Read Termanu KELUARAN 1 Bible Online

KELUARAN 1 - Termanu bible

KELUARAN 1

¹ Yakob, fo loken lae Israel boe, neu leo Masir no anan-nala loo esa-esak teidalen. Yakob anan sila-la nde:

²Ruben Simeon Lewi Yehuda

³Isakhar Zebulon Benyamin

⁴Dan Naftali Gad Asyer.

⁵Yakob tititi-nonosin sila-la dede'un-na, basa-basan lala'en-na hataholi hituhulu. Ndia te, Yusuf nakahuluk nai Masir so.

⁶Basa ndia boema, mate Yusuf no tolanoon-nala, leondiak boe, hataholi fo dedena-baba'uk loon-nana.

⁷ Tehu sila tititi-nonosin fo nde hataholi Israel-la, bongi upu-anak makadotok, de lamade'u no lai-laik nanseli, nalosa ala tao lahenu nusa Masir-ra.

⁸ Basa boema, manek beuk esa, ana paleta nai Masir, tehu ta nalelak Yusuf fa.

⁹Nafa'da laun-na nae, “Hataholi Israel sila-la, leni soe matua ba'eneu ita, nanahu sila makadotok nanseli, ma be'i-balakain-nala lena heni ita.

¹⁰ Sanga tao leondia, fo natee-natatik da'di soona, fafa'kama lakabubua loo musu-a, fo ala la'ban ita, boema lalai la'oela nusak ia. Hu ndia de, ita muse sanga enok, fo ela ala boso boe lamade'u-lamaba'u seluk bai.”

¹¹Boema hataholi Masir-rala so'u manamanea, fo lanea leoina Israel-la, fo tao susa so'dan-nala nenik bela-ba'u mabelaina-la. Lakasetis, fo lafofo'a fe manek Masir-ra kota Pitom ma Raamses, fo da'di mamana pepe'da bua-lo'as.

¹²Tehu hataholi Masir-rala boetai tuni-ndeni hataholi Israel-la, ala boetai lamade'u-lamaba'u, ma ala boetai tapasasala leo basa nusak ndia lala'en-na neu, nalosa hataholi Masir-rala bii-lamata'u neus.

¹³Boema ala tuni-ndeni hataholi Israel-la no dale susue-lalai taak,

¹⁴ma ala tao-la maso'dan-nala doi-doso. No dale susue-lalai taak, lakasetis fo ala tao bela-ba'u mabelaina-la nai mamana ue-le'dis, ma nai tina-la dalek.

¹⁵Basa boema, manek Masir-ra fe paleta neu Sifra ma Pua, fo nai lelek inak Ibrani-la, ala bongi soona, inak ka duak sila-la nde lakabobongik-kasa.

¹⁶Manek Masir-ra nafa'das nae, “Nai lelek inak Ibrani-la bongi, fo emi meu makabobongik-kasa soona, mafandendelek dede'ak ia: Metema ni'iana nanabongik ndia touanak soona, taomisan! Tehu metema ni'iana nanabongik ndia inaanak soona, nemen-na fo naso'da.”

¹⁷Tehu ina ka duak fo manamakabobongik inak sila nde been-na, hataholi fo ala bii-lamata'u neu Manetualain. Ala ta nau tunga manek-ka paletan ndia fa, de ala po'ilotak basa ni'iana touanak-kala laso'da.

¹⁸Boema manek-ka naloo inak ka duak sila-la, de natanes nae, “Tao le'e de, emi po'ilotak ni'iana touanak-kala laso'da?”

¹⁹Boema lataa lae, “Inak Ibrani-la ta sama leo inak Masir-rala fa. Ala ta bongi lakalele'ok fa. Hataholi manamakabobongik-ka beita mai fa te, ala bongi-la so.”

²⁰Boema Manetualain ba'e-pala ina ka duak fo lakabobongik inak sila, ma Ana fes tititi-nonosik, nanahu ala fe ha'da-holomata neu Manetualain. Ma hataholi Israel-la boeo, boetai lamade'u ma mabe'i-balakaik.

²² Boema, manek-ka fe paleta nde ia neu basa laun-nala nae, “Basa ni'iana touanak fo hataholi Ibrani-la besak-ka bongi-lan na, muse tapa henis leo Lee Nil-la dalek neu, tehu basa ana inaanan-nala nemen-na fo ala bole laso'da.”