Read Termanu NEHEMIA 1 Bible Online

NEHEMIA 1 - Termanu bible

NEHEMIA 1

¹Nehemia fo Hakhalya anan-na hala nafa'dan-na nde ia la'eneu ue-le'din-nala. Nai hataholi Yahudi-la bula Kislew, fo Artahsasta paleta da'dileo manek nai Persia neu teu ka duahulun-na, au, Nehemia nai Susan, fo nusak-ka polon-na.

²Nai lelek ndia, au tolanoong Hanani, neme Yehuda mai sama-sama no hataholi de'ubee. Boema au atanes la'eneu nai Yerusalem leobek so, ma hataholi fo manafali ma'is leme mamana okak manai Babel la.

³Ala tui lae hataholi nanafoo haik fo manafali ma'is leo dae-oen mai sila-la, besak ia laso'da no doidosok ma ala hapu nakamumulu-nakamamaek neme leoina nusa dea manai titia-tatain-nala. Bai te, kota Yerusalem-ma papala nanadaman-nala lutu-lutu, de bei besenggela-besenggali ma lelesuinan-nala beita nanatao matalololek neme lelek makahulun-na nanahotu henik-ka mai.

⁴Au amanene halak ndia boema, au angatuuk de au kii. Tunga faik, au daleng-nga he'dis-sa. Au okaaong akandoo, boema hule-haladoi neu Manetualain ae,

⁵“Ou MANETUALAIN Manetualain fo manakoasa nai nusa so'dak-ka. O, Manetualain fo Matuaina, de ami mai leo O matam no bibii-namata'uk. O lilineka mahele, ma O ho'u mahele O hehelu-balataam neu hataholi fo manasue-lai neu O, ma manatunga O paletam-ma.

⁶Mete au, ou MANETUALAIN, ma mamanene au hule-haladoi lele'do le'odaen soaneu hataholi Israel, fo O atam sila-la. Au manaku ae ami, fo hataholi Israel-la, masala-masingo so; au ma au bei-ba'i kaing-ngala masala-masingo so boe.

⁷Ami malelesi basa O ma ami la'olena O paletam-mala so. Ami ta tunga hoholo-lalanek fo O fen neu ami tunga Musa, fo O atam ndia.

⁸ Ou MANETUALAIN, mafandendelek O hala-kokolam fo O paleta Musa nafa'dan nae metema ami, fo hataholi Israe la, ta lilineka neu O fa soona, neukose O tao tapasasala ami nai leoina fe'ek-kala tala'da.

⁹ Tehu metema ami fali seluk leo O mai, ma ami tunga O paletam-ma soona ami fo manatapasasalak ia-la, neukose O tao makabubua seluk ami, leomae ami nai daebafak-ka pe'dan-nala boe. Boema neukose O moo falik ami leo mamanak fo O hele basan soaneu da'di mamana huhule-haladoik neu O.

¹⁰MANETUALAIN, ami ia O atam-mala, O ana mesam, fo O soi-tefa basan nenik O koasam-ma, ma O bei-bakai matuainam-ma.

¹¹Mamanene au huhule-haladoing ma basa O ata fe'e-fe'em fo mananau fe ha'da holomata neu O-a, huhule-halaon-nala. Fe O tutulu-fafalim mai leona, fo ela nai faik ia, O atam ia, hapu dale kasian neme manek-ka mai.” Nai tepo-lelek ndia, au nde manaito-ato manek-ka nininun-na.