Read Termanu NEHEMIA 9 Bible Online

NEHEMIA 9 - Termanu bible

NEHEMIA 9

¹Nai bulak ndia fain duahulu haa boe, laun Israel-la lakabubua. Ala okaaon-nala fo latu'du lae sila sale-dale neu sila sala-singon-nala. Ala ta lakabubua loo basa hataholi nusa dea-la fa. Ala pake lafa kalong ma ala nggali dae neu langan-nala lain, fo da'dileo ta'du-tana dale he'dik. Basa boema, ala fo'a lapadeik fo ala manaku basa sila sala-singon lala'en-na, ma sila bei-ba'i kain-nala sala-singon.

³Fafa'kama nai li'u telu dalen-na, ala lees fes MANETUALAIN fo sila Manetualain-na Susula Hoholo-lalanen, ma basa de nai li'u telu dalen-na, ala manaku sila sala-singon-nala. Basa ndia boema, ala sene-do'ok neu MANETUALAIN, fo sila Manetualain-na.

⁴Nai ndia, hapu mimbar soaneu hataholi Lewi-la, de manamapadeik manai lain-na Yesua, Bani, Kadmiel, Sebanya, Buni, Serebya, Bani ma Kenani. Ala hule-haladoi lapane'e neu MANETUALAIN, fo sila Manetualain-na.

⁵Hataholi Lewi-la nde mulai nakaluku-nakatelek ndia. Hataholi Lewi sila-la nde: Yesua, Kadmiel, Bani, Hasabneya, Serebya, Hodia, Sebanya ma Petahya. Lafa'da lae, “Fo'a mapadeik fo koa-kio MANETUALAIN fo ita Manetualain-na! Fe kokoa-kikiok neun losa dodon-na neu! Koa-kio na'den fo henuk no mandela-masa'ak, na'dek fo maneni-mafa'dak, lena heni basa koa-kiok lala'en-na!”

⁶Basa boema, laun Israel-la hule-haladoi lae, “O nde MANETUALAIN, O nde Fo Ka'da Kisak; O makadada'dik nduuk ma lalai maloa lala'en-na, boeo tasi ma daebafak-ka no basa oe isin lala'en-na, boema O fe maso'dak ma O makaboboi, Basa koasa manai lalai lala'en-na, sene-do'ok neu O; ala lakatele neu O, ma sene-do'ok.

⁷ O nde Manetualain, MANETUALAIN Fo Kisak. O hele Abram neme leoinan-na tala'da mai. Ana la'o ela Ur nai Babel so, nanahu O mesam-ma nde hela-nolen-nana. Boema O fen na'de beuk: Abraham, fo na'dek ndia nde loken nai lelek ndia.

⁸ O bubuluk ana lilineka neu O, ma ana tunga paleta. Boema O tao hehelu-balataa matea-mahelek mon. Dae Kana'an, Het ma Amori, dae Feris, Yebus ma Girgasi, O sanga fen basa sila-la; da'dileo tititi-nonosin lala'en-na, mamana leleon-na. Basa boema, O tao matetu hehelu-balataak ndia ba'eneun, nana O ndoos ma matetuk, ma lilineka.

⁹ O mita ami bei-ba'i kaim doi-doson nai fai maneuk-ka; O mamanene kii-makaleleun nai Masir ma nai Tasi Teberau.

¹⁰ O tao dede'a matuaina-la soaneu mane Masir-ra, boeo soaneu hataholi mana'a ngga'di-la boema laun manai nusan-na, nana O bubuluk tao leo beek ala fepa-li'u O anam-mala. Boema O na'dem-ma nananita-nalelak losa faik ia.

¹¹ Soaneu tao enok fe O anam-mala, de O ta'da ba'e tasi oe-a neu dua; O makalelenak-kasa tunga tasi buin-na fo ta makadoek fa. Basa manausis-sala, bolo nai oe madema dale, sama leo batu tena nai tasi manafo'ak-ka dalek.

¹² O mauli-malangas nai fai lele'don-na, nenik ko'as bubuak esa. Ma nai fai le'odaen-na, O tao mangale'do enon-na nenik dii ha'ik-ka.

¹³ O kona meme lalai mai, leo Lete Sinai lain, boema O kokolak moo O ana mesam-ma. O fes hoholo-lalanek, nakanenetek ma paleta fo ndoos ma matetuk ma masosoa-ndandaak.

¹⁴Muse ala tao Fai Sabat fo malalao-malalafuk-ka, ma O fe O hoholo-lalanem tunga Musa.

¹⁵ Lelek lamala'a ma ala to'a-ta nana'a-nininuk, O makona loti neme lalai mai. Ma O fe oe manatao namopo maa ma'dak-ka, nasapula neme batuisik matea ma mahelek dale mai, O madenus langatuu-la dae fo O helu neun nenik soo-supa.

¹⁶ Tehu ami bei-ba'i kaim koao-ndaeao ma latea dalen-nala; ala ta tao tunga O paletam-mala fa.

¹⁷ Ala ta tunga fa, lafandele heni O dale malolem lala'en-na, ma lafandele heni basa O tatao-nono'i manada'di beum-mala. No koao-ndaeaok, ala hele mauli-malangan esa, fo nos leo Masir leu fo da'di ata seluk. Tehu O Manetualain fo nau fe do'o do ampon, hahae naluk, dale malole ma manasue laik. O susue-lalaim, tete'ek-ka ba'un-na seli; O ta la'o ela fas.

¹⁸ Ala tao sosongo-tatangok sama leo sapi-a. Boema lafa'da lae, ‘Emi Manetualaim-ma nde ia, fo no emi neme Masir.’ Ou Manetualain, lakamumulu-lakamamaek-ka nde O mesam-ma!

¹⁹ Tehu O ta la'oela fas, nai moo solokaek ndia fa, nanahu O henuk no susue-lalaik-ka. O ta fe'a heni dii ko'as-sa ma dii ha'ik-ka fa, manamatu'du sila enon-na nai fai lele'don-na ma fai le'odaen-na.

²⁰O manolis menik O koasa malolem-ma La'a manna ma linu oe losa su'di bebe'ik-ka.

²¹Nai teuk haahulu dalen-na, lai moo solokaek-ka. O tao matetu sila paluun lala'en-na. Bua papaken-nala, ta siba'e nita fas, ein-nala ta he'dis-sa do peta-pae fa,

²² O fes ala sengi nusak makadotok ma leoina manai sila dae toon-na. Langatuu-la Hesybon, fo Mane Sihon nusan-na; Ala leo-la Basan fo Mane Og-ka nusan-na.

²³ O makadada'dik tititi-nonosin-nala de'u nduuk manai lalai-a. O fes dae fo ala leo, dae fo O helu basan neu bei-ba'i kain so.

²⁴ Sila tititi-nonosin sengi dae Kana'an-na; O taom-ma laun manai naa-la ta so'uk langan-nala fa. O fe O anam-mala koasa, fo ala tao tunga sila dale hihiin-na soaneu leoina Kanaan-nala ma manen-nala.

²⁵ O anam-mala langatuu-la kota musu-la dae maoe-maisik, ma uma henuk no su'i-betes. Ala besla-la oedolu-la, ma oemata-la. Osi anggol, ai setun ma ai boa fe'e-fe'ek-kala. Laao nanahu la'a-linu su'di bebe'ik-ka. Lame'da O baba'e-babati malolem lala'en-na.

²⁶ Tehu O anam-mala lalenalanga-lasa'basoo, ma ala ta tunga O fa, ala ta taoafik neu O hoholo-lalanem ma O nakanenetem-ma fa, ala taolisa nabi-nabi fo manafes nasanene'dak-ka, ma manamadenu fo ala fali ma'is leo O mai, fo sila Manetualain-na. Ou MANETUALAIN, nai lelek lakamumulu-lakamamaek O,

²⁷boema O fes leo musun-na fo no dale susue-lalai tak, ala koasas ma tuni-ndenis. Tehu nai susa fo ana tuni-nalas-sa, laloo bebou neu O loke tutulu-fafalik. O mamanene neme nusa so'dak-ka mai; O fe natataak no susue-lalai henuk. O haitua mauli-malangan ma palani ta'ti batu, fo soi-po'is leme musu nok-ka mai.

²⁸Tehu lelek nusan-na nee-nee lino-lino seluk, boema no lai-laik lasala-lasingo seluk. Boema O boeo fes leo musu manatuni-ndenik-ka neu. Tehu, lelek fo lame'da boema lasasale dale lanseli, laloo bebou neu O, fo loke soi-tefak. Boema O mamanene neme nusa so'dak-ka mai, de O tulu-falis do'e-do'e, nana O dale ma tu'da soaneus, ma O susue-lalaim ba'un-na seli.

²⁹ O fes nasanene'dak, fo ela ala tunga O nanolim-ma, Tehu no koao-ndaeaok, ala ta sipok O hoholo-lalanem fa. Te se'kona, metema ala tao tunga O hoholo-lalanem soona, tao leo bee-o, neukose so'dan-nala da'di malole. Sila langa batuk ma dale matea, ta nau lamanene, ta nau tunga fa.

³⁰ Teuk nggati teuk, O ta haelai mamanasa soaneu fes nasanene'dak; O Duladalem-ma nafa'das tunga basa nabi-la. Tehu O anam sila-la ko'o ketu di'idoon-nala, boema O fes leo basa leoina manai nusak lala'en-na neu.

³¹Tehu, hu kande O susue-lalai matuainam-ma, de O ta la'o ela do tao makalulutuk-kasa fa. Memak, O nde Manetualain fo nakasasaman ta; O susue-lalaim ba'un-na seli, henuk no dale kasian!

³² Ou Manetualain, ami Manetualaim fo balakaik! Manetualain fo matua ma anseli! O ho'u mahele hehelu-balataak lala'en-na no lilinekak; O tao matetu ma O makalala'ok O hehelu-balataam. Neme tepo-lelek, basa mane Asyur-rala tuni-ndeni ami losa besak ia, ami la'ola'di doidosok makadotok. Ami mane-manem-mala, imam-mala, nabi-la ma basa lasi-lasik-kala, boeo bei-ba'i kai-la, ma laun-na, basa-basas doi-doso so Boso mafandele heni doidosok sila-lala'en-na! Boso tao mamopon neme O dale nasanene'dam-ma mai!

³³O nakeketum-ma ndoos ma matetuk, O huku ami fo masala-masingok; O lilineka mahele, leomae ami henuk no bu'u-ba'ek.

³⁴Ami bei-ba'i kaim, manek, imam, ma basa lasi-lasik-kala, la'o lena O hoholo-lalanem boema ami heheta-aa'in. O fe basa paleta ma hala kaka'ik lala'en-na ma ta nanataoafik, boeo ta nananamanenek fa.

³⁵O fe basa manek fo manapaleta O anam-mala, nai lelek ala leo nai dae maloaina ma maoe-maisi. Tehu ala ta nau la'o ela so'da mangalaun-nala fa, ala ta nau fe so'dan-nala neu O, boema ala ta nau sene-do'ok fa.

³⁶Hu ndia de besak ia ami da'di ata nai dae fo O fen da'dileo pusaka. Dae ia maoe-maisik, henuk no buna-boak, fo tunga ndoon-na, ami muse mi'a mitan.

³⁷Basa dae ia oe-isin lala'en-na muse fen leo mane-mane nusak-ka neu. O so'u basa manakoasa sila-la soaneu O anam-mala, da'dileo huhukuk soaneu ami sala-singom neu O-a. Ala paleta tunga dale hihii-nanau mesan-na neu ami ma ami bana-manum. Hu ndia de, besak ia ami doi-doso, henuk no toto'a-tataak ma dale he'di!”

³⁸Hu ka nde manada'dik sila lala'en-na, de ami laun Israel-la tao hehelu-balataak matea-nahelek ma nanasulak, ma ami cap-pana nenik ami mauli-malangam fo hataholi Lewi-la, ma ami imam esa cap-pa.