Read Termanu 2TAWARIKH 28 Bible Online

2TAWARIKH 28 - Termanu bible

2TAWARIKH 28

¹Ahas da'di maneuk neu teu kaduahulu-na, de ana paleta nai Yerusalem teuk sanahulu nee dalen-na. Ana ta tunga bai'in Manek Dauk-ka ha'da-tatao malolen-na fa, te ana tao hata fo ta nandaa no MANETUALAIN dalen-na fa.

²Ana naso'da sama leo mane-manek Israel-la, de nadenu hataholi tao Baal dodoki-dudulan neme liti mai,

³boema ana hotu boomenik nai Bafak Hinom-ma. Nakalenak ana tunu-hotu anamanen-na da'di leo tutunu-hohotuk neu sosongo-tatangok, tunga ha'da-tatao mangalauk neme hataholi-hataholi fo MANETUALAIN usihenis leme nusa Kanaan-na nai lelek hataholi Israel-la masok leo nusak ndia dalek leu.

⁴Ahas fe tutunu-hohotuk ma ana hotu boomenik nai mamana sosongo-tatangok neu lamatua daebafak-ka nai lete-letek-kala ma nai ai doo manaleloakak-kala huun-na.

⁵ Hu kande Manek Ahas-sa nasala-nasingo, de MANETUALAIN po'ilotak manek Siria sengin, de ana foo neni hataholi Yehuda makadotok nanseli da'di leo hataholi nanafook leo Damsyik neu boe. MANETUALAIN boeo po'ilotak Manek Pekah fo Remalya neme Israel anan-na segin, de nai faik esa dalen-na ana taonisa Yehuda solda'du palanin lifun natun esa duahulu. Sila bei-ba'i kain MANETUALAIN po'ilotak basa sila-la da'di, nanahu Yehuda laun-nala ta taoafik neu MANETUALAIN so'on.

⁷Ahas anamanen fo mana'de Maaseya, Zikhri fo Israel malanga solda'du matuainan esa taonisan. Zikhri boeo taonisa Azrikam fo uma manek-ka manaito-aton, ma Elkana fo manek-ka limaboa konan-na.

⁸Leomae leondiak boe, hataholi Yehuda-la nde bee na leoina esa loo leoina Israel-la, tehu solda'du Israel-la ho'u-la inak lifun natun dua ma ni'iana-la, de ala foo lenis leo Samaria leu sama-sama loo bua-lo'a nanakalok makadotok nanseli.

⁹MANETUALAIN nabin esa na'de Oded, ana leo nai kota Samaria. Nai lelek solda'du Israel-la fali no leni hataholi nanafook neme Yehuda mai boema, Oded neu natongon-nos nai lelek ala sanga masok lala kota dale. Nafa'da nae, “Emi sengi hataholi Yehuda-la so, nanahu emi bei-ba'i kaim-mala MANETUALAIN namanasas. Tehu MANETUALAIN namanene tao leo beek emi taomisa solda'du Yehuda sila-la no dale susue-lalai taak.

¹⁰Ma besak ia emi sanga tao hataholi Yerusalem ma Yehuda-la da'di emi atam! Ade emi ta bubuluk mae emi boeo masala-masingo basa neu emi MANETUALAIN so do ta?

¹¹Mamanene! Te hataholi nanafook ia-la nde bee na, emi tolanom-mala. Da'di madenus fo ala fali le'us. Metema ta soona, neukose MANETUALAIN namanasa fo Ana huku-doki emi.”

¹²Israel lasi nggolon haa fo nde, Azarya fo Yohanan anan-na, Berekhya fo Mesilemot anan-na, Yehizkia fo Salum anan-na ma Amasa fo Hadlai anan-na boeo ala la'ban solda'du manafalik sila-la tataon ndia.

¹³Lafa'da lae, “Boso moo hataholi nanafook sila-la leo ia mai! Ita tasala-tasingo basa neu MANETUALAIN so, de ita sala-singon dai ma lena soaneu nanahukuk. Besak ia emi nau tao hata esa fo neukose ka'da nakadaik ita sala-singon.”

¹⁴Boema solda'du sila-la fe basa hataholi nanafook sila-la ma bua-lo'a kakalok sila leo laun-na ma sila mauli-malangan-nala.

¹⁵Boema lasi nggolo kahaak sila-la, fo'a de ala ito-ato hataholi nanafok sila-la. Ala baba'e bua papakek fo ala kalo lenik sila-la neu basa hataholi nanafok fo manapaluu-kala. Boeo ala baba'e ta, bueis, nana'ak ma nininuk. Ala puli-lamo'do hataholi nanafook manamakahinak-kala nenik mina setun. Bee ta la'oknala fa soona, ala fuan neu keledei lain, boema loo basa hataholi nanafook sila-la leo Yerikho fo kota ai kurma-la, fo ela ala bisa fali-le'us leo sila nggolo-ta'dun nai Yehuda. Basa ndia boema, hataholi Israel-la fali le'us leo Samaria leu.

¹⁶Hataholi Edom-mala mulai sapu-la seluk Yehuda, de ala ho'u-la hataholi makadotok. Hu ndia de Manek Ahas-sa noke Tiglat-Pileser fo manek Asyur-ra, fo ela ana haitua tutulu-fafalik.

¹⁸Nai lelek ndia boe, hataholi Filistin-nala bei sapu-la nusa-nusak manai letek-ka huun muli, ma nai nusak manai Yehuda boboan kona. Ala loso-la kota Bet-Semes, Ayalon, ma Gederot, boema kota Sokho, Timna, ma Gomso, boema nggolo-nggolok manai nusak-kateluk sila-la titia-tatain-nala, boema ala leo lahele leme ndia.

¹⁹Hu kande Ahas fo manek Yehuda la'oela MANETUALAIN ma ana paleta laun-na ta no malolen-na fa, boema MANETUALAIN fe toto'a-tataak neu Yehuda.

²⁰Manek Asyur ndia ana mai ta soaneu tulu-fali Ahas fa, tehu soaneu tao susan.

²¹No nakasetik, Ahas ho'i lilopilas neme MANETUALAIN Uman-na, neme uma manek-ka, ma neme basa laun-na mauli-malangan uman-nala mai, boema ana fen leo manek Asyur-ra neu. Tehu ndia boeo, sosoa-ndandaan ta ba'eneun.

²²Nai maso'dak fo henuk no toto'a-tataak ndia dalek, Ahas boetai tao sala-singok neu MANETUALAIN.

²³Ana tao soe aoinan-na ma laun-na, nanahu ana fe tutunu-hohotuk neu hataholi Siria-la lamatua daebafan-nala, fo manatao kalan-nana. Ana dodoo nae, “Siria lamatua daebafan-nala tulu-fali mane-manek Siria-la so, da'di metema au fes tutunu-hohotuk soona, neukose ala tulu-fali-la au boe.”

²⁴Basa boema ana ho'i-na basa MANETUALAIN Uman-na bua-lo'an de ana tao nakalulutuk-kasa. Boema ana kena MANETUALAIN Uman-na, ma napadedeik mei tunu-hotuk nai basa Yerusalem lala'en-na.

²⁵Nai basa kota ma nggolok manai Yehuda, ana nafofo'a mamana sosongo-tatangok soaneu ana hotu boomenik ba'eneu leoina fe'ek-kala lamatua daebafan-nala. No enok ndia, ana taon-na bei-ba'i kain-nala MANETUALAIN namanasan.

²⁶Tutui fe'ek la'eneu paletan-na, tatao-nono'in neme makasososan losa mate'en-na, nanasulak nai Mane-manek Yehuda ma Israel-la susula Tutuin dale.

²⁷ Mate Ahas de latoin nai Yerusalem, tehu ta nai mane-manek-kala late mamanana fa. Anamanen Hizkia nggatin da'di manek.