Read Termanu EZRA 8 Bible Online

EZRA 8 - Termanu bible

EZRA 8

¹Basa maneleo fo nanafook leo Babel neu, ma manafali fali sama-sama loo au, ma Ezra leo Yerusalem mai, nai lelek Artahsasta paleta da'di leo manek-ka, susulan na'den-nala nde ia:

²Gersom, neme teidale-bobongi Pinehas-sa mai. Hatus, fo Sekhanya anan-na, neme teidale-bobongi Dauk-ka mai. Zakharia, neme teidale-bobongi Paros-sa mai, sama-sama no touk natun esa limahulu, leme teidale-bobongin-na mai (hapu susulak, ana tui sila bei-ba'in-nala momoli-dada'din) Elyoenai, fo Zerahya anan-na, neme teidale-bobongi Pahat-Moab-pa, sama-sama no touk natun dua. Sekhanya, fo Yahaziel anan-na, neme teidale bobongi Zatu-na mai, sama-sama no touk natun telu. Ebed, fo Yonatan anan-na, neme teidale bobongi Adin-na mai, sama-sama no touk limahulu. Yesaya, fo Atalya anan-na, neme teidale bobongi Elam-ma mai, sama-sama no touk hituhulu. Zebaja, fo Mikhael anan-na, neme teidale bobongi Sefaca mai, sama-sama no touk faluhulu. Obaja, fo Yehiel anan-na, neme teidale bobongi Yoab-pa mai, sama-sama no touk natun dua sanahulu falu. Selomit, fo Yosifya anan-na, neme teidale bobongi Bani-a mai, sama-sama no touk natun esa neehulu. Zakharia, fo Bebai anan-na, neme(...)

¹⁵Au aloo akabubua basa hataholi bubuak ndia lala'en-na, leme lee fo manafaa leo kota Ahawa neu-a, su'un-na, boema ami sungu nai lalaak-kala dalek, faik telu dalen-na. Au palisak basas, te se'kona hapu imam de'ubee lai dalek, tehu ta hapu esa boen, neme leo Lewi-a mai fa.

¹⁶Boema au aloo-a mauli-malangan sio, fo nde, Eliezer, Ariel, Semaya, Elnatan, Yarib, Elnatan, Natan, Zakharia, Mesulam ma mesen dua boe, fo nde Yoyarib ma Elnatan.

¹⁷Basa boema, au adenus, fo leu leo Ido, fo laun Kasifya malangan-na, fo loken fo daenga Ido no nonoo manatao bela-ba'uk manai MANETUALAIN Uman-na, ala haitua fe ami, hataholi soaneu lalalau-laoono nai MANETUALAIN Uman.

¹⁸Hu kande Manetualain dale malolen-na, de ala haitua fe ami Serebya, fo hataholi Lewi esa, dodole da'uk, neme teidale bobongi Mahli-a mai. Ana mai sama-sama no anan-nala, ma tolanoon-nala, fo dede'un-na, hataholi sanahulu falu.

¹⁹Boeo ala haitua fe ami Hasabya ma Yesaya, leme teidale bobongi Merari-a mai, loo tolanoo ka'a-fa'din-nala, hataholi duahulu.

²⁰Fe'ek neme ndia mai boe, hapu hataholi manatao bela-ba'uk manai MANETUALAIN Uman-na, hataholi natun dua duahulu, na'den-nala nanasulak boe. Neme makahulun eli mai, Mane Dauk-ka ma nusak-ka hataholi matua-mademan-nala, ho'i nakeketuk, fo sila bei-ba'i kain-nala lalalau-laoono fali hataholi Lewi-la.

²¹Boema au po'a-benga nai Lee Ahawa su'un-na, ae basa-basam-mala muse okaaom-mala, ma makaloe-makadae aom-ma nai Manetualain matan. Ami hule-haladoi, fo ela Manetualain hela-nole ami, nai ami leleo lala'om-ma dalek, boema nasulu-nahapa ami, ami anam-mala, ma basa ami hata-hetom lala'en-na.

²²Au ta apalani oke manek-ka, solda'du manasa'e ndalan, fo nasulu-nahapa ami neme musu-a mai, nai ami leleo-lala'om-ma dalek. Nana, au afa'da basa, ae ami Manetualaim-ma, Ana ba'e-pala hataholi see fo, ana sene-do'ok neun, tehu Ana huku hataholi see fo, nape'da dale nasak-kana, ma ta lilineka neu fan.

²³Boema ami okaaom-mala ma hule-haladoi neu MANETUALAIN, fo ami moke nasulu-nahapak, de Ana sipok ami hule-haladoim boe.

²⁴Au hele hataholi sanahulu dua leme imam nananita-nalelak-kala dalek mai, fo nde: Serebya, Hasabya, ma hataholi fe'ek sanahulu seluk bai.

²⁵Basa boema au tai fes lilofulak, lilopilas ma bua-lo'as, fo tutulu-fafalik neme manek-ka no basa manamanolin-mafa'dan-nala, boema hataholi matua-madema-la ma basa hataholi Israel-la mai, fo ala paken nai MANETUALAIN Uman dale. Au fe basa buas sila-la leo basa imam sila-la neu.

²⁶Tutulu-fafalik sila-la, susulan-na nde ia: Lilofulak — ton 22. Bua-lo'a lilofulak 100 — belan-na kilo 70. Lilopilas — kilo 3.400. Mango lilopilas 20 — belan-na, kilo 8 ons 4. Mango liti mana'ahiik 2 — belin-na sama leo mango lilopilas-sa boe.

²⁸Au afa'da basa imam sila-la ae, “Emi nanahele hehelik soaneu MANETUALAIN, fo ita bei-ba'i kain-nala sene-do'ok-ka. Leondiak boe, basa bua-lo'a lilofulak ma lilopilas fo ala fe tutulu-fafalik neu MANETUALAIN-na, nde been-na hehelik soaneu MANETUALAIN.

²⁹Manea matalolole bua-lo'as sila-la, losa emi basa-basam-mala losa MANETUALAIN Uman. Metema emi losa naa soona, emi basa-basam-mala muse tai bua-lo'as sila-la, fo fen leo imam mala malangan-na ma hataholi Lewi-la mauli-malangan-nala, boema hataholi Israel-la mauli-malangan manai Yerusalem-ma.”

³⁰Boema, basa imam-mala, ma hataholi Lewi sila-la sipo-la lilofulak, lilopilas ma bua-lo'as sila-la, de lenis leo MANETUALAIN Uman manai Yerusalem-ma neu.

³¹Nai hataholi Yahudi-la bula ka esan-na, fain sanahulu dua boema, ami la'oela Lee Ahawa, de ami meu leo Yerusalem meu. Nai ami leleo-lala'om-ma dalek, ami Manetualaim-ma nasulu-nahapa ami, neme musu mamain-na.

³²Lelek ami losa Yerusalem, boema ami hahaeaom, faik telu dalen-na.

³³Basa boema, nai faik ka haan-na, ami meu leo MANETUALAIN Uman meu, de ami tai lilofulak, lilopilas ma bua-lo'as sila-la. Basa ndia boema, ami fes leo Imam Meremot, fo Uria anan-na neu, de manasakasiik-kala nde Eleazar, fo Pinehas anan-na, ma hataholi Lewi dua, fo nde Yozabad, fo Yesua anan-na, ma Noaja, fo Binui anan-na.

³⁴Basa bua-lo'as sila-la nanalekek ma nanataik, boema nanasulak no matetuk.

³⁵Nai faik ndia boe, basa hataholi fo manafali ma'is leme mamana tu'u-tapak mai ndia, ala fe tutunu-hohotu nanatunuk neu Israel Manetualain-na. Ala tunu-hotu sapi mane sanahulu dua, soaneu basa Israel-lala'en-na, bi'ilopo mane siohulu nee, ma bi'ilopoana hituhulu hitu; fe'ek neme ndia mai boe, ala tunu-hotu bi'ihiik sanahulu dua, soaneu tutunu-hohotu do'o do ampon ba'eneu sila boe. Ala tunu basa bana sila-la, da'di leo tutunu-hohotuk soaneu MANETUALAIN.

³⁶Boema manek-ka fes susula palaak teu netek-ka, fo landuku-lalosak-kana neu basa filana, ma manapaleta propensi Efrat Muli. Boema manapaleta sila-la, ala fe laun-na tutulu-fafalik, fo ela ala sene-do'ok lahele nai MANETUALAIN Uman.