Read Termanu 2TAWARIKH 6 Bible Online

2TAWARIKH 6 - Termanu bible

2TAWARIKH 6

¹Manek Salomo-a hule-haladoi nae, “Ou MANETUALAIN O mahiik manseli leo nai ko'as makahatuk dale.

²Besak ia au afofo'a uma Mandela-masa'ak esa ba'eneu O, soaneu da'di O mamana leleom-ma losa dodoon-na.”

³Lelek manek-ka hule-haladoi basa boema, ana lipa leo basa laun lala'en fo bei lapadeik lai ndia, boema ana dokodoe Manetualain baba'e-papalan ba'eneus.

⁴Nafa'da nae, “Makahulun-na MANETUALAIN helu basa neu au amang Dauk nae leoia, ‘Neme Au o falik Au anang-ngala kalua leme Masir losa faik ia, nai nusak Israel-la Au ta hele kota esa boen da'di mamanak fo nai bee muse nafofo'a uma soaneu mamanak makaluku-makatele neu Au, ma ta hapu hataholi esa boen fo Au Helen soaneu nauli-nalanga Au anang Israel fa. Tehu besak ia Au hele Yerusalem da'di leo mamana makaluku-makatele neu Au. Ma Au hele o, Dauk, soaneu paleta Au anang-ngala.’ Kokoa-kikiok ba'eneu Israel MANETUALAIN fo Ana tao natetu hehelun ndia so!”

⁷Salomo kokolak nakandoo nae, “Au amang Dauk tutu'u basa soaneu nafofo'a uma fo da'di mamanak makaluku-makatele neu Israel MANETUALAIN.

⁸Tehu MANETUALAIN nafa'dan nae, ‘O dale tutu'um ndia malole.

⁹Tehu ta o fa, te o anam-ma nde neukose nafofo'a Au umang ndia.’

¹⁰Besak ia MANETUALAIN tao natetu hehelun-na so. Au da'di manek Israel nggati au amang so, ma au afofo'a uma soaneu da'di mamanak makaluku-makatele neu Israel MANETUALAIN so.

¹¹Nai MANETUALAINUman ndia dalek, au sadia basa mamanak soaneu Peti Hehelu-balataak fo isi-na batu hehelu-balataak neu MANETUALAIN no anan Israel.”

¹²Salomo tao looanak liti nai MANETUALAIN Uman-na so'dan-na tala'da heon. Nanalu-loloan sama fonde metel beke duak senti dua, ma dedeman-na metel esa senti telu. Nai laun manai sila-la matan, Salomo kae leo looanak ndia lain neu, de napadeik nasale leo mei tunu-hotuk-ka neu. Basa hataholi-la hapu mete litan, Basa boema ana senek boema ana so'uk liman duas de ana look-kasa leo lalai neu leo boema ana hule-haladoi nae,

¹⁴“Amak, fo Israel MANETUALAIN-na! Nai lalai do nai daebafak-ka boeo, ta hapu hata fo sama leo O fa! O tao matetu O hehelu-balataam ma O matu'du O susue-lalain neu O anam fo manalilinekak-kala ma manatunga O no dale katematuan-nala.

¹⁵O tao matetu O hehelu-balataam neu au amang Dauk so. Hata fo O heluk ndia, O tao nai faik ia dalen-na so.

¹⁶ O boeo helu basa neu au amang mae te'e-te'e tititi-nonosin tunga Au hoholo-lalaneng sama leo ndia, soona hataholi esa neme tititi-nonosin mai, neukose ana paleta da'di manek nai Israel losa dodoon-na. Besak ia, ou Amak fo Israel MANETUALAIN-na, tao matetu basa hata fo O helun neu au amang Dauk fo O atam ndia boe.

¹⁸ Tehu, ou Manetualain, tete'ek-ka O nau leo nai daebafak ia fo nai hataholi daebafak-ka tala'da do? Basa lalai-a lala'en-na boeo, loloan-na ta dai soaneu O fa, mudahata no uma mamaso-kakasi fo au afofo'ak ia bai!

¹⁹Ou Amak, fo au MANETUALAING-nga, O atam au! Tehu ela leo been-na mamanene au huhule-haladoing, ma sipok-ma au nonokeng ia.

²⁰ Ela leo been-na lele'do le'odaen O masulu-mahapa uma ia, uma fo O hele basan da'di leo mamana makaluku-makatele neu O so. Ela leo been-na neme O mamana leleom fo manai nusa so'dak-ka, O mamanene ma fe do'o do ampon neu au boema hataholi Israel fo O anam sila la, metema ami mai fo hule-haladoi neu O nai uma ia.

²²Metema hataholi esa nanakalaak nanahu tao salak soaneu hataholi fe'ek boema loon leo O mei tunu-hotum manai O Kamam Malalao-Malalafum Nanseli ia mai soaneu ana soo-supa nae ana ta tao salak fa soona,

²³ou MANETUALAIN, ela leo been-na O mamanenen nai nusa so'dak-ka fo O maketu O atam ia-la dede'an-nala. Huku manatao salak-kala ma po'i manatao sala taak-kala.

²⁴Metema musu-a sengi O anam Israel nanahu sila sala-singon-nala boema ala tuka tei-sale dale fo ala fe ha'da-holomata seluk neu O da'di leo MANETUALAIN, basa soona ala mai leo O Umam ia mai boema ala hule-haladoi loke do'o do ampon neu O soona,

²⁵ela leo been-na O mamanenes nai nusa so'dak-ka. Ela leo been-na O fe do'o do ampon neu O anam ia-la sala-singon, ma moos fali leo nusak fo O fe basan neu sila ma sila bei-ba'i kain-nala so.

²⁶Metema O anam-mala lasala-lasingo neu O fo O hukus nenik O ta makona u'dan-na boema ala tuka tei-sale dale leme sila sala-singon-nala mai fo ala fe ha'da-holomata neu O da'di leo MANETUALAIN, basa soona ala mai leo O Umam ia mai, boema ala hule-haladoi neu O lae,

²⁷ou MANETUALAIN fo manai nusa so'dak-ka, soona mamanenes. Ma fe do'o do ampon neu hataholi Israel-la fo O atam-mala. Manolis ala tao hata fo ndoos. Basa ndia soona, ou MANETUALAIN, makona u'dan-na leo O nusam ia mai, nusak fo O fe basan neu O anam-mala soaneu da'di sila pusakan losa dodoon-na.

²⁸Metema la'andoes do he'di-laus do anin mato'bik-ka tao nalutu bubu'u-palusa, he'di la'us-sa, do lama-ka, do metema musu-a sapu-na O anam-mala, do he'di-laus mai fo tuni ndeni-na nusak ia soona,

²⁹ela leo been-na O mamanene sila huhule-haladoin. Metema nai O anam Israel dalek, hapu nggelok hule-haladoi neu O no dale he'dik boema ana look liman-na nasale leo O Uman ia mai soona,

³⁰ela leo been-na nai O mamana leleom manai nusa so'dak-ka mamanene boema fe do'o do ampon neus. Ka'da O mesam-ma nde bubuluk hataholi daebafak-ka dalen-na. Hu ndia de tao hataholi-a esa-esak nandaa no tatao-nono'in,

³¹fo ela O anam-mala bii ma ala tunga neu O tataasesa losa ala leo nai nusak fo O fen neu ami bei-ba'i kaim-mala.

³²Metema hataholi nusa dea nai nusa dook namanene la'eneu O matua-mademan O be'ibalakaim, ma nae O maheheleaom tataaesa soaneu tulu-fali, boema ana mai leo O Umam ia mai soaneu ana hule-haladoi neu O soona,

³³ela leo been-na neme O mamana leleom manai nusa so'dak-ka mamanene huhule-haladoin ma sipok nonoken-na. No enok ndia, basa leoina manai daebafak-ka lala'en-na lalelak O ma ala tunga neu O sama leo O anam Israel. Neukose ala bubuluk lae uma fo au afofo'ak ia nde mamanak soaneu makaluku-makatele neu O.

³⁴Metema O paleta O anam-mala soaneu leu latee-latati la'ban musu-a, boema su'di lai mamanak bee boe, fo lasale leo kota fo O helek ia mai fo ala hule-haladoi lasale leo uma fo au afofo'an soaneu O ia mai soona,

³⁵ela leo been-na nai nusa so'dak-ka O mamanene sila huhule-haladoin ndia, fo fes ala sengi.

³⁶Metema O anam-mala lasala-lasingo neu O — te'e-te'e ta hapu hataholi esa boen nasala-nasingo fa — boema hu kande O nasa-melum de O po'ilotak musu-a sengis de loos da'di leo hataholi nanahukuk leo nusak esa nai dook-ka do ana deka soona,

³⁷ela leo been-na O mamanene sila huhule-haladoin. Metema nai nusak ndia ala tuka tei-sale dale leme sala-singon-nala mai, de ala hule-haladoi neu O no ala manaku lae sila lasala-lasingo ma ala tao tatao-nono'i mangalauk so soona, mamanene sila huhule-haladoin, ou MANETUALAIN.

³⁸Metema nai nusak ndia no dale katematuak fo te'e-te'e ala tuka tei-sale dale leme sala-singon-nala mai, fo ala hule-haladoi neu O no lasale leo nusak fo O fen neu ami bei-ba'i kaim-mala ia, ma lasale leo kota fo O helek ia mai, ma lasale leo uma fo au afofo'an soaneu O ia,

³⁹soona neme O mamana leleom manai nusa so'dak-ka, ela leo been-na mamanene sila huhule-haladoin ma sue-lais. Fe do'o do ampon neu O anam-mala sala-singon lala'en-na.

⁴⁰Besak ia, au Manetualaing, taoafik neu ami ma mamanene huhule-haladoik fo nanananduku-nalosak neu O neme mamanak ia mai.

⁴¹Fo'a besak ia leon, ou MANETUALAIN! Ma sama-sama moo Peti Hehelu-balataak fo ana da'di dulak neme O koasa-ma mai ndia, ela leo been-na O masok leo O Uma ia dalek muu, fo leo nai ialosa dodoon-na. Ba'epala basa O imam-mala tatao-nono'in lala'en-na, ma ela leo been-na O anam lala'en-na laua-lanale nanahu O malole neu sila.

⁴²MANETUALAIN O boso tipa manek fo O hele basak ia so. Mafandendelek O susue-lalaim neu O atam Dauk.”