Read Termanu NEHEMIA 12 Bible Online

NEHEMIA 12 - Termanu bible

NEHEMIA 12

¹Basa imam-mala ma hataholi Lewi fo manafali ma'is leme mamana tu'u-tapak mai, sama-sama loo Zerubabel fo Sealtiel anan-na ma loo Imam Matuaina Yesua nde ia:

²Imam-mala: Seraya, Yeremia, Ezra, Amarya, Malukh, Hatus, Sekhanya, Rehum, Meremot, Ido, Ginetoi, Abia, Miyamin, Maaja, Bilga, Semaya, Yoyarib, Yedaya, Salu, Amok, Hilkia ma Yedaya. Hataholi sila nde been-na malanga imam nai Yesua tepo-lelen-na.

⁸Hataholi Lewi-la: Mauli-malanga nakamee makasi: Yesua, Binui, Kadmiel, Serebya, Yehuda ma Matanya.

⁹Manamakameek fo lakamee nakamee natataak-ka: Bakbukya, Uni ma nonoon-nala fo sila leo-ingu esa.

¹⁰Imam Matuaina Yesua, tititi-nonosin nde ia: Yesua, Yoyakim, Elyasib, Yoyada.

¹¹Yonatan, Yadua.

¹²Basa malanga imam-mala loo sila leo-ingu-nala nai lelek Yoyakim ho'u bela-ba'uk da'dileo Imam Matuaina, susulan-na nde ia: [Imam] — [Leo-ingu] Meraya — Seraya Hananya — Yeremia Mesulam — Ezra Yohanan — Amarya Yonatan — Melikhu Yusuf — Sebanya Adna — Harim Helkai — Merayot Zakharia — Ido Mesulam — Gineton Zikhri — Abia … — Minyamin Piltai — Moaja Samua — Bilga Yonatan — Semaya Matnai — Yoyarib Uzi — Yedaya Kalai — Salai Heber — Amok Hasabya — Hilkia Netaneel — Yedaya

²²Susula na'dek la'eneu hataholi Lewi-la malanga uma loon-nala, ma imam-mala teidalen-na, nanasula basak nai basa Imam Matuaina-la tepo-lelen-na nde ia: Elyasib, Yoyada, Yohanan ma Yadua. Susula na'dek ndia nanasula basak ndek lelek Darius paleta da'dileo mane Persia.

²³Tehu la'eneu leo-ingu Lewi-a malanga uma loon-nala, nanasulak losa ka'da Yonatan fo Elyasib upun-na, tepo-lelen-na.

²⁴No Hasabya, Serebya, Yesua, Binui ma Kadmiel nauli-nalangan de, hataholi Lewi-a nanaba'ek neu bubuak de'ubee. La'i esa soona, bubuak dua hapu bela-ba'uk koa-kio MANETUALAIN ma langganggatik loke makasi neun, nandaa no Mane Dauk fo Manetualain atan ndia, nakaneneten-na.

²⁵Basa manamanea MANETUALAIN Uman-na lelesuinan fo manahapu bela-ba'uk lanea kama-kama nana'ak fo manadeka no MANETUALAIN Uman-na lelesuinan-na, nde ia: Matanya, Bakbukya, Obaja, Mesulam, Talmon ma Akub.

²⁶Hataholi sila laso'da nai Yoyakim fo Yesua anan-na ma Yozadak upun-na tepo-lelen-na, ma nai Gobelnol Nehemia ma Imam Ezra, fo malelaina nai hoholo-lalanek ndia, tepo-lelen-na.

²⁷Lelek lakatema kota Yerusalem-ma papala nanadaman-na, laloo hataholi Lewi-la leme basa sila mamana leleon lala'en-na mai, fo ela ala tunga tao makaseek nai feta ndia nenik nakamee makasi, ma nenik sasanu, gambus ma kecapi.

²⁸Boema manamakameek maneme Lewi teidalen sila-la lakabubua, nau leme mamana leleon manai Yerusalem boboa-kaisun mai, do leme kota-kota manai Netofa boboa-kaisun mai boe,

²⁹leme Bet-Gilgal, Geba ma Asmawet.

³⁰Basa imam, ma hataholi Lewi sila-la, tao feta tao balisik soaneu sila aoinan-nala, basa boema soaneu laun-na, soaneu lelesuina-la ma kota papala nanadaman-na.

³¹Au fe basa mauli-malanga Yehuda-la loak fo kae leo papala nanadamak lain leu, fo lapadeik lakadadalak da'di bubua matua dua, fo neukose ala la'ok lakadadalak okofefeok kota, boema lakamee nakamee makasi neu Manetualain. Bubuak makasososak-ka, ala la'ok lakadadalak nai papala nanadamak lain, lasale leo kona neu, fo leo Lelesuina Kadafuk-la neu.

³²Hosaya la'ok nai manamakameek-kala dean-na, basa boema mauli-malanga Yehuda-la baba'ek esa tunga.

³³Basa imam manala'ok nai sila dean-na, boema ala puu pupuuk-ka nde ia: Azarya, Ezra, Mesulam, Yehuda, Benyamin, Semaya ma Yeremia. Basa boema Zakharia fo Yonatan anan-na ma Semaya upum-na tunga. Sila bei-ba'i kain de'ubee nde ia: Matanya, Mikha, Zakur neme leo-ingu Asaf-fa mai.

³⁶Sila leo-ingu manala'ok nai sila dean-na nde: Semaya, Azareel, Milalai, Gilalai, Maai, Netaneel, Yehuda ma Hanani. Sila basa-basas leni sasanu lupak esa no Mane Dauk fo Manetualain atan ndia, nakaminak-ka. Imam Ezra, fo malelaina nai Manetualain hoholo-lalanen ndia, la'ok nai manala'ok lakadadalak ndia langan-na.

³⁷Ala losa Lelesuina Oe Lili'dok-ka boema, ala heo de ala kae edak Kota Dauk-ka, tunga Dauk uma manen-na, boema ala fali ma'is leo papala nanadamak manai Lelesuina Oe-a nai kota boboan dulu.

³⁸Manamakameek bubuak esa seluk, ala la'ok lakadadalak nai papala nanadamak lain lasale leo kii leu, de au sama-sama o laun-na seli, tungas. Ami la'ok makadadalak tunga Uma Puni Madema fo mamanak tutunu loti losa Papala nanadamak Maloa.

³⁹Boema ami tunga Lelesuina Efraim, Lelesuina Palaak, Lelesuina I'ak, Menara Hananeel ma Menara Mea losa Lelesuina Bi'ilopo-a. Ami mate'e deka Lelesuina Naneak-ka, deka no MANETUALAIN Uman-na.

⁴⁰Boema manamakameek bubua ka duak sila losa nai deka no MANETUALAIN Uman-na. Fe'ek neme basa mauli-malangan manai au bubuang-nga dalek,

⁴¹imam-imam manapuu pupuuk-kala boeo ala tunga. Imam sila-la nde: Elyakim, Maaseya, Minyamin, Mikha, Elyoenai, Zakharia ma Hananya;

⁴²Manala'ok nai sila dean-na nde Maaseya, Semaya, Eleazar, Uzi, Yohanan, Malkia, Elam ma Ezer. Yizrahya nauli-nalanga de basa manamakameek-kala lakamee.

⁴³Nai faik ndia, tutunu-hohotuk makadotok nanatunu-hotuk soaneu MANETUALAIN. Laun-na lamahoko-setelee nanahu MANETUALAIN fes laua-lanale. Basa inak-kala ma ni'iana-la boeo tunga feta, de sila hala hika-natadalen-nala, lamanenen losa dook-ka.

⁴⁴Nai lelek ndia, hataholi de'ubee hapu bela-ba'uk lanea kama nana'ak-kala, mamanak fo nai bee ala pe'da tutulu-fafalik soaneu MANETUALAIN Uman-na, fo nai dalek hapu hataholi-a fe baba'ek esa neme ba'eneu sahulu mai, ma boa-boa makasososak-ka, tunga teun. Basa manamanea sila-la, muse leu loke tutulu-fafalik sila neme tina-tina manai kota-kota-la boboa-kaisun mai. Ala fe tutulu-fafalik sila-la leo imam-mala, ma hataholi Lewi-la, nandaa no Hoholo-lalanek nakaneneten. Hataholi Yehuda-la fe ha'da-holomata neu basa imam-mala ma hataholi Lewi sila-la,

⁴⁵ nanahu sila nde tao feta tao balisi aok-ka, ma feta-feta fe'ek fo Manetualain paleta basan so. Basa manamakaminak sasanu-la ma manamanea MANETUALAIN Uman-na lelesuinan-na boeo, lakalala'ok sila bela-ba'un, nandaa no Mane Dauk-ka ma anamanen Salomo paletan-na.

⁴⁶Mulai neme Mane Dauk-ka ma Asaf fo malelaina nai sasanu ndia tepo-lelen-na, basa manamakameek-kala lakamee nakamee kokoa-kikiok makasi soaneu Manetualain.

⁴⁷Nai Zerubabel tepo-lelen-na ma nai Nehemia tepo-lelen-na boeo, basa laun Israel-la lala'en-na fe tunu-hotuk soaneu tao latetu basa manamakameek-kala ma manamanea lelesuina nai MANETUALAIN Uman-na, paluu tunga fain-na. Laun-na fe tunu-hotu hehelik soaneu hataholi Lewi-la, ma hataholi Lewi-la boeo, fe leo basa imam-mala, baba'ek fo nananaketu basak so.