Read Termanu 2TAWARIKH 5 Bible Online

2TAWARIKH 5 - Termanu bible

2TAWARIKH 5

¹ Manek Salomo nafofo'a basa MANETUALAIN Uman ndia boema, ana pe'da basa lilofulak, lilopilas, ma bua-lo'a fe'e-fe'ek fo aman Dauk fe basan neu MANETUALAIN-na lai Uman ndia gudang-ngala dalek.

² Basa ndia boema, Manek Salomo nadenu basa mauli-malanga leo-la ma teidale-bobongik-kala leme leoina Israel-la fo lakabubua nai Yerusalem soaneu ala laliheok MANETUALAIN Peti Hehelu-balataan neme Sion, fo Kota Dauk-ka leo MANETUALAIN Uman neu.

³Boema basa-basas mai nai fai malole Lalaa Akidook-ka.

⁴Lelek basa mauli-malangan sila-la lakabubua boema, hataholi Lewi-la ndolo leni Peti Hehelu-balataak ndia,

⁵de lenin leo MANETUALAIN Uman neu. MANETUALAIN pandopon-na boema basa oe isin boeo, basa imam-mala ma hataholi-hataholi Lewi-la laliheok-kasa leo MANETUALAIN Uman neu.

⁶Manek Salomo ma basa laun Israel-la lala'en-nalakabubua lai Peti Hehelu-balataak ndia matan-na, boema ala tunu-hotu fe MANETUALAIN bi'ilopo ma sapi fo ta leke-nala dede'un-nala fa.

⁷Basa ndia boema, basa imam-mala leni Peti Hehelu-balataak ndia leo MANETUALAIN Uman dale neu de ala pe'dan neu mahahae nusa so'dak-ka dodoki-dudulan-na nisi daen-na nai Kama Malalao-Malalafuk Nanseli-a dalek.

⁸Dodoki-dudulak sila-la li'dan-nala lakapepela de ala potiketu Peti ndia ma ai ndondolon-nala.

⁹Ai ndondolok sila-la nalun-na seli, nalosa lita pe'dan-nala neme Kama Malalao-Malalafuk Nanseli ndia uluk mai, tehu ta litan neme deak mai fa. (Losak faik ia, ai sila-la bei lai ndia.)

¹⁰ Nai Peti Hehelu-balataak ndia ta hapu hata esa boen, te ka'da batu bebelak dua. Musa tao batu sila-la leo dalek neu neme Lete Sinai-a, lelek MANETUALAIN tao hehelu-balataak no leoina Israel-la nai lelek lai leleo-lala'on-nala dalek leme Masir leo nusa Kanaan-na leu.

¹¹ Basa imam manai sila-la, ta ela esa boen laheheleaon soaneu tao feta ndia. Basa manamakameek ma manamakminak sasanu manai leo Lewi-la dalek, fo nde Asaf, Heman, Yedutun ma basa sila teidale-bobongin lala'en-na papaken-ala neme tema abalutu mai. Hataholi Lewi sila-la lapadeik lai mei tunu-hotuk-ka boboan dulu ma ala ho'u simbal ma kecapi. Imam natun esa duahulu fu trompet sama-sama los. Basa manamakameek-kala lakamee de halan-nala da'di halak esa no trompet, simbal sasanu fe'ek-kala liin-nala. Ala lakamee nakameek soaneu MANETUALAIN-na liin-na nae leo ia: “Koa-kio MANETUALAIN nana Ndia malole. Susue-lalain manaketu-basa taak losa dodoon-na.” Nai lelek basa imam-mala kalua leme MANETUALAIN Uman ndia dalek mai boema, no kaiboik Uman ndia henuk no MANETUALAIN mamain-na ndela-sa'an, nalosa ala ta hapu tao feta makaluku-makatele-a fa.