Read Termanu NEHEMIA 2 Bible Online

NEHEMIA 2 - Termanu bible

NEHEMIA 2

¹Nai faik esa, fo bulak haa makabuin-na, fo nde nai hataholi Yahudi-la bula Nisan-na, lelek Mane Artahsasta na'a-ninu, boema au sadia fen nininuk no mata-pana makamamasuk. Beita la'iesa fo nita au mata-panang nono'kabai makamamasuk-ka nai matan-na sama leo nai faik ndia fa.

²Hu ndia de natane nae, “Tao le'e de, o dalem-ma he'dis-sa, te se'kona o ta mamahe'di fa? Tao leo bee-o, o susa hata esa so.” Au nggenge-la,

³ boema au ataa ae, “So'dak ba'eneu Ama Manek losa dodoon-na! Tao leo bee fo atam-ma dalen-na ta he'dis-sa fa, metema kota fo au bei-ba'i kaing-ngala mamana natoi-natonon-nala, besak ia ela ka'da ai batu madodouk-kala, ma ha'i na'a nakalulutuk basa lelesuinan-nala so.”

⁴Boema manek-ka natane nae, “Da'di, o mahiik beek?” Au hule-haladoi nai au daleng dale neu Manetualain manakoasa nai nusa so'dak-ka,

⁵boema au afa'da manek-ka ae, “Metema Ama Manek nau ma nau sipok atam-ma nonoken-na soona, madenu atam-ma neu leo dae Yehuda neu soaneu nafofo'a falik kota fo atam-ma bei-ba'i kain-nala mamana natoi-natonon-nala.”

⁶Boema manek-ka bei nangatuuk no Ina Manek-ka, sipok au dokodoeng-nga. Natane au nai naa doo bee, ma faihi'da au fali ma'ing-nga, boema au afa'dan, bulak-ka fain fo au aketu basan so.

⁷Basa boema au oke susulak soaneu basa gobelnol manai propensi Efrat Muli, fo ela ala boso lapanggengge au leleo-lala'ong losa Yehuda.

⁸Fe'ek neme ndia mai, au boeo oke susulak soaneu Azaf, fo nusak-ka manamanea nulan-na, fo ela ana sadia ai soaneu kota musu lelesuinan-na, deka no MANETUALAIN Uman-na, ma soaneu kota papala nanadaman-na, boema uma fo neukose au leo nai dalek-ka. Manek-ka tao natetu basa au nonokeng sila-la, nanahu Manetualain tulu-fali au.

⁹Manek-ka paleta malanga solda'du manai lain de'ubee ma solda'du manasa'e ndala-la, fo ala la'ok sama-sama loo au, boema au u leo Efrat Muli u. Au losa naa boema, au fe manek-ka susulan ndia neu basa gobelnol-lala.

¹⁰Tehu lelek Sanbalat, fo hataholi Bet-Heron ndia, ma Tobia, fo manapaleta esa neme Amon mai, namanene lae au mai soaneu leoina Israel-la paluun-na boema lasasale dale lanseli.

¹¹Au losa Yerusalem boema, au hahaeaong faik telu.

¹²Dodoo basa ndia, au ta afa'da su'di see boen, ae Manetualain fe au ninitak soaneu afofo'a falik kota Yerusalem-ma. Balahaa le'odae, de au fo'a boema au leleko au nonoong de'ubee de ami la'o no le'odaek leo kota deak meu. Fe'ek neme au sa'e keledei-a mai, ami ta meni bana sasa'e fe'ek fa.

¹³Lelek ami la'oela kota tunga Lelesuina Bafak-ka nai muli te bei le'odaek. Ami la'ok masale leo kona meu, fo leo Lelesuina Kadafuk-ka meu, de ami tunga Oe Mata Naga. Nai leleo-lala'ok ndia dalek, au palisak nalutu-nalutuk manai kota papala nanadaman-nala, de au ita lelesuina fo ha'i na'a nalutuk-kala boe.

¹⁴Basa boema, ami la'ok makandoo meme kota boboan dulu leo kii meu, fo leo Lelesuina Oe Manasikouk-ka ma Lifu Manek-ka meu. Tehu hapu enok nai ndia, soaneu au sa'e keledei ndia fa, nanahu ai batu manadodouk ba'uk-ka nai ndia.

¹⁵Da'di ami kona leo Bafak Kidron-na meu, de le'odaek ndia ami la'ok makandoo, boema palisak kota papala nanadaman-na. Basa ndia boema, ami lepos de ami fali leo kota meu, tunga Lelesuina Bafak-ka.

¹⁶Ta hapu lasi nggolok nananita-nalelak esa boen, bubuluk au leo bee u, ma hata fo au tutu'u nana fa. Nana losa lelek ndia, au beita afa'da hata-hata neu au leoinang-nga fa, nau neu basa Imam-mala do neu basa hataholi nananita-nalelak-kala, do neu basa hataholi mana'a ngga'di-la, do neu su'di see fo neukose ana tunga nafofo'a kota Yerusalem-ma.

¹⁷Tehu basa boema, au afa'das ae, “Mete ita so'dan fo manadoi-dosok ia leona! Yerusalem, ela ka'da ai batu madodoun-na, ma ha'i na'a heni basa lelesuinan-nala. Mai fo tafofo'a falik papala nanadamak Yerusalem-mala, fo ela ta lakamumulu-lakamamaek seluk ita fa.”

¹⁸Boema au tuis, tao leo bee de Manetualain tulu-fali au ma hata fo manek-ka nafa'da basan neu au so. Boema lataa lae, “Mai fo ata mulai tafofo'a!” Boema lahehele aon soaneu ala mulai tao bela-ba'uk ndia.

¹⁹Lelek Sanbalat, Tobia, ma Gesyem, fo hataholi Arab ndia, bubuluk ami dale tutu'um ndia boema, ala hika ma hakinonoli ami. Lafa'da lae, “Emi sanga tao beek? Ade emi sanga la'ban manek-ka paletan-na do?”

²⁰Boema au ataa ae, “Manetualain fo manakoasa nai nusa so'dak-ka, neukose Ana tao-na ami ue-le'dim nabuna-naboa. Ami nde been-na Ndia atan-nala, de neukose ami mulai mafofo'a. Tehu emi ta manuu hak do pusaka hata esa boen nai Yerusalem fa. Nakalenak metema hataholi kokolak la'eneu Yerusalem soona, neukose ala ta seseik o na'dem-ma fa.”