Read Termanu 2TAWARIKH 24 Bible Online

2TAWARIKH 24 - Termanu bible

2TAWARIKH 24

¹Yoas teuk hitu nai lelek ana manek Yehuda, ma ana paleta nai Yerusalem teuk haahulu dalen-na. Inan na'de Zibya neme kota Bersyeba mai.

²Nai lelek Imam Yoyada bei naso'da, Yoas tao-no'i dede'ak fo nandaa no MANETUALAIN dalen-na.

³Yoyada hele fe Yoas inak dua soaneu da'di saoinan, de Yoas hapu anatouk ma anainak neme inak sila mai.

⁴Yoas paleta teuk de'ubee dalen-na boema, ana naketu soaneu tao nahii MANETUALAIN Uman-na.

⁵Ana paleta basa imam-mala ma hataholi Lewi-la fo leu leo laun manai kota-kota Yehuda-la fo loke dik neme basa laun-na lala'en-na mai fo tunga teuk tao lahii MANETUALAIN Uman-na. Nadenus fo lakalala'ok bela-ba'uk ndia no lai-laik, tehu hataholi Lewi-la lakamama'ak.

⁶ Hu ndia de namoo Imam Yoyada, fo sila mauli-malangan-na, boema nae, “Ade Musa fo MANETUALAIN atan-na ta nadenu laun-na bae bea soaneu MANETUALAIN Uman-na tao nahii-na fa do? Besak ia, tao le'e de Ama ta makaseti hataholi Lewi sila-la fo leu susu bea neme laun manai Yehuda ma Yerusalem-mala mai fa?” (

⁷Hataholi manatunga Atalya, fo ina mangalauk ndia, tao nalutu MANETUALAIN Uman-na so, ma bua-lo'a makadotok fo nanafe hehelik soaneu Manetualain-na, ala pakes soaneu sene-do'ok neu Baal-la so.)

⁸Boema manek-ka paleta fo ela hataholi Lewi-la tao-la peti doik esa fo pe'dan neu lelesuina manai MANETUALAIN Uman-na matan-na.

⁹Nai basa Yerusalem ma Yehuda lala'en-na nanapo'a-bengak lae basa hataholi la muse bae bea soaneu MANETUALAIN, sama leo hata fo Musa paletan.

¹⁰Po'a-bengak ndia nandaa no laun-na ma sila mauli-malangan dalen-nala. Basa-basas mai de ala tao sila doi bean-na leo peti doik ndia dalek neu.

¹¹Tunga faik hataholi Lewi-la leni peti doik ndia leo manek-ka hataholi mana'a ngga'din-nala neu fo ala palisak-kana. Metema peti ndia henun soona, nusaina manasulak susulan-na, malanga Imam Matuaina lima boa konan-na kaluaheni doik-kala, boema ala pe'da falik peti ndia neu mamana makasososan-na. Ala tao leondiak tunga faik, de doik fo nananakabubuak-kala makadotok nanseli.

¹²Basa boema manek-ka ma Yoyada fe doik sila-la leo hataholi manamalanga MANETUALAIN Uman-na tao nahiin ndia. Boema hataholi Lewi sila-la bae tuka batu, tuka ai, ma tuka liti soaneu tao-no'i tatao-nono'ik ndia.

¹³Boema tuka sila-la mulai tao lahii MANETUALAIN Uman ndia. Sila basa-basas tao-no'i no malole-na nalosa mate'en-na Uma ndia natea-nahele ma mana'ahiik sama leo makasososan-na.

¹⁴Basa tatao-nono'ik ndia boema, ala fe lilopilas ma lilofulak bei elak-kala leo manek-ka ma Yoyada. Boema ala pake liliopilas ma lilofulak sila-la soaneu tao MANETUALAIN Uman-na bua-lo'an, fo nde: bua-lo'as soaneu feta makaluku-makatele, soaneu tutunu-hohotu nanatunuk, pingak, ma boomenik, ma mango. Nai Imam Yoyada maso'dan-na dalek fo nai lelek bei naso'da ana tunu-hotu nahele tutunu-hohotu nanatunuk nai MANETUALAIN Uman.

¹⁵Yoyada namalasi de besak-ka maten nai lelek teun natun esa teluhulu.

¹⁶Latoin nai mane-manek manai Kota Dauk-ka late mamanan-na soaneu lafandele tatao-nono'i malolen-na neu Manetualain neu MANETUALAIN Uman-na ma neu hataholi Israel-la.

¹⁷Mate basa Yoyada boema, mauli-malangan Yehuda-la dudungu-papau Yoas nalosa ana ta taoafik neu Yoyada nanolin-na so'on.

¹⁸Boema laun-na ta sene-do'ok nai MANETUALAIN Uman, fo sila bei-ba'i kain Manetualain-na so'on, tehu ala sene-do'ok neu sosongo-tatangok ma lamatua daebafa Inak Asyera dodoki-dudulan. Sila sala-singon ndia taon-na MANETUALAIN namanasa Yehuda ma Yerusalem.

¹⁹MANETUALAIN nadenu nabi-la fo leu ka'is, fo ela lamahele falik neu MANETUALAIN, tehu laun-na ta nau lamanene fa.

²⁰ Boema Manetualain Dula dalen-na koasan-na Zakharia fo Imam Yoyada anan-na. Zakharia napadeik neu laun-na matan, boema naloo bou-bou nae, “MANETUALAIN nafa'da nae, ‘Taole'e de emi ta tunga Au paletang-ngala fa, ma emi tao soe fe emi aoinam-ma. Emi ta taoafik neu Au fa, de Au boeo ta taoafik neu emi boen!’ ”

²¹Tehu laun-na tao nakabua makahatuk soaneu la'ban Zakharia, de Manek Yoas-sa tunga nai nakabubuak ndia dalek. Ana ta nafandele Yoyada fo Zakharia aman tatao-nono'i malolen-na ma lilinekan fa. No manek-ka paletan-na de Zakharia nanapiak nenik batu losa maten nai MANETUALAIN Uman-na so'dan-na. Nai lelek Zakharia sanga ketu hahae-na, naloo bou-bou nae, “Sa'di leo bee na MANETUALAIN nita emi tatao-nono'im ia fo Ana balas-sana!”

²³Teuk ndia boe, fo nai teu beuk-ka dalek, solda'du Siria-la sapu-la Yehuda ma Yerusalem. Ala taolisa la'iesak mauli-malangan ma ala lu'a-lepa leni hata-heto nanakalok makadotok leo Damsyik leu.

²⁴Solda'du Siria-la dede'un-na ka'da lumanak mesan, tehu MANETUALAIN po'ilotak-kasa sengi solda'du Yehuda-la fo dede'un-na makadotok nanseli, nanahu hataholi Yehuda-la ta taoafik neu Amak fo sila bei-ba'i kain MANETUALAIN-na fa. No enok ndia, MANETUALAIN huku Manek Yoas-sa.

²⁵Yoas nakahina belak. Lelek solda'du musu la'o boema, hataholi mana'a ngga'din dua tao nakabubua makahatuk. Ala taolisan neme pepe'un lain da'di leo babalak neu ana taonisa Imam Yoyada anan-na. Latoi Manek Yoas-sa nai Kota Dauk, tehu ta nai mane-manek-kala late mamanan-na fa. (

²⁶Hataholi manatao nakabubua makahatuk fo manala'ban-nana nde bee na nde Zabad, fo Simeat ina Amon-na anan-na, ma Yozabad, fo Simrit ina Moab-pa anan-na.)

²⁷Tutui fe'ek la'eneu Yoas anan-nala, la'eneu hala neneuk ta malole la'eneun, ma la'eneu tao leo beek fo ana tao nahii MANETUALAIN Uman-na, basa-basas nanasulak nai mane-manek-kala Susulan Manamafa'da Mangalele'don dale. Amazia, fo Yoas anamanen-na, nggati aman da'di manek.