Read Termanu EZRA 6 Bible Online

EZRA 6 - Termanu bible

EZRA 6

¹Basa ndia boema, no Mane Kores-sa paletan-na, de ala palisak matalolole, nusak-ka susula makahulun-nala, fo nanape'dak nai Babel.

²Tehu susula liik la'eneu dede'ak ndia, ta hapun neme Babel fa, te hapun nai kota Ahmeta, fo nai nusa Media. Susula liik ndia, nanasulak nai susulan-nanalunuk esa dalek, de liin-na nae leo ia,

³“Nai Mane Kores-sa, ana paleta teu makasososan-na boema, ana kalua paleta, fo ela MANETUALAIN Uman manai Yerusalem-ma, nafofo'a falik-kana, fo da'di leo mamanak fo hataholi-la leni tunu-hotuk ma tunu tutunu-hohotuk. Uma ndia dedeman-na, muse metel duahulu hitu, ma loloan-na metel duahulu hitu boe.

⁴Papalan-nala, muse papalan sama leo iak: nai batu ta'dak telu lain, ma muse tao ai ta'dak esa neu. Sese'ba-babaen, pake kas nusak-ka doin-na.

⁵Boeo bua-lo'a lilopilas ma lilofulak, fo nanapakek nai MANETUALAIN Uman, ma Mane Nebukadnezar-ra ho'i nenis leme Yerusalem mai, de nenis leo Babel neu-a, muse tao falik-kasa le'us leu mamana makasososan-na.”

⁶Basa boema, Darius haitua hala natataak-ka nde ia nae, “Neu Tatnai, fo filana propensi Efrat Muli, ma Syetar-Boznai, boema basa manapaleta manai Erat Muli. Boso meu adu-dodoki hataholi Yahudi sila-la,

⁷ma boso mapanggengge sila Uma Mamason-na nafofo'an-na. Nemen-na, fo filana Yehuda, ma basa mauli-malanga Yahudi-la, nde lafofo'a falik Uma ndia.

⁸Sama-sama no susulak ia, au paleta tolanook-kala, fo tulu-falis nai uma ndia tataon-na dalek, no enon-na leo iak: Basa tali-doik fo paluun soaneu uma ndia tataon-na muse ho'in neme nusaina, bea manai propensi Efrat Muli, boema boso makamama'ak bae hataholi sila-la.

⁹Fe'ek neme ndia mai, metema ala paluu beek tunga basa imam manai Yerusalem-mala nonoken-na, fo leo loke sapi mane anak, bi'ilopo mane, ma bi'ilopoana, soaneu tutunu-hohotuk neu Manetualain, fo manakoasa nai nusa so'dak-ka, boeo gandum, masik, angol, ma mina zetun soona, muse fes tunga faik, fo boso makamama'ak.

¹⁰Tao basa sila-la, fo ela ala hapu fe tutunu-hohotuk nandaa no Manetualain, fo manakoasa nai nusa so'dak-ka dalen-na, ma fo ela ala loke baba'e-papalak ba'eneu au, ma ba'eneu basa au ana toung-ngala.

¹¹Au fe paleta, fo ela hataholi fo manala'o lena paleta ia, fe'a heni uman-na diin esa, fo tetei mamatane pe'dan-na, soona paun leo hataholi ndia aon dale neu, losa sapiselik-kana. Muse ofe heni uman-na, fo taon da'di mamana tutu'u kadafuk.

¹²Ela leo been-na, MANETUALAIN fo manahele basa Yerusalem, da'di leo Ndia mamanan fo ala sene-do'ok-kana, tao namate-namopo manek do leoina, fo napalani lena-la'ban paleta ia, ma ana so'ba-so'ba tao nakalulutuk MANETUALAIN Uman manai Yerusalem ndia. Au, Darius, nde fe paleta ia. Makalala'ok-kana no malole-malole.”

¹³Tatnai, fo filana nai Efrat Muli, ma Syetar-Boznai, boema tia-lain-nala, lakalala'ok Mane Darius-sa paletan ndia, no malolen-na.

¹⁴ Nabi Hagai, ma nabi Zakharia fali basa mauli-malanga Yahudi-la, de ala tao lakandoo MANETUALAIN Uman ndia. No lai-laik, ala tao lakababasak uma ndia, nandaa no paleta neme Israel Manetualain-na mai, ma Kores paletan-na, Darius ma Artahsasta, fo mane Persia sila-la.

¹⁵Neu hataholi Yahudi-la, bula Adar-ra fain telu, fo Mane Darius-sa paleta neu teu ka neen-na, boema tao basa MANETUALAIN Uman ndia.

¹⁶Basa boema, no namahokok, hataholi Israel-la, hataholi Lewi-la, ma basa hataholi nanafoo haik-kala, lakatema MANETUALAIN Uman ndia.

¹⁷Nai manda'dik faik ndia dalen-na, ala tunu-hotu fe MANETUALAIN sapi mane natun esa, bi'ilopo mane natun dua, ma bi'ilopoana natun haa. Soaneu tutunu-hohotuk, fo hapu do'o do ampon-na, ala tunu-hotu bi'ihii mane sanahulu dua, fo Israel leon esa soona ana fe esa.

¹⁸Basa boema, soaneu lau-onok nai MANETUALAIN Uman dale-a, ala baba'e imam-mala, boema hataholi Lewi-la, tunga nakanenetek fo nanasulak nai Musa susulan dale.

¹⁹ Nai hataholi Yahudi-la bula ka esa, fain sanahulu haa, fo nai teu manamaik-ka, boema basa hataholi manafali leme mamana tu'u-tapak mai, ala tao feta Paskah.

²⁰Basa imam-mala, ma hataholi Lewi-la, tao feta tao balisi aok-ka, nalosa lafa'da lae balisi so. Basa boema, hataholi Lewi sila-la do'do bana-manu soaneu tutunu-hohotu Paskah, ba'eneu basa imam-mala, ba'eneu sila boe, ma ba'eneu basa hataholi fo, nanafoo hai fe'ek-kala.

²¹Basa hataholi Israel fo manafali ma'is leme mamana tu'u-tapak mai-a, la'a tutunu-hohotuk sila-la, ma nusak ndia laun fo, manatukatei-saledale basak-kala, ala mai, fo ala sene-do'ok neu Amak, fo Israel MANETUALAIN-na.

²²Ala tao Feta Loti Ta Pake Laluteik-ka, faik hitu dalen-na, no namahoko-seteleek. Lamahoko lanseli, nana MANETUALAIN taon-na mane Asyur-ra nadale malole neus, nalosa ana falis nai lafofo'a falik, Israel MANETUALAIN, Uman-na.