Read Termanu 2TAWARIKH 34 Bible Online

2TAWARIKH 34 - Termanu bible

2TAWARIKH 34

¹ Yosia teun falu, nai lelek ana da'di manek Yehuda, de ana paleta nai Yerusalem teuk teluhulu esa dalen-na.

²Ana tao hata fo nandaa no MANETUALAIN dalen-na; ana tunga ba'in Dauk heo-hilun, ma ana tunga Manetualain hoholo-lalanen lala'en-na no dale katematuak.

³Yosia da'di manek teuk falu, fo nai lelek bei muli-soluk nanseli boema, ana mulai sene-do'ok neu Manetualain fo ba'in Manek Dauk-ka sene-do'ok-ka. Basa teuk haa boema, ana mulai tao nakalulutuk mamana sosongo-tatangok-kala, lamatua daebafa Inak Asyera dodoki-dudulan, ma sosongo-tatango fe'e-fe'ek-kala.

⁴ Yosia ana boa-nala tao lakalulutuk dodoki-dudulak ma sosongo-tatangok boema ala nggali sosongo-tatangok sila-la sopun-nala leo hataholi fo manafe tutunu-hohotuk neu sosongo-tatangok sila-la laten lain. Ala tao lakalulutuk Baal mei tunu-hotun-nala ma mei tunu-hotu boomenik manai sila-la.

⁵ Basa boema Yosia hotuheni basa imam fo manamalalau-maoono sosongo-tatangok sila-la dui-kalun nai mei tunu-hotuk sila-la lain. No enok ndia, ana taon-na Yehuda ma Yerusalem landaa seluk sene-do'ok neu MANETUALAIN.

⁶Ana tao leondiak boe nai kota-kota ma nusa-nusak fo lakalulutuk manai Manasye, Efraim, ma Simeon nusa-nala losa leo Naftali fo nai nusak Israel-la boboan kii.

⁷Yosia tao nakalulutuk mei tunu-hotuk-kala ma lamatua daebafa Inak Asyera dodoki-dudulan nai basa Nusak Kii lala'en-na, ma ana tao nakalulutuk basa mei tunu-hotu boomenik-kala. Basa boema Yosia fali ne'un leo Yerusalem neu.

⁸Nai Yosia paleta neu teuk kasanahulu falu-na, de ana tao balisi basa sosongo-tatangok-kala leme MANETUALAIN Uman mai ma nai nusak-ka lala'en-na boema, ana haitua hataholi telu leu tao lahii MANETUALAIN Uman-na. Hataholi kateluk sila-la nde Safan fo Azalya anan-na, Maaseya fo filana Yerusalem-ma, ma Yoah fo Yoahas anan-na, fo ndia hataholi mana'a ngga'di matua-madema esa.

⁹Hataholi Lewi manamanea MANETUALAIN Uman-na Lelesu-nala, fe doik fo ala susula kala leo Imam Matuaina Hilkia neu. Doik sila-la leme hataholi Efraim, ma Manasye-la mai, ma leme laun fe'e-fe'ek manai Nusak Kii-la mai, boema leme laun Yehuda, Benyamin ma Yerusalem-mala mai.

¹⁰Basa boema Imam Matuaina Hizkia fe doik sila-la leo hataholi kateluk fo lanea hataholi manatao lahii MANETUALAIN Uman-na ndia neu. Basa boema ala fe doik sila-la

¹¹leo tukang-ngala ma tuka manalapadedeik uma fo sueka'nde ala asa batu ma ai soaneu tao lahii basa uma nalutuk fo mane-manek Yehuda-la ta taoafik neu sila fa.

¹²Hataholi fo mana tao lahii uma sila-la, te'e-te'e ta manapopo'de-papaik-kala fa. Hataholi Lewi haa lalanga hataholi sila-la fo nde: Yahat ma Obaja fo neme teidale-bobongik Merari mai, boema Zakharia ma Mesulam fo leme teidale-bobongik Kehat-a mai. Basa hataholi Lewi fo lakaminak lalelak musik-kala,

¹³ala fes lanea hataholi manalu'a ai-batu-la, lalanga hataholi manamaue-male'dik manai tatao-nono'ik mata-matak-kala, ala da'di hataholi manasulak susulak, ma lanea lelesu-la.

¹⁴Nai lelek doi tutulu-fafalik sila-la nanakaluak leme mamana pepe'dan-nala mai boema, Hilkia hapu MANETUALAIN susula hoholo-lalanen, fonde hoholo-lalanek fo Manetualain fen neu Musa.

¹⁵Hilkia nafa Safan nae, “Au hapu MANETUALAIN susula hoholo-lalanen nai MANETUALAIN Uman,” boema ana fe susulak sila-la leo Safan neu.

¹⁶Safan sipo-na susulak sila-la, boema neu leo manek-ka neu de nafa'da nae, “Basa hata fo Ama Manek paletan, ami makalala'ok basan so.

¹⁷Ami ho'i-ma doik nanape'dak manai MANETUALAIN Uman so, de ami fes leo basa hataholi manamaue-male'dik-kala ma manamanea-nala so.”

¹⁸Basa boema ana kokolak nakandoo nae, “Hilkia fe susulak ia-la leo mai.” Boema Safan lees susulak sila-la isi-liin neu manek-ka.

¹⁹Manek-ka namanene susulak sila-la isi-liin boema, ana sii-sii-lulu'i bua papaken-na nanahu dalen-na he'dis-sa.

²⁰Boema manek-ka fe paleta nde ia neu Hilkia, Ahikam, fo Safan anan-na, Abdon fo Mikha anan-na, Safan fo nusaina hataholi manasulak susulan-na, ma Asaya fo manek-ka manamanea-na nae.

²¹“Meu leona, fo matane neu MANETUALAIN soaneu au ma soaneu hataholi-hataholi fo bei manai Israel ma Yehuda la'eneu susulak ia-la isi-liin. MANETUALAIN namanasa ita nanahu ita bei-ba'i kain-nala ta lakalala'ok paleta fo nanasulak nai susulak ia-la dalek fa.”

²²Boema Hilkia, Ahikam, Abdon, Safan ma Asaya leu loke natutu'duk neme inak esa na'de Hulda. Inak ndia nabi esa, fo ana leo nai nggolo beuk manai Yerusalem-mala. Sao-na na'de Salum, fo Tikwa anan-na, ma Harhas upu-na. Touk ia nde manaito-ato bua-lo'a makaluku-makatele manai MANETUALAIN Uman-na. Hulda namanene-na sila hala-kokolan boema,

²³nadenus ala fali le'us leo manek-ka leu fo landuku-lalosak hala heheluk-ka nde ia nae, “Amak, MANETUALAIN fo hataholi Israel-la sene-do'ok-ka nafa'da nae,

²⁴‘Neukose Au huku basa Yerusalem no basa laun-nala lala'en-na nenik so so-susupak fo nanasulak nai susulak ndia dalek, de ala lees fen neu manek-ka. Susulak ndia isi-liin nae,

²⁵Sila la'oela Au so, de ala fe tutunu-hohotuk neu lamatua fe'ek-kala. Basa hata fo ala tao-no'ik-kala, tao nafo'a Au nasa-melung. Au amanasa Yerusalem, de Au nasa-melung ta bisa tenak fa.

²⁶Tehu la'eneu Manek Yosia soona, Au, fo Israel MANETUALAIN hala-hehelung-nga nde ia nae, O mamanene-ma hata fo nanasulak nai susulak ndia dalek soona,

²⁷o tukatei-saledale, ma o makaloe-makadae aoinam-ma nai Au matang. Au fe basa nasanene'dak mahelek soaneu huku Yerusalem no laun-nala, tehu nai lelek o mamanene la'eneu Au hala nasanene'da maheleng ndia boema, o kii ma o sii sii-lulu'i o bua-lo'a papakem-ma da'di leo ta'du-tana dale he'dik. Au amanene o huhule-haladoim so,

²⁸hu ndia de, neukose Au ta aketu huhukuk neu Yerusalem nai o fai maso'dam-ma dalek fa. Neukose Au fe loak mate no mole-dame.’ ” Boema hataholi nadedenuk sila-la fali ma'is leo manek-ka mai de landuku-lalosak hala-heheluk ndia.

²⁹Manek Yosia naloo basa Yehuda ma Yerusalem mauli-malangan-nala,

³⁰boema nos leo MANETUALAIN Uman neu. Basa imam-mala, hataholi Lewi-la ma laun-nala lala'en-na, nau nuu taa-hata taak do kamasu'ik boe, ala la'o sama-sama loos. Nai sila basa-basas matan, fo nai deka no dii matuaina hehelik soaneu manek-ka boema manek-ka napadeik de ana lees napane'e susula hehelu-balataak fo ala hapun neme MANETUALAIN Uman dale-a, isi-liin lala'en-na. Basa boema manek-ka tao hehelu-balataak no Manetualain soaneu ana tungan, ma nakalala'ok basa paletan ma hoholo-lalanen no dale katematuak ma no aopaa samanen, boema ana tao natetu MANETUALAIN tao hehelu-balataak no anan-nala, eno-dalan, fo nanasulak nai susulak ndia dalek-ka.

³²Nadenu basa Benyamin hataholin-nala ma basa hataholi fe'ek manai Yerusalem-mala laheluk soaneu tunga hehelu-balataak ndia. Boema hataholi Yerusalem-mala tunga nakanenetek manai hehelu-balataak ndia dalek, fo nde sila hehelu-balataan loo sila bei-ba'i kain Manetualain-na.

³³Sosongo-tatangok nanamaluak manai basa mamanak-kala, fo nai hataholi Israel-la nusan-na boe, Manek Yosia tao nakalulutuk la'iesak-kasa. Boema nakaseti laun-na fo sene-do'ok neu Amak, fo sila bei-ba'i kain MANETUALAIN-na. Boema nai Yosia fai maso'dan-na dalek, laun-na lilineka lahele neu MANETUALAIN.