusan-na lala'en-na.” Boema ala mulai lafofo'a de lakababasak tatao-nono'ik ndia no malole.

⁸Manek Asa nanuu solda'du Yehuda lifun natun telu lanuu sisili musu ma tee-dongi ma solda'du Benyamin lifun natun dua faluhulu lanuu sisili musu ma kokouk. Solda'du sila-la basa-basas palani mesa-mesan ma nanananolik-kala.

⁹Faik esa boema, hataholi Sudan esa na'de Zerah no solda'du juta esa ma kaleta musu natun telu de sapu-la Yehuda. Ala tutulumatak losa Maresa.

¹⁰Boema Asa kalua mai de nasasalematak no Zerah, de duas ito-ato esa-esak mamanan-na nai Bafak Zefata fo deka no Maresa.

¹¹Boema Asa hule-haladoi neu MANETUALAIN nae, “Amak, ka'da O nde hapu tulu-fali manatapandoes-sala neme mabe'i-balakaik-kala mai. Tulu-fali ami besak ia, ou ami MANETUALAIN! Ami masalai ka'da neu O ma no O na'dem-ma, ami kalua matee-matati la'ban solda'du de'u-de'u basa ia-la. Amak, O nde ami MANETUALAIM-ma. Boso po'ilotak hataholi daebafak esa boen sengi O.”

¹²Boema Asa no solda'du Yehuda-la sapu-la solda'du Sudan-nala. MANETUALAIN sengi solda'du Sudan-nala nalosa lalai.

¹³Asa no solda'dun-nala usis losa Gerar. Mate Sudan solda'dun makadotok, nalosa solda'dun-nala malehenis nanahu MANETUALAIN tao nakalulutuk-kasa de solda'du Yehuda-la kalo leni sila hata-heton makadotok. Basa boema solda'du Yehuda-la tao lakalulutuk kota-kota fo nai nusak manai Gerar titia-tatain-nala, nanahu MANETUALAIN taon-na nusak ndia laun-na bii-lamata'u lanseli. Solda'du Yehuda-la loso-la basa kota sila-la ma ala hapu hata-heto makadotok.

¹⁵Ala sapu-la manafoo bana-manu-la ofun-nala boe, de ala foo leni bi'ilopo ma onta makadotok. Basa ndia boema, ala fali leo Yerusalem leu.