Read Termanu 2TAWARIKH 31 Bible Online

2TAWARIKH 31 - Termanu bible

2TAWARIKH 31

¹Basa fata boema, basa laun-na lala'en-na leu leo kota-kota manai Yehuda, boema ala tao lakalulutuk lutu batu sosongo-tatangok ma ala hea labuu dodoki-dudulak fo lapadedeik fe lamatua daebafa Inak Asyera, ma ala tao lakalulutuk mei tutunu-hohotuk-kala ma mamana sosongo-tatangok-kala. Ala tao leondiak boe nai mamana-mamanak fe'ek manai Yehuda, boema nai Benyamin, Efraim ma Manasye nusan-na. Basa ndia boema esa-esak fali ne'un leo nusan-na neu.

²Manek Hizkia napadedeik falik imam-imam ma hataholi Lewi-la esa-esak balaba'un tunga baba'ek makahulun-na. Bela-ba'uk sila-la nde, tunu-hotu tutunu-hohotu nanatunuk ma tutunu-hohotu mole-dame, lalalau-laoono makaluku-makatele nai MANETUALAIN Uman, ma kokoa-kikiok, boema loke makasi neu MANETUALAIN nai mamanak lala'en-na nai MANETUALAIN Uman dale.

³ Manek-ka ho'u ndia bana-manun de ana fe tutulu-fafalik bana fo nanapaluuk soaneu tutunu-hohotu nanatunuk tunga-tunga fafain-na ma le'donoso-na. Ma soaneu tutunu-hohotuk fo tunu-hotun nai fai Sabat-ta, nai feta bula beu-ka, ma nai feta fe'e-fe'e-kala sama leo nananaketuk nai MANETUALAIN hoholo-lalanen dale.

⁴Fe'ek neme ndia mai, manek-ka nadenu Yerusalem laun-nala leni tutunu-hohotuk fo nananaketuk ba'eneu basa imam-imam ma hataholi Lewi-la, fo ela sila pake basa sila le'do-fain lala'en-na neu lau-ono-ka nai MANETUALAIN Uman sama leo nanasulak nai MANETUALAIN hoholo-lalanen dale.

⁵Paleta ndia nanapo'a-benga basak boema, hataholi Israel-la leni boa-boa leo MANETUALAIN Uman neu. Ala ho'i boa-boa sila neme sila dae oen isi-mina makasososan-na mai, fonde ha'de sopuk, angol, mina setun, fanioe, ma buna-boak fe'ek-kala. Sila boeo leni perpuluhan neme sila hata-heton mai.

⁶Basa hataholi fo manaleo lai Yehuda kota-kota-nala, leni perpuluhan neme sila sapin ma bi'ilopo-nala, ma boa-boa fe'ek-kala, boema ala fe basa sila-la leo sila MANETUALAIN neu.

⁷Ala fe boa-boa sila mulai neme bula katelu-a, de ana faa osu-osu losa bula kahitu-a.

⁸Manek Hizkia no hataholi mana'a ngga'din-nala lita tutulu-fafalik makadotok sila-la boema, ala koa-kio MANETUALAIN ma ala koa-kio laun Israel fo Manetualain anan-nala.

⁹Lelek manek-ka kokolak no basa imam-mala ma hataholi Lewi-la la'eneu boa-boa sila-la boema,

¹⁰imam matuaina Azarya fo Zadok tititi-nonosin nafa'da nae, “Lelek laun-nala leni sila boa-boa-nala leo MANETUALAIN Uma mai boema, ami ta to'a-taa nana'a-nininuk nakalenak dai ma lena, nalosa ami nana'a-nininum fo nanasadiak-kala, bei makadotok. Ami sipo basa sila-la nanahu MANETUALAIN ba'e-pala anan-nala.”

¹¹No manek-ka paletan-na, de ami tao mama pepe'da nana'a-nininuk nai MANETUALAIN Uman-na boboa-kaisun,

¹²boema ami pe'da boa-boa ma perpuluhan sila-la neu mamana pepe'da nana'a-nininuk sila-la dalek. Ala fe hataholi Lewi esa na'de Konanya da'di manamanea, ma ana fe fa'din Simei da'di ndia manatulu-falin.

¹³Nai Konanya ma Simei dae, hapu hataholi Lewi sanahulu hapu bela-ba'uk da'di manamanea boe. Hataholi Lewi sila-la nde: Yehiel, Azazya, Nahat, Asael, Yerimot, Yozabad, Eliel, Yismakhya, Mahat, ma Benanya. Basa dede'ak sila-la, nananaketuk tunga Manek Hizkia ma Imam Matuaina Azarya natutu'u-na.

¹⁴Kore fo Yimna anan-na da'di manamanea-la malangan nai MANETUALAIN Uman-na Lelesuinan Dulu, ana hapu bela-ba'uk soaneu sipo boa-boa fo nanafek neu MANETUALAIN-na, boema ana baba'e boa-boa sila-la.

¹⁵Nai kota-kota fe'ek fo imam-mala mamana leleo-nala, hataholi Lewi fe'e-kala tulu-fali Kore. Hataholi Lewi sila-la nde: Eden, Minyamin, Yesua, Semaya, Amarya, ma Sekhanya. Ala baba'e nana'a-nininuk sila-la bekebaba'uk neu sila nonoon fo leo Lewi-a, nau lasik do mulik boe, tunga sila esa-esak bela-ba'un.

¹⁶Basa touk fo teun teluhulu leo lain neu, fo mananggati naneak tunga faik-ka nai MANETUALAIN Uman-na, boeo ala hapu baba'ek tunga esa-esak bela-ba'un ma tunga nonoo manamanea-nala.

¹⁷Basa imam-mala nanasulak tunga sila teidale-bobongin, ma hataholi Lewi fo teun duahulu leo lain neu, nanasulak tunga bela-ba'un ma tunga nonoo manamanea-na.

¹⁸Ala sulak basa-basas sama-sama loo sao-anan-nala, ma hataholi manai sila uman dale-la, nana sila muse laheheleaon tunga faik lakalala'ok sila bela-ba'u hehelin-na soaneu MANETUALAIN.

¹⁹Nai imam-imam fo manaleo nai kota-kota fo nananaketuk soaneu Harun tititi-nonosin, do nai mook fo manai kota sila titia-tatain-nala, manaho'u paleta-la fes bela-ba'uk soaneu baba'e nana'a-nininuk neu basa touk manai imam-mala teidale-bobongin-nala dalek, ma neu basa hataholi fo nanasulak manai leo Lewi dalek.

²⁰Manek Hizkia nakalala'ok ndoos ma matetuk-ka ma ana tao tunga ka'da ndoo-na nai Yehuda lala'en-na, de ana tao namahoko MANETUALAIN dalen-na.

²¹Nusa-na tetu-temak nanahu ana tao basa hata lala'en-na soaneu MANETUALAIN Uman-na do soaneu tao tunga MANETUALAIN hoholo-lalanen, nakalala'ok-kana no dale katematuak ma no susue-lalaik neu Aman MANETUALAIN.