Read Termanu ESTER 4 Bible Online

ESTER 4 - Termanu bible

ESTER 4

¹Lelek Mordekhai namanene hata fo ana da'di so, boema ana sii nakalulutuk bua papaken-na, de ana pake lafa lapik, fo da'di neu ta'du-tana dale he'dik. Ana nggali afu leo langan lain neu, boema ana la'ok nai kota dale, ma ana kii dola-dola mesan, no dale he'dik.

²Ana losa uma manek-ka, lelesu inan-na boema nate'e, nana ala ta nau hataholi manapake lafa lapik leo dalek neu.

³Nai basa propensi lala'en-na boeo, hataholi Yahudi-la kii makaleleu, nai lelek ala po'a-benga manek-ka paletan-na. Ala okaaon-nala, ala kii ma lahoo, ma sila ba'uk-ka pake lafa lapik, de langape'uk lai afu lain.

⁴Lelek anafe'oanak-kala, ma manaho'u paleta hehelik fo lalalau-laoono Ina Manek Ester-ra, lafa'dan Mordekhai tatao-nono'in boema, Ester dalen-na he'dis nanseli. Ana haitua fe Mordekhai bua-lo'as, fo ana nggati heni ana pake lafa lapik-ka, tehu Mordekhai ta nau sipo bua-lo'as sila fa.

⁵Basa boema, Ester naloo-na Hatah, hataholi manaho'u paleta hehelik, fo manek-ka paletan nalalau-naoono Ester. Nadenu Hatah, fo natane Mordekhai, beek da'di so, ma tao le'e de, ana tao leondiak.

⁶Boema, Hatah neu leo Mordekhai nai mook manai kota dalek, nai uma manek-ka lelesu inan-na, matan-na.

⁷Boema Mordekhai tuin hata fo ana da'di so, ma ana tui la'eneu Haman helu basa nae, nai lelek ala tao lamopo-lamate basa hataholi Yahudi-la soona, ana fe doi isi lilofulak de'u bee, fo ana taon leo manek-ka kas dale neu.

⁸Mordekhai boeo, ana fe Hatah, manek-ka susulan fo ana kalua basan neme Susan-na, fo isin-na, paleta soaneu tao namopo-namate hataholi Yahudi-la. Nadenu Hatah, fo ana fe susulak ndia leo Ester neu, ma nafa'da mangalele'don dede'ak ndia, boeo noke, fo ela Ester neu leo manek-ka neu, fo ana dokodoe manek-ka susue-lalain, ba'eneu Ester leoinan-na

⁹Boema Hatah neu leo Ester neu, de nafa'dan Mordekhai hala hehelun-na.

¹⁰Tehu Ester nadenun, fo ana fali leo Mordekhai neu, fo neni fen hala heheluk-ka nde ia,

¹¹“Hataholi-la esa-esak, nau touk do inak boe, metema ala ta hapu hala nalolook fo leu lataa manek-ka nai uma manek-ka so'dan manai dalek-ka fa soona, muse hukunisan. Ndia nde been-na susulan-nakeketuk, fo basa hataholi-lala'en-na, mulai neme manek-ka hataholi manamanolin-mafa'dan-nala, losa laun manai propensi-la, muse bubuluk nakeketuk ndia. Hapu ka'da enok esa mesak-kana, fo nde metema manek-ka natu'du aitete'e lilopilan-na neu see soona, hataholi ndia nde naso'da. Tehu basa bulak esa ia so, te manek-ka ta naloo au fa.”

¹²Boema, Hatah nafa'da Ester hala hehelun ndia neu Mordekhai.

¹³Boema, Mordekhai haitua fe Ester hala heheluk-ka nde ia, “Boso maedaenga, neukose o pe'daaom, lena neme hataholi Yahudi fe'ek-kala mai, ka'da hu kande o leo nai uma manek-ka!

¹⁴Tao leo bee-o, neukose hataholi Yahudi-la tulu-falis nenik enok matak leo beek-ka boe, fo nalosa laso'da. Tehu metema, o ka'da denge-denge mahele nai manada'dik leo ia-ka dalek soona, neukose mate o boe, fo neukose, mopo o amam teidalen-na tutuin-na. See bubuluk, fafa'kama hu kande no enok ia, de o nanahele basak da'di ina manek so!”

¹⁵Boema, Ester haitua fe Mordekhai halak-ka nde ia nae,

¹⁶“Maloo makabubua basa hataholi Yahudi manai Susan-nala, fo hule-haladoi fe au. Boso mi'a-minu lele'dok 3, ma le'odaek 3. Au boe, ma anafe'oana malalau-maoono au-a, neukose ami okaaom-mala boe. Basa ndia soona, neukose au u leo manek-ka u, leomae dede'ak ndia, la'o lenak esa, soaneu susula nakeketuk-ka. Metema au muse mate, hu kande dede'ak ndia boe, soona nemen-na fo au mate!”

¹⁷Boema Mordekhai la'o leona, de ana tao tunga, basa hata fo Ester helu neun.