Read Termanu 2TAWARIKH 22 Bible Online

2TAWARIKH 22 - Termanu bible

2TAWARIKH 22

¹Nai natee-natatik esa neme hataholi Arab bubuak esa dalek, ala taolisa la'iesak Yehoram anamanen-nala de ela ka'da Ahazia fo anamane mulin-na. Hu ndia de Yerusalem laun-nala so'u Ahazia da'di manek nggati aman.

²Ahazia teun duahulu dua boema ana da'di manek, de ana paleta nai Yerusalem teuk esa dalen-na. Ahazia boeo naso'da sama leo Manek Ahab-pa teidale-bobongin, nanahu inan Atalya nanoli-nafa'dan fo ana tao tatao-nono'i mangalauk. Atalya nde bee na Manek Ahab-pa anafe'on, fo Omri, manek Israel-la upun ndia.

⁴Ahazia nasala-nasingo neu MANETUALAIN sama leo Ahab teidale-bobongin, nanahu mate aman boema sila nde da'di manamanoli-manamafa'dan. Manamanoli-manamafa'dak sila-la nde tao soe fen-nana.

⁵No sila nanoli-nafa'dan, de nakabubua da'di esa no Yoram fo manek Israel-la fo latee-latati la'ban Hazael fo manek Siria. Ala latee-latati nai Ramot, fo nusa Gilead-a. Yoram nakahina nai natee-natatik ndia dalek,

⁶boema ana fali leo kota Yizreel-la neu fo puli-namo'do, boema Ahazia neu donge-daman nai naa.

⁷Manetualain naketua basa nae neukose Ahazia natongon-no mamaten-na, nai lelek neu donge-dama Yoram. Nai donge-damak ndia, Yoram hapu lena-la'bak neme touk esa na'de Yehu fo Nimsi anan-na, fo MANETUALAIN hele basan soaneu ana tao namate-namopo Manek Ahab-pa teidale-bobongin.

⁸Lelek Yehu bei nakalala'ok MANETUALAIN huhuku-dodokin neu teidale-bobongik ndia te, natongon-no Yehuda hataholi matua-mademan mangalauk bubuak esa, ma Ahazia tolanoon-nala anan-nala nde tunga nai donge-damak ndia dalek-ka. Boema Yehu taonisa la'iesa-kasa.

⁹Basa boema nadenu hataholi neu sanga Ahazia fo nai lelek ndia, ana bei ke'ke nai Samaria. Ala hapu Ahazia boema, loon leo Yehu neu de ana taonisan. Leomae leondiak boe, ala latoin boe, nanahu ala fe ha'da-holomata neu Ahazia ba'in Manek Yosafat-ta, namahele neu MANETUALAIN no dale katematua-na. Neme Ahazia teidale-bobongin-na mai, ta hapu hataholi esa boen napalani da'di manapaleta fa.

¹⁰Lelek fo Atalya bubuluk nae anan fo Manek Ahazia maten so boema, ana po'i paleta fo ela taonisa basa bobongi manek manai Yehuda lala'en-na.

¹¹Ahazia tolanoo inaanan esa na'de Yoseba fo ana sao imam esa na'de Yoyada. No denge-dengek, ana ho'i-na Ahazia anatoun esa na'de Yoas neme manek-ka ana-anan fo Atalya sanga taonisak-kala. Ni'iana ndia no inak fo manamasu'un-nana nai kama esa dalek nai MANETUALAIN Uman. Eno-na leondiak, Yoseba soi-tefa-na ni'iana ndia, de nalosa Atalya ta taonisa fan.

¹²Teuk nee dalen-na, Yoas nananafunik nai MANETUALAIN Uman, fo ndia te Atalya paleta da'di leo ina manek.