Read Termanu 2TAWARIKH 29 Bible Online

2TAWARIKH 29 - Termanu bible

2TAWARIKH 29

¹Hizkia teun duahulu lima boema ana da'di manek Yehuda, de ana paleta nai Yerusalem teuk duahulu sio dalen-na. Inan na'de Abia fo Zakharia anan-na.

²Hizkia tao hata fo nandaa no MANETUALAIN dalen-na sama leo bei-ba'i kain Manek Dauk-ka.

³Hizkia paleta neu bula kaesa nai teu makasososak-ka dalek, ana soiheni MANETUALAIN Uman-na lelesu-nala de nadenu hataholi tao nahiis.

⁴Nadenu imam-imam ma hataholi Lewi-la lakabubua lai MANETUALAIN Uman-na so'dan boboan dulu,

⁵de ana kokolak nos. Ana kokolak nae, “Emi, fo hataholi Lewi-la, muse tao malalao-malalafu aoina-mala soaneu MANETUALAIN, ma tao malalao-malalafu emi bei-ba'i kaim MANETUALAIN Uman-na. Basa hata fo manatao nanggenggeo uma ndia, muse tao heok-kasa.

⁶Ita bei-ba'i kain-nala ta lilineka neu ita MANETUALAIN fa, de ala tao hata fo ta nandaa no dalen-na fa. Ala ta taoafik neu fan, ma ala ta lafaduli mamana leleo-na fa.

⁷Ala kena MANETUALAIN Uman-na lelesu-nala, ma ala fuulisa banu-nala. Ala ta hotu boomenik nai MANETUALAIN Uman-na fa, ma ala ta fe tutunu-hohotu nanatunuk neu Manetualain fo hataholi Israel-la sene-do'ok-ka fa.

⁸Boema MANETUALAIN nai nasa-melun-na dalek, Ana huku-doki hataholi Yehuda ma hataholi Yerusalem-mala. Ma emi basa-basam-mala bubuluk mae MANETUALAIN nakeketun ndia taon-na basa hataholi-la nggenge-la lanseli.

⁹Ita aman-nala mates nai natee-natatik-ka dalek, ma ita sao-anan nanafook da'di leo hataholi nanafook.

¹⁰Besak ia au nau emi tao hehelu-balataak moo Amak, fo Israel MANETUALAIN-na, fo ela Ana boso boe namanasa ita bai.

¹¹Anang-ngala lemin, boso boe makamama'ak-kana bai, nana MANETUALAIN helek-ka nde emi soaneu makaluku-makatele ma mamahele neun, boema hotu boomenik ma mauli-malanga laun-na fo ala sene-do'ok.”

¹²Nai lelek ndia, hataholi Lewi manai ndia nde bee na: Neme teidale-bobongik Kehat-ta: Mahat fo Amasai anan-na, ma Yoel fo Azarya anan-na Neme teidale-bobongik Merari-a: Kish fo Abdi anan-na, Azarya fo Yehaleleel anan-na Neme teidale-bobongik Gerson-na: Yoah fo Zima anan-na, ma Eden fo Yoah anan-na Neme teidale-bobongik Elisafan-na: Simri ma Yeiel Neme teidale-bobongik Asaf-fa: Zakharia ma Matanya Neme teidale-bobongik Heman-na: Yehiel ma Simei Neme teidale-bobongik Yedutun-na: Semaya ma Uziel.

¹⁵Basa boema laloo lakabubua hataholi Lewi fe'ek-kala fo sila-basa-basas tao lalalao-lalalafu aoina-nala. Basa ndia soona, nandaa no manek-ka paletan-na, de basa imam-mala masok leo MANETUALAIN Uman dale leu de ala tao lalalao-lalalafu aoinan-nala tunga MANETUALAIN hoholo-lalanen. Basa hata manggenggeok-kala ala kalua henis de lenis leo MANETUALAIN Uman-na so'dan-na neu. Hataholi Lewi-la lenis leme ndia leo Bafak Kidron-na neu fo nai kota deak.

¹⁷Ala mulai tatao-nono'ik ndia nai bula kaesa fain esa. Neu fain falu boema, ala tao lalalao-lalalafu basa MANETUALAIN Uman-na so'dan-na losa mamana natotongok manai uma matan-na. Basa boema, nai faik falu dalen-na seluk, ala tao lalalao-lalalafu basa uman ndia lala'en-na, losa basan nai bulak ndia fain sanahulu nee.

¹⁸Boema hataholi Lewi sila-la leni fe Manek Hizkia halak lae, “Ami tao malalao-malalafu basa MANETUALAIN Uman-na lala'en-na so, ma mei tunu-hotu nanatunuk-ka boe, mei soaneu pe'da loti nanasadia-ka, ma basa bua-lo'an-nala.

¹⁹Ami boeo ho'i falik bua-lo'as fo Manek Ahas-sa pe'da heok-kasa nai lelek ana ta taoafik neu MANETUALAIN nai fai paletan-na dalek fa. Basa bua-lo'as sila-la, ami pe'da hehelik seluk-kasa soaneu MANETUALAIN, de besak ia lai mei tunu-hotuk-ka matan-na.”

²⁰Manek Hizkia ta nahani naladook-ka so'on, de naloo nakabubua lasi nggolok-kala, boema ala la'o sama-sama loon leo MANETUALAIN Uma leu.

²¹Soaneu tutunu-hohotu fe do'o do ampon neu manek-ka teidale-bobongin ma Yehuda laun-nala sala-singon, ma soaneu tao nalalao-nalalafu MANETUALAIN Uman-na, de leni sapi mane hitu, bi'ilopo mane hitu, bi'ilopo ana hitu ma bi'ihii mane hitu. Manek-ka nadenu imam-imam fo Harun tititi-nonosin-nala tunu-hotu bana sila-la nai mei tunu-hotuk lain da'di leo tutunu-hohotu nanatunuk.

²²Ala do'do sapi sila-la boema imam-mala pisi daan-nala neu mei tunu-hotuk-ka. Basa boema, ala tao leondiak boe neu bi'ilopo kahituk-kala ma bi'ilopo ana kahituk sila-la.

²³Mate'en-na ala hela leni bi'ihii kahituk sila-la leo manek-ka ma laun fo ala bei sene-do'ok lai ndia, boema sila basa-basas lalaa liman-nala neu bi'ihiik sila-la lain.

²⁴Basa ndia boema, imam-mala do'do bi'ihiik sila-la, de ala po'a daan-na neu mei tunu-hotuk-ka, fo da'di leo tutunu-hohotuk sala-singok hapu do'o do ampon ba'eneu laun-na lala'en-na. Ala tao dede'ak ndia nanahu manek-ka paleta basa fo ela tao tutunu-hohotu nanatunuk ma tutunu-hohotuk sala-singok hapu do'o do ampon ba'eneu laun Israel-la lala'en-na.

²⁵Nandaa no natutu'du-natutu'duk fo MANETUALAIN fen neu Dauk tunga Nabi Gad, fo naue-nale'di fe manek-ka, ma tunga Nabi Natan-na, de manek-ka pe'da hataholi Lewi-la nai MANETUALAIN Uman, fo lakamina kecapi ma gambus,

²⁶sama leo Dauk pakek-ka. Ana pe'da imam manafuu trompet-ala lai ndia boe.

²⁷Hizkia fe ta'du-tana fo ela feta tutunu-hohotuk-ka mulai leona. Lelek ala fe tutunu-hohotuk, hataholi-la mulai lakamee koa-kio neu MANETUALAIN, ma basa manamakaminak sasanu-la fuu trompet boema lakaminak sasanu fe'e-fe'ek-kala.

²⁸Manek Hizkia ma basa hataholi manai sila-la sene-do'ok neu MANETUALAIN nai lelek manamakameek-kala lakamee lahele ma manamakaminak sasanu-la lakaminak lahele losa ha'i na'a basa tutunu-hohotuk sila-la.

³⁰Manek-ka ma lasi nggolok-kala ladenu hataholi Lewi-la lakamee soaneu MANETUALAIN kokoa-kikiok fo Dauk ma Nabi Asaf-fa tao nakameek-kala. Basa hataholi-la lakamee no namahokok nanseli ma ala senek fo lakaluku-lakatele neu Manetualain.

³¹Basa ndia boema, Hizkia nafa'da nae, “Hu kande emi nanafe hehelik soaneu MANETUALAIN so, de da'dileo emi tutunu-hohotu makasim-ma, emi muse meni tutunu-hohotuk leo MANETUALAIN Uman mai.” Boema basa hataholi manai sila-la leni tutunu-hohotuk sila-la, nakalena hapu nggelok no dale hihii-nanau mesan-na, neni bana soaneu ana tunu-hotun da'dileo tutunu-hohotu nanatunuk.

³²Leni sapi mane hituhulu, bi'ilopo natun esa, ma bi'ilopo ana natun dua, boema ala tunu-hotun soaneu da'di tutunu-hohotu nanatunuk neu MANETUALAIN.

³³Sila boeo leni sapi mane natun nee ma bi'ilopo lifun telu soaneu ala tunu-hotun fo basa hataholi manai sila-la la'a sama-sama.

³⁴Imam-imam fo manatao nalalao-nalalafu aoina-na ka'da lumaanak nanseli soaneu ali bana sila-la loun-na. Hu ndia de hataholi Lewi-la tulu-falis, nanahu hataholi Lewi-la lilinekan ba'un-na seli neu nakanenetek tao nalalao-nalalafu aoina-ka. Ala tulu-fali lahele losa imam fo manatao nalalao-nalalafu aoina-ka dai.

³⁵Fe'ek neme tutunu-hohotu nanatunuk-ka, basa imam-mala tunu-hotu laun-na la'a tutunu-hohotuk-kala minan-na boe. Boeo ala tunu-hotu angol fo ala po'an sama-sama no tutunu-hohotu nanatunuk sila-la. Ala tao seluk makaluku-makatele nai MANETUALAIN Uman-na, enon-na leondiak.

³⁶Boema Manek Hizkia ma laun-na lamahoko, nanahu Manetualain tulu-fali sila, de ala tao basa sila-la ka'da nai fai nggenggeloanak esa mesak-kana.