Read Termanu 2TAWARIKH 30 Bible Online

2TAWARIKH 30 - Termanu bible

2TAWARIKH 30

¹ Laun-na beita hapu tao Paskah nandaa no fain-na nai bula kaesa dalek, nanahu imam-imam fo manatao nalalao-nalalafu aoina-na lumaanak nanseli, ma hataholi ba'u beita lakabubua nai Yerusalem fa. Hu ndia de Manek Hizkia ma hataholi mana'a ngga'din-nala boema Yerusalem laun-nala lalahalak soaneu tao Paskah ndia nai bula kadua, de sila basa-basas lamahoko dale tutu'uk ndia. Boema manek-ka haitua susulak leo basa hataholi manai Israel ma Yehuda lala'en-na. Boeo neu hataholi Efraim ma Manasye-la. Leoina Israel-la neme leo Dan-na nusan manai boboan kii losa leo Bersyeba nai boboan kona lala'en-na, nanaka'ik leo MANETUALAIN Uman-na nai Yerusalem fo ala tunga Paskah ma fe ha'da-holomata neu Israel MANETUALAIN sama leo nananaketuk nai Musa hoholo-lalanen-nala dalek. Beita hapu ala tao feta Paskah sama-na leondiak fa.

⁶No manek-ka ma hataholi mana'a ngga'din-nala paletan-na, de ladenu hataholi nadedenuk neu leo basa Yehuda ma Israel lala'en-na fo leni susulak sila-la fo isi-liin nae leo ia, “Laun Israel-la lemin! Emi mala hataholi Asyur-ra koasan-na deak so. Ela leo bee na emi mamahele falik neu Amak, MANETUALAIN fo Abraham, Isak ma Yakob sene-do'ok-ka, fo ela Ndia boeo tulu-fali seluk emi.

⁷Boso sama leo emi bei-ba'i kaim-mala ma hataholi Israel fe'ek-kala fo ala ta lilineka neu sila MANETUALAIN fa. Emi mita matam Ana hukus-sala, belan-na leobeek so.

⁸Boso malanga batu sama leo sila, tehu tunga neu MANETUALAIN. Mai leo Yerusalem mai, leo MANETUALAIN Uman fo emi MANETUALAIN hele heheli basan ba'eneu Ndia mesak-kana losa dodoon-na. Mai fo sene-do'ok neun fo ela nasan-na tenak soaneu emi.

⁹Metema emi mamahele falik neu MANETUALAIN soona, soona hataholi manafoo leni emi tolanoo ka'a-fa'dim-mala da'dileo hataholi nanafook-kala, neukose lanuu dale kasian fo ala fes loak fali ma'is. Emi MANETUALAIM-ma nde bee na Manetualain fo dale malole, ma nanuu dale kasian; de neukose Ana sipok emi metema emi fali ma'im.”

¹⁰Lelek hataholi nadedenuk sila-la la'ok leme kota esa leo kota esa leu, nai leo Efraim ma Manasye nusan-na losa kii fo losa leo Zebulon-na nusan-na, boema hataholi-la hikas ma lakadadaek-kasa.

¹¹Tehu hapu hataholi nggelok leme leo Asyer, Manasye, ma Zebulon, ala nau mai leo Yerusalem mai.

¹²Nai Yehuda boeo Manetualain tao-no'i de laun-na dalek esa soaneu tunga te'e-te'e neu Manetualain hihii-nanaun nenik ala tunga manek-ka ma hataholi mana'a ngga'din-nala paletan-na.

¹³Neu bula kadua boema laun makadotok nanseli lakabubua nai Yerusalem fo ala tunga feta Fai Matua Loti Ta Pake Laluteik-ka

¹⁴Basa mei tunu-hotuk manai Yerusalem fo nanapakek soaneu fe tutunu-hohotuk ma hotu boomenik fe lamatua daebafak-kala, ala ko'o-las de ala tu'uhenis leo Bafak Kidron-na dalek neu.

¹⁵Neu bulak ndia fain sanahulu haa boema, ala do'do bi'ilopo-la fo ala tunu-hotus da'dileo tutunu-hohotu Paskah. Basa imam ma hataholi Lewi fo manatao nalalao-nalalafu aoina beitak-kala, ala mae lanseli. Boema ala tao lalalao-lalalafu aoinan-nala nalosa ala hapu tunu-hotu tutunu-hohotu nanatunuk nai MANETUALAIN Uman.

¹⁶Sila esa-esak ho'i mamanak nai MANETUALAIN Uman tunga nakeketuk fo nanasulak nai Musa susula Hoholo-lalanen dale. Hataholi Lewi-la fe tutunu-hohotuk sila-la daan-na leo basa imam-mala neu, boema ala po'an neu mei tunu-hotuk-ka.

¹⁷Hataholi manai sila-la, ba'uk-ka beita tao lalalao-lalalafu aoinan-nala fa, da'di sila ta bole do'do bi'ilopo soaneu tutunu-hohotu Paskah. Hu ndia de, hataholi Lewi-la nde tao dede'ak ndia soaneu hataholi sila-la ma hataholi Lewi-la nde fen neu MANETUALAIN-na.

¹⁸Fe'ek neme ndia mai, nai hataholi Efraim, Manasye, Isakhar ma Zebulon dalek, ba'uk-ka mai, tehu ala beita tao lalalao-lalalafu lakahuluk aoinan-nala fa. Da'di ala tunga feta Paskah ndia, ta nandaa no hata fo nananaketu basak so. Hu ndia de, Manek Hizkia hule-haladoi soaneu hataholi sila-la nae,

¹⁹“MANETUALAIN, fo ami bei-ba'i kaim-mala sene-do'ok-ka, ela leo bee na neme O dale malolem-ma, O fe do'o do ampon neu sila fo ala sene-do'ok neu O nenik dale katematua-nala, leomae ala beita tao lalalao-lalalafu aoinan-nala fa.”

²⁰MANETUALAIN namanene Hizkia huhule-haladoin. Ana fe do'o do ampon neu hataholi sila-la ma Ana ta huku-doki fas.

²¹Faik hitu dalen-na, no namahoko-seteleek nanseli, hataholi fo lakabubua nai Yerusalem sila-la tao feta Loti Lalutei Taak-ka. Tunga faik hataholi Lewi-la ma basa imam-mala koa-kio MANETUALAIN no te'e-te'ek.

²²Hataholi Lewi sila-la mauli-malangan malelak nai makaluku-makatele neu MANETUALAIN, nalosa Hizkia koa-kios. Faik hitu dalen-na ala la'a-linu nana'a-nininuk neme feta ndia mai, ma ala tunu-hotu tutunu-hohotuk soaneu loke makasi neu MANETUALAIN, fo sila bei-ba'i kain-nala Manetualain-na,

²³sila basa-basas ho'i nakeketuk fo feta ndia la'ok nakandoo faik hitu seluk. Boema ala tunga feta ndia no namahoko-seteleek.

²⁴Manek Hizkia fe sapi mane lifun esa ma bi'ilopo lifun hitu. Hizkia hataholi mana'a ngga'din-nala fe sapimane lifun esa ma bi'ilopo lifun sanahulu. Ala fe basa bana sila-la leo laun-na neu fo ala do'dos fo la'a. Imam makadotok nanseli tao lalalao-lalalafu aoinan-nala.

²⁵Yehuda laun-nala, basa imam-mala, hataholi Lewi-la, ma hataholi manamaik leme kii mai, boema hataholi nusa dea fo manaleo lahele lai Israel ma Yehuda, basa-basas laua-lanale.

²⁶Kota Yerusalem-ma henuk no namahoko-setelee-ka, nanahu neme Dauk anamanen Salomo tepo-lelen-na beita hapu manada'dik sama-na leondiak fa.

²⁷Imam-imam-mala ma hataholi Lewi-la loke MANETUALAIN baba'e-papalan ba'eneu laun-na, de neme mamana leleo-na nai nusa so'dak-ka, Manetualain namanene sila huhule-haladoin boema Ana sipok sila nonoke-na.