Read Termanu 2TAWARIKH 15 Bible Online

2TAWARIKH 15 - Termanu bible

2TAWARIKH 15

¹Manetualain Dula dalen-na koasan-na Nabi Azarya fo Obed anan-na,

²nalosa neu natongon-no Manek Asa, de nafa'da nae, “Hai, Manek Asa, ma basa Yehuda ma Benyamin laun-nala lemin! Mamanene! Te MANETUALAIN deka no emi metema emi deka moon. Metema emi moke MANETUALAIN natutu'dun-na soona, neukose Ana fen mai. Tehu metema emi ta taoafik neu fan soona, Ndia boeo neukose Ana ta taoafik neu emi boen.

³Doon-na seli, Israel ta namahele neu Manetualain fo ndoos-sa, ta lanuu hoholo-lalanek fo muse ala tungan, ma ta lanuu imam-imam fo lanoli fas.

⁴Tehu lelek fo lai toto'a-sosotak-ka dalek, besak-ka loke tutulu-fafalik neu Amak, fo Israel MANETUALAIN-na. Ala loke natutu'dun-na, de Ana fen mai.

⁵Nai tepo-lelek ndia hataholi-a ta hapu leo-la'o no so'da-molek fa, nana nai basa nusa-nusak-kala hapu tasibu matuaina.

⁶Leoina esa tuni-ndeni leoina esa, ma kota esa tuni-ndeni kota esa, nanahu Manetualain fe tasibu matuaina neu sila.

⁷Tehu emi muse matetea-mahehele dalem-mala ma mapalani. Emi ue-osam neukose neni buna-boak.”

⁸Lelek fo Asa namanene Azarya fo Obed anan ndia hala-kokolan boema, natetea-nahehele dalen-na. Ana si'uheni basa sosongo-tatangok manai nusak Yehuda ma Benyamin, ma nai ana sengi kota-kota manai letelepak Efraim-ma, boema ana tao nahii MANETUALAIN mei tunu-hotun fo nanape'dak nai MANETUALAIN Uman-na so'dan-na.

⁹Hataholi Efraim, Manasye, ma Simeon makadotok mai lakabubua da'di esa loo Asa, de ala leo lai nusan dale, nanahu lita lae MANETUALAIN tulu-fali manek-ka. Asa nadenu basa hataholi sila-la sama-sama loo Yehuda ma Benyamin laun-nala

¹⁰lakabubua lai Yerusalem. De ala lakabubua nai bula katelu-a teuk ka sanahulu liman fo Asa ho'u paleta.

¹¹Nai faik ndia ala tunu-hotu fe MANETUALAIN sapi natun hitu ma bi'ilopo lifun hitu fo ala foo leni bana manu sila leme musu dale mai.

¹²Ala tao hehelu-balataak neu MANETUALAIN lae no dale katematuak ma sila aopaa samanen, neukose laso'da tunga Amak, fo sila bei-ba'i kain-nala MANETUALAIN-na.

¹³Su'di see boe, lasik do mulik, touk do inak, fo ta laso'da tunga MANETUALAIN hihii-nanaun fa soona, tao leo bee o nanahukunisak.

¹⁴No hala napane'ek, ala soo neu MANETUALAIN lae neukose ala ho'u lahele hehelu-balataak ndia. Basa boema ala eeki-latadale ma ala puu trompet-ta.

¹⁵Basa laun Yehuda lala'en-na lamahoko-setelee nanahu ala soo-supa no dale katematuak. Ala lamahoko makaluku-makatele neu MANETUALAIN, ma MANETUALAIN boeo nau sipok-kasa. Ana fes so'da-molek nai sila nusan-na.

¹⁶Basa boema Asa kaluaheni bein Maakha neme nangatutuun fo da'di leo Ina Manek nana ana taon-na dodoki-dudula sosongo-tatangok sosoa-piaok soaneu Asyera, fo lamatua dabafak inak fo manafe bubu'u-palusa lalole. Asa hea nabuu dodoki-dudulak ndia de ana tao nakalulutuk-kana, boema ana hotuhenin neme Bafak Kidron-na.

¹⁷Leomae leondiak boe, Asa ta tao nakalulutuk la'iesak mamana sosongo-tatangok manai nusak ndia fa, tehu nai fai maso'dan-na dalek, ana lilineka nahele neu MANETUALAIN.

¹⁸Basa lilopilas ma lilofulak boema hata-heto fo aman ma ndia kalo lenis leme musu dale mai-a, ana pe'das nai MANETUALAIN Uman soaneu da'di MANETUALAIN nuun.

¹⁹Losa teu kateluhulu liman-na fo Asa paleta, natee-natatik ta nai nusak ndia so'on.