Read Termanu ESTER 3 Bible Online

ESTER 3 - Termanu bible

ESTER 3

¹Basa faik de'ubee boema, Mane Ahasyweros-sa so'u touk esa na'de Haman, fo da'di malangan neu basa malangan-nala. Haman nde been-na, Hamedata anan, fo neme Agag bobongin-na mai.

²Manek-ka fe paleta neu basa hataholi mana'a ngga'din-nala, fo ela ala fe ha'da-holomata neu Haman, nenik ala sene-do'ok neu matan-na. Basa-basas tunga paleta ndia, tehu Mordekhai ta tunga fa.

³Hataholi mana'a ngga'di fe'ek manai uma manek-ka, latanen lae, tao le'e de, ana lena la'ban manek-ka paletan-na,

⁴de tunga faik ala lakan fo ela ka'da ana tunga, tehu ana ta nau namanene fa. Nafa'da nae, “Au hataholi Yahudi. De au ta bisa sene-do'ok neu hataholi daebafak fa.” Boema lafa'da dede'ak ndia neu Haman, nana ala nau bubuluk, ala ho'i nakeketuk beek kande, la'eneu Mordekhai-a.

⁵Nai lelek Haman namanene lae, Mordekhai ta nau sene-do'ok neu fan boema, namanasa nanseli.

⁶Ma nai lelek, ana bubuluk lae Mordekhai hataholi Yahudi esa boema, ana ho'i nakeketuk fo huku Mordekhai, ma ta ka'da ndia mesak-kana fa, tehu neukose, ana tao namopo-namate basa leoina Yahudi manai nusa Persia lala'en-na.

⁷Neu teu ka 12-na, fo Mane Ahasyweros-sa paleta, nai hataholi Yahudi-la bula ka esan-na, fo nde bula Nisan-na, boema Haman nadenu tu'u batu fo loken lae “purim” soaneu ala bubuluk, fai ma bula beek-ka nde nandaa, soaneu ana tao natetu ndia dale tutu'u mangalaun ndia. Boema naketun la'e hataholi Yahudi-la bula ka 12-na, fo nde bula Adar-ra fain 13.

⁸Boema, Haman nafa'da manek-ka nae, “Ama Manek, hapu leoina matabeuk esa nai basa nusak ia propensin-nala. Ha'dan-nala fe'ek nanseli, no leoina fe'ek-kala. Ala ta tunga nusak-ka hoholo-lalanen-nala fa. Da'di, malole lenak, Ama Manek boso po'ilotak-kasa, fo ala tao tunga ka'da sila dale hihii-nanaun mesan-na.

⁹Metema, Ama Manek nau soona, ela leo been-na, Ama Manek kalua susula paleta, fo tao namopo-namates. Ma metema, Ama Manek nau sipok atam-ma hala nonoken ia soona, tao leo bee-o, neukose atam-ma pe'da lilofulak kilo 340.000 leo Ama Manek kas dale neu.”

¹⁰Manek-ka namanene dede'ak ndia boema, ana kosun-na ndeli ana pakek-ka, fo biasa ana ndo ei nenik hala po'a-benga matetuk-ka neme manek-ka mai, de ana fen leo Haman, fo hataholi Yahudi-la musu matuainan-na neu.

¹¹Manek-ka nafa'da nae, “Au fe leoina ndia no doin-nala leo o neu. Tao beek, fo tunga o mata memetem-ma, malole soaneus.”

¹²Boema, neu hataholi Yahudi-la bula ka esan-na, fain 13 boema, Haman naloo manek-ka hataholi manasulak susulan-nala. Nadenus, fo ala sulak susulak nandaa no basa hata fo ana paletak-ka, boema ala salin susulak sila lii na leo basa susula liik, fo ala paken nai nusak ndia. Ala sulak susulak ndia, nenik ala pake Mane Ahasyweros-sa na'den-na, ma ala cap-pana nenik ndelin-na, boema ala haituan no lai-laik leo basa manakoasa, gobelnol, ma hataholi matua-madema-la nai basa propensi-la. Isin-na nde paleta, fo nae neu hataholi Yahudi-la bula Adar-ra, fain 13 soona, basa leoina Yahudi-a, nau lasik do mulik, nau inak do ni'iana lala'en-na, muse taonisas, fo boso fe do'o do ampon neus, ma loso-ma, hata-heton-nala.

¹⁴Muse po'a-benga paleta ndia nai propensi-la esa-esak, fo ela basa hataholi-la lahehele aon, nai faik fo nananaketu basak ndia so.

¹⁵Ladenu basa hataholi-la, no lai-laik ala la'o, fo leni susulak sila-la, leo basa propensi manai nusak-ka lala'en-na. No manek-ka hala nadenun-na, de ala po'a-benga paleta ndia nai Susan, fo Persia nusan-na, polon-na boe. Basa ndia boema, manek-ka no Haman benau ma linu angol, tehu kota Susan-na lakadii-lakau, nanahu halak ndia.