Read Termanu EZRA 4 Bible Online

EZRA 4 - Termanu bible

EZRA 4

¹Ala benga lae hataholi manafali ma'is leme mamana tu'u-tapak mai ndia, lafofo'a Israel MANETUALAIN-na Uman-na, boema hataholi Yehuda-la, ma hataholi Benyamin-nala musu non nala lamanene.

² Hu ndia de, leu latongo loo Zerubabel ma mane leo-la, de lafa'da sila hahapun-na lae, “Fe ami loak, fo ami tunga mafofo'a MANETUALAIN Uman ndia, nana ami boeo sene-do'ok neu tolanook-kala Manetualain-na, sama-na leo tolanook-kala boe. Ami fen tutunu-hohotuk tataas esa ndek Esar-Hadon, fo Asyur manen-na, no ami leo ia mai-a.”

³Tehu Zerubabel, Yesua, ma basa mane leo sila-la lataa lae, “Ami ta paluu emi tutulu-fafalim, fo besak-ka, ami mafofo'a fe ami MANETUALAIN uma fa. Nemen-na fo ami mesam-ma mafofo'an, fo nandaa no Kores, fo mane Persia paletan neu ami-a.”

⁴Basa boema, laun manaleo dook-ka nai nusak ndia so, ala tao-la hataholi Yahudi-la dalen-nala lakama'a, ma lakabibiik-kasa, fo ela ala hahae uman ndia tataon-na.

⁵Ala solo manapaleta Persia nenik doik, fo ela hataholi Yahudi-la dale tutu'un ndia, boso da'di. Dede'ak ndia, ana da'di nahele, neme lelek Mane Kores-sa ana paleta, losa Mane Darius-sa paleta.

⁶ Nai mane Ahasyweros-sa paleta makasososan-na, laun Yerusalem, ma laun Yehuda musun-nala, sulak susula kalaak.

⁷Boeo, nai tepo-lelek Artahsasta, fo Kesel Persia, ana paleta, manda'dik ndia dadi seluk: Bislam, Mitredat, Tabeel no nonoon-nala sulak fe manek-ka susulak. Susulak ndia, nanasulak nai dede'a Aram dale, de lees-sana soona, muse hataholi salin-nana.

⁸Artahsasta boeo, sipo susulak la'eneu Yerusalem. Susulak ndia neme Filana Rehum-ma mai, de Simsai fo propensi-a, hataholi manasulak susulan-na no nonoo-nala look-kasa. Nonoon-nala nde: basa manakee-manafula-la, ma basa manapaleta Persia fe'ek-kala, fo ala mai leme Erekh, Babel, ma Susan mai, fo nai nusa Elam-ma,

¹⁰boeo, neme leoina fe'ek, fo Asnapar Fo Matua-madema foo nenis, de ana fes leo lahele leme kota Samaria, ma kota-kota fe'ek manai propensi Efrat Muli dalek.

¹¹Susulak ndia liin-na nae leo ia, “Neme basa Ama Manek atam, fo manaleo nai Efrat Muli-la, ami fe Manek Artahsasta, susulak ia. So'da-molek.

¹²Ela leo been-na, Ama Manek bubuluk, mae hataholi Yahudi, fo mana la'o ela nggolo-nggolo fe'ek manai Ama Manek nusan ia dalek-ka, besak ia, ala leo lahele nai Yerusalem so, de lafofo'a falik kota mangalauk, ma ta manatunga paleta ndia fa. Ala mulai lafofo'a seluk papala nanadaman-nala, ma ta dook-ka so'on te, neukose basa bela-ba'uk ndia so.

¹³Metema lafofo'a falik kota ndia, fo lapadedeik basa papala nanadaman-nala soona, laun-na ta nau bae bea so'on, de neukose nusak-ka hahapun-na kulang so.

¹⁴Ami ta balas mabe'i Ama Manek dale malolen-na fa, ma ami ta nau lakatutu'dak Ama Manek fa. Hu ndia de, ami mafa'da ami hahapum-ma,

¹⁵fo ela Ama Manek madenu hataholi palisak besa-besa no Ama Manek bei-ba'i kain susulan-nala. Te neukose Ama Manek bubuluk neme susulak sila-la isin-na, nae memak kota Yerusalem-ma, nau ka'da la'ban manapaleta, ma neme makahulun-na mai, ana tao nakatutu'dak basa manek-kala ma manakoasa manai propensi-la tataas esa. Susa la'i esak-kana, hela-nole laun-nala. Hu ndia de, kota ndia, nanatao nakalulutuk.

¹⁶Da'di, ami mamahele, mae metema lafofo'a falik kota ndia, ma lapadedeik falik papala nanadaman-nala soona, neukose Ama Manek ta hapu paleta propensi Efrat Muli ia so'on.”

¹⁷Boema, manek-ka haitua hala natataan-na nae leo ia, “Neu Filana Rehum, ma Simsai fo propensi-a, hataholi manasulak susulan-na, ma basa sila tia-lain, fo manaleo manai Samaria, ma kota-kota fe'ek manai propensi Efrat Muli. So'da-molek.

¹⁸Susulak fo Tolanook-kala haituak-ka, ala salin-nana, de ala lees basan fe au so.

¹⁹Boema no au paletang-nga, de ala palisak matalololen so, de nananitak nai dalek, nae memak neme tepo-lelek makahulun eli mai, Yerusalem lena-la'ban tataas esa no manek-kala koasan-na, ma laun-nala, ba'un-na nde been-na, manalena-la'bak ma manatao tasibu.

²⁰Mane mabe'i-balakaik-kala, ala paleta hai leme naa so, de ala koasa-la, basa propensi Efrat Muli lala'en-na, boema lakalala'ok bea.

²¹Hu ndia de, kalua paleta leona, fo hahae heni hataholi sila-la bela-ba'un, fo ela boso lafofo'a falik kota ndia, losa au fe paleta fe'ek bai.

²²Makalala'ok au paletang ndia no lai-laik, fo ela boso lakatutu'da au, ba'u lena seluk bai!”

²³Artahsasta susulan ndia, nanalees basak neu Rehum, Simsai no tia-lain-nala, boema, no lai-laik leu leo Yerusalem leu, de lakaseti hataholi Yahudi-la, fo ala hahae lafofo'a falik kota ndia.

²⁴ MANETUALAIN Uman-na hahae tatao na so, de ala hahae lakandoo losa Darius, fo mane Persia paleta neu teu ka dua-na.