Read Termanu 2TAWARIKH 19 Bible Online

2TAWARIKH 19 - Termanu bible

2TAWARIKH 19

¹Yosafat fo manek Yehuda losa uma manen-na nai Yerusalem no so'da-molek boema,

²nabi esa na'de Yehu fo Hanani anan-na ana mai nataa manek-ka. Nabi ndia nafa'dan nae, “Ade nandaa Ama Manek tulu-fali hataholi mangalauk ma mook hataholi manamamanasa MANETUALAIN-na do? Ama Manek tatao-nono'in ndia nde taon-na MANETUALAIN namanasa Ama Manek.

³Leomae leondiak boe, bei hapu hata malole nai Ama Manek. Ama Manek si'uheni basa lamatua daebafa Inak Asyera dodoki-dudulan fo laun-na sene-do'ok-ka ma Ama Manek boeo sanga enok soaneu maso'da tunga Manetualain hihii-nanaun.”

⁴Manek Yosafat-ta mamana leleo-na nai Yerusalem. Tehu nasi'a ana neu donge-dama laun-na nai basa nusak-ka lala'en-na soaneu nokes ala fali leo MANETUALAIN fo sila bei-ba'i kain-nala Manetualain-na.

⁵Nai basa kota fo makota musu manai Yehuda-la, ana so'u manamaketu-mala'dik,

⁶ma ana fes paleta nde ia nae, “Tao hata esa nenik dudu'a-aafi manatee tenok, nanahu emi ta maketu-mala'di menik hataholi daebafak na'den fa, te nenik MANETUALAIN na'de-na Ana taoafik besa-besa neu emi nai lelek emi maketu-mala'di dede'ak.

⁷Emi muse bii-mamata'u neu MANETUALAIN, ma tao hata esa no besa-besa, nana ita MANETUALAIN namanasa hataholi manatao peko-pakik-ka, boso mete matak do sipo hataholi fo ana solo o dalem-ma nenik doik.”

⁸Nai Yerusalem boeo, Yosafat so'u manamaketu-mala'dik-kala leme hataholi Lewi-la, imam-mala ma lasi nggolok-kala. Sila muse laketu-lala'di dede'ak la'eneu la'olena MANETUALAIN hoholo-lalanen ma dede'a fe'e-fe'ek-kala.

⁹Yosafat fe manamaketu-mala'dik sila la paleta nde ia nae, “Makalala'ok emi bela-ba'um no mamahele neu MANETUALAIN. Tunga paletan-na nai basa hata lala'en fo emi taon.

¹⁰Metema emi nonoo-mala leme kota fe'ek mai fo leni fe emi dede'a kanisak esa, la'olena hoholo-lalanek do la'olena susula nakeketu-ka soona, ela leo bee na emi fes natutu'duk. No enok ndia ala ta lasala neu MANETUALAIN fa, ma neukose MANETUALAIN ta namanasa emi do sila boen. Tao tunga paleta ia, soona neukose emi ta masala fa.

¹¹Au fe Imam matuaina Amarya koasa mademaina neu basa dede'ak fo la'eneu agama hoholo-lalanen. Au fe Zebaja, fo Ismael anan-na, fo nde filana Yehuda koasa mademaina neu dede'a fe'ek lala'en-na. Hataholi Lewi-la bela-ba'un nde lanea fo ela lakalala'ok manamaketu-mala'dik nakeketu-na. Tunga natutu'duk ia-la ma tao-no'i menik napalanik. Ela leo bee na MANETUALAIN nai hataholi fo manatao tunga ndoos ma matetuk-ka boboan-na!”