Read Termanu EZRA 1 Bible Online

EZRA 1 - Termanu bible

EZRA 1

¹ Kores, fo mane Persia, ana paleta neu teuk makasososan-na boema, MANETUALAIN tao natetu hata, fo Ana kokolak basan tunga Nabi Yeremia so. MANETUALAIN nakababale Kores dalen-na, ana kalua paleta esa, fo ala lees-sana nai basa nusan-na dalek. Liin-na nae leo ia:

² “Kores, fo mane Persia, paletan-na nde ia. Amak, MANETUALAIN fo manakoasa nai nusa so'dak-ka, nakadada'dik basa au da'di manek neu basa daebafak-ka lala'en-na, ma Ana paleta au, fo afofo'a fen uma nai Yerusalem, fo nai nusa Yehuda.

³Ela leo been-na Manetualain nasulu-nahapa emi basa-basam fo manada'di anan-nala. Emi muse fali leo Yerusalem meu, fo mafofo'a falik Israel MANETUALAIN Uman-na, fo nde Manetualain manaleo nai Yerusalem-ma.

⁴Metema hapu hataholi esa neme anan-nala nai mamana okak ia, ana paluu tutulu-fafalik, fo ana bisa fali, soona uma titia-tatain-nala, muse fen tutulu-fafalik ndia. Sila muse fen lilofulak ma lilopilas, tua-lepa, fo na'a nai enok, boema bana, fo ana fua bua-lo'an, ma boeo tunu-hotuk soaneu MANETUALAIN Uman-na nai Yerusalem.”

⁵Basa boema, basa mane leo-la, leme leo Benyamin-na, basa imam-mala, ma hataholi Lewi-la, ma ba'eneu hataholi, fo Manetualain nakababale dalen-na soona, maheheleaom leona, fo fali leo Yerusalem meu, fo nafofo'a falik MANETUALAIN Uman-na.

⁶Basa sila uma titia-tatain-nala, tulu-falis nenik ala fe bua-lo'as, fo nde, bua-lo'a lilofulak ma lilopilas, tua-lepa fo la'a nai enok, ma bana, fo ala fua bua-lo'an, ma tunu-hotuk soaneu MANETUALAIN Uman-na.

⁷Kores kalua mango-la ma nggalas-sala, fo makahulun-na, ala pakes nai MANETUALAIN Uman dale nai Yerusalem. Bua-lo'as sila-la, Mane Nebukadnezar-ra, nenis, de ana pe'das lai lamatua daebafan-nala uman dale.

⁸Kores fe bua-lo'as sila-la ito aton neu Mitredat, fo malanga manaito-ato nusak-ka tali-doin, ma hata-heto-nala. Basa boema, Mitredat sulak bua-lo'as sila-la neu susulak esa, fo soaneu Sesbazar, fo filana Yehuda.

⁹Susulak-ka isin-na nde ia: mango lilopilas-sala, soaneu feta tunu-hotuk-ka, — 30 mango lilofulak-kala, soaneu feta tunu-hotuk — 1.000 mango fe'ek-kala — 29 mangoanak-kala, nanataok neme lilopilas-sa mai — 30 mangoanak-kala, nanataok neme lilofulak-ka mai — 410 bua-lo'a fe'ek-kala — 1.000

¹¹Mango lilopilas ma lilofulak, boema bua-lo'a fe'ek-kala, basa-basas dede'un-na lifun lima natun haa. Sesbazar neni la'iesak bua-lo'as sila-la, ndek lelek fo, ndia ma hataholi nanafoo fe'ek-kala, fali ma'is leme Babel leo Yerusalem mai.